بيىلعى 20 قىركۇيەكتە ىلە اۋدانىنا قاراستى قۇرتى اۋىلىندا مىڭ ءبىر تۇيەدەن قۇرالعان كەرۋەن ءبىر شاقىرىم جول ءجۇرىپ ءوتتى. وسى جەتىستىك گيننەس رەكوردتار كىتابىنا الەمدەگى ەڭ ۇلكەن تۇيە كەرۋەنى رەتىندە تىركەلدى.
سەرتيفيكاتتى گيننەس رەكوردتار كىتابىنىڭ وكىلى ريچارد-ۋيليام ستەننينگ تابىستاپ, قازاقستانداعى بۇل وقيعانىڭ وزگەلەردەن ەرەكشەلىگىن اتاپ ءوتتى.
«بۇل – ەرەكشە جاعداي. باسقا ەلدەردە مۇنداي كەرۋەندەر ادەتتە ءتۇرلى يەلەردىڭ جانۋارلارىنان قۇرالادى: بىرەۋدە ءتورت تۇيە, ەكىنشىسىندە ەكى تۇيە بولۋى مۇمكىن. ال مۇندا بۇكىل كەرۋەن ءبىر ادامنىڭ يەلىگىندە. بۇل رەكوردتى شىن مانىندە بىرەگەي ەتەدى. قازاقستان مەنى قاتتى اسەرگە بولەدى. ەندى مەن مۇندا تەك جۇمىسپەن ەمەس, تۋريست رەتىندە دە قايتا ورالعىم كەلەدى», – دەدى ول.
الماتى وبلىسىنىڭ اكىمى مارات سۇلتانعازيەۆ بۇل جەتىستىك تەك ءوڭىر ءۇشىن ەمەس, بۇكىل ەل ءۇشىن ماڭىزدى وقيعا ەكەنىن اتاپ ءوتتى.
«رەكوردتىڭ راستالۋى – ءبىزدىڭ مادەني مۇرامىز بەن ۇلتتىق رۋحىمىزدىڭ مويىندالۋى. مىڭ تۇيەدەن قۇرالعان كەرۋەن حالىقتى بىرىكتىرىپ, قازاق حالقىنىڭ داستۇرلەرىنە دەگەن قۇرمەتتىڭ سيمۆولىنا اينالدى», – دەدى ءوڭىر باسشىسى.
كەرۋەننىڭ يەسى ءارى باستاماشىسى, «داۋلەت-بەكەت» جشس ديرەكتورى سىدىق داۋلەتوۆ جوبانى دايىنداۋعا شامامەن التى اي ۋاقىت كەتكەنىن ايتتى.
«تۇيەلەر ەركىندىكتى جاقسى كورەدى, ولاردى ءبىر جەرگە جيناۋ وڭاي بولعان جوق. دەگەنمەن ماقسات پەن سەنىم بولسا, كەز كەلگەن ءىستىڭ ورىندالاتىنىن دالەلدەدىك. الداعى ۋاقىتتا شۇبات فەستيۆالىن وتكىزۋدى جوسپارلاپ وتىرمىز — حالقىمىزعا وسىنداي ءداستۇرىمىزدى جانداندىراتىن شارالار جەتىسپەيدى», – دەدى ول.
