فوتو: x.com/@NobelPrize
بيىلعى نوبەل سىيلىعىنىڭ جارتىسى امەريكالىق سولتۇستىك-باتىس ۋنيۆەرسيتەتىنىڭ پروفەسسورى دجوەل موكيرگە بۇيىردى. قالعان جارتىسىن فرانتسۋز ەكونوميسى, كوللەج دە فرانس پروفەسسورى فيليپپ اگيون مەن لوندون ەكونوميكا مەكتەبىنىڭ وكىلى پيتەر حوۋيتت ءوزارا ءبولىستى. ۇشەۋى دە يننوۆاتسيالار قوعامنىڭ دامۋىندا نەگىزگى قوزعاۋشى كۇش ەكەنىن دالەلدەپ, ەكونوميكالىق ءوسىمنىڭ ۇزاق مەرزىمدى سيپاتىن تۇسىندىرگەن.
شۆەد عىلىم اكادەمياسىنىڭ مالىمدەۋىنشە, «سوڭعى ەكى عاسىردا الەم تاريحتا تۇڭعىش رەت تۇراقتى ەكونوميكالىق ءوسىم كەزەڭىن باستان كەشىردى. بۇل ميللياردتاعان ادامدى كەدەيلىكتەن شىعارىپ, قازىرگى وركەندەۋىمىزدىڭ نەگىزىن قالادى».
وتكەن جىلى ەكونوميكا سالاسىنداعى نوبەل سىيلىعىن دارون اسەموگلۋ, دجەيمس روبينسون جانە سايمون دجونسون العان ەدى. ولاردىڭ ەڭبەكتەرى ەلدەردىڭ نەگە ءارتۇرلى قارقىنمەن داميتىنىن جانە نە سەبەپتى كەي وڭىرلەردە تەحنولوگيالىق پروگرەسس مولشىلىق اكەلسە, كەي جەرلەردە پايداسىز قالىپ قوياتىنىن تۇسىندىرەدى.
ەستەرىڭىزگە سالا كەتەيىك, 6 قازاندا باستالعان نوبەل اپتالىعىندا العاشقى ماراپات فيزيولوگيا جانە مەديتسينا سالاسىندا يممۋنيتەتتى زەرتتەگەن عالىمدارعا بەرىلدى. 7 قازاندا فيزيكا سالاسىنداعى سىيلىق اقش عالىمدارىنا بۇيىردى. 9 قازاندا ادەبيەت سالاسىنىڭ لاۋرەاتى بولىپ ۆەنگر جازۋشىسى لاسلو كراسناحوركاي اتالدى. 10 قازاندا بەيبىتشىلىك سالاسىنداعى نوبەل سىيلىعى ۆەنەسۋەلالىق ساياساتكەر ماريا كورينا ماچادوعا تابىستالدى.
