اۋقىمدى شاراعا قىرعىزستان, وزبەكستان, ۇلىبريتانيا جانە قازاقستاننىڭ بەلگىلى تاريحشىلارى مەن عالىمدارى قاتىستى.
ءىس-شارانىڭ اشىلۋىندا وبلىس اكىمىنىڭ اتىنان ءسوز سويلەگەن دياس ەسداۋلەتوۆ شوقان مۇراسىنىڭ تۇركى حالىقتارىنىڭ تاريحى مەن مادەنيەتىن تانۋداعى ماڭىزىنا توقتالدى. ونىڭ ايتۋىنشا, شوقان ءۋاليحانوۆتىڭ تۇلعاسى جالپىۇلتتىق قانا ەمەس, بارشا تۇركى جۇرتى ءۇشىن ورتاق ماقتانىش.
– عالىمنىڭ ءومىرىنىڭ سوڭعى كەزەڭىن جەتىسۋ جەرىندە وتكىزىپ, وسى وڭىردە ماڭگىلىك تىنىس تابۋى – ءبىز ءۇشىن زور مارتەبە ءارى ۇلكەن جاۋاپكەرشىلىك, – دەدى ول.
بيىل «التىنەمەل» مۋزەيىنىڭ اشىلعانىنا 40 جىل تولىپ وتىر. ءوڭىردىڭ تاريحي-مادەني ومىرىندە ەلەۋلى ورنى بار بۇل نىسان پرەزيدەنت تاپسىرماسىمەن 2023 جىلى تولىق جاڭعىرتۋدان وتكەن.
كونفەرەنتسيا بارىسىندا جارىلقاپ بەيسەنباي ۇلىنىڭ «شوقان» اتتى كىتابىنىڭ جاڭا باسىلىمىنىڭ تۇساۋكەسەرى ءوتتى. سونىمەن قاتار ماۋلەن اشىمباەۆ پەن مارات احمەتجانوۆتىڭ قۇتتىقتاۋ حاتتارى وقىلدى.
عىلىمي جيىندا اۋەزحان شاشاەۆ, شولپان تۇرداليەۆا, ۆلاديمير فەتيسوۆ, فاكيا شامشيدەنوۆا جانە ۇلىبريتانيالىق زەرتتەۋشى نيك فيلدينگ بايانداما جاساپ, شوقان ەڭبەكتەرىنىڭ تىڭ قىرلارىن تالداپ, ونىڭ زەرتتەۋلەرىندەگى ەتنوگرافيالىق جانە تاريحي دەرەكتەرگە توقتالدى.
كونفەرەنتسيا پىكىرتالاس الاڭىنا ۇلاسىپ, قاتىسۋشىلار شوقان مۇراسىن تەرەڭىرەك زەرتتەۋ جانە ناسيحاتتاۋ باعىتىندا بىرقاتار ۇسىنىستار ايتتى.
جيىن الدىندا قاتىسۋشىلار كەربۇلاق اۋدانىنداعى «التىنەمەل» مەموريالدىق مۋزەيىنە بارىپ, عالىم ەسكەرتكىشىنە گۇل قويىپ, «تازا قازاقستان» اكتسياسى اياسىندا جاس كوشەتتەر وتىرعىزدى.
ماتەريالدى دايىنداعان: جەتىسۋ وبلىسى اكىمىنىڭ ءباسپاسوز قىزمەتى
فوتولار: جەڭىس ىسقاباي جانە وبلىستىق مادەنيەت, ارحيۆتەر جانە قۇجاتتاما باسقارماسى
