اكتسياعا مەملەكەتتىك قىزمەتشىلەر, ستۋدەنتتەر, ەرىكتىلەر, بەلسەندى جاستار, قالا تۇرعىندارى اتسالىستى. ءىس-شاراعا وبلىس اكىمى قۇمار اقساقالوۆ ارنايى كەلىپ قاتىسىپ, قالا تۇرعىندارىمەن اڭگىمەلەسىپ, كوپپەن بىرگە كۇرەك ۇستاپ, كوشەت وتىرعىزدى.
ەكولوگيالىق اكتسياعا ءبۇتىن اۋلەتىمەن شىعىپ, وزدەرىنىڭ وتباسىلىق اعاشىن ەگىپ جاتقان تۇرعىندار دا بار. سولاردىڭ ءبىرى – قولداسباەۆتار اۋلەتى.
«بۇگىنگى اكتسياعا ۇلىمدى, كەلىنىمدى, نەمەرەلەرىمدى ادەيى ەرتىپ كەلدىم. اكەم ءومىر بويى بالا وقىتىپ, ۇستازدىق ەتتى. ءوزىم ىبىراي التىنسارين اتىنداعى ارقالىق پەداگوگيكالىق ۋنيۆەرسيتەتىنىڭ دوتسەنتىمىن, ارداگەر ۇستازبىن. نەمەرەم ەرلان دا ۇستازدىق جولىن تاڭدادى. بۇگىنگى سەنبى - ءبارىمىز ءۇشىن قۋانىشتى كۇن دەپ ەسەپتەيمىز. ويتكەنى بۇل تازالىق اكتسياسى ەڭ الدىمەن وزىمىزگە كەرەك, حالقىمىزدىڭ ەكولوگيالىق مادەنيەتىن قالىپتاستىراتىن ىزگىلىككە باستايتىن ءمانى تەرەڭ, ماڭىزى زور ءىس-شارا دەپ بىلەمىن. پرەزيدەنتىمىزدىڭ جولداۋىندا دا وسى تازالىق ماسەلەسى ايتىلدى. مەملەكەت باسشىسى تورعاي ءوڭىرى ۇكىمەتتىڭ ايرىقشا نازارىندا بولاتىنىن ايتتى. وسىنىڭ ءبارى ارقالىقتىڭ, جالپى تورعاي كەلەشەگىنىڭ جارقىن ەكەنىن كورسەتەدى. جالپى, حالىقتىڭ جاعدايى جاقسارىپ, ارقالىعىمىز دا جىلدان-جىلعا جاڭارىپ, گۇلدەنىپ, كوركەيىپ كەلە جاتىر», دەيدى قالا تۇرعىنى زينا قولداسباەۆا.
احمەت بايتۇرسىن ۇلى ساياباعىنا قالانىڭ بەلسەندى جاستارى 200-گە جۋىق اعاش كوشەتىن وتىرعىزدى.
«كەزىندە مەملەكەت باسشىسى قاسىم-جومارت توقاەۆتىڭ باستاماسىمەن باستاۋ العان «تازا قازاقستان» جالپىۇلتتىق ەكولوگيالىق اكتسياسى بۇگىندە ءبىز ءۇشىن ءداستۇرلى ءىس-شاراعا اينالدى. اكتسيا باستالعالى قالامىزدى كوركەيتۋگە, ءوزىمىز ءومىر ءسۇرىپ جاتقان ورتانى, اينالامىزدى تازا ۇستاۋعا باعىتتالعان سەنبىلىكتەر, بۇگىنگىدەي كوكتەمگى, كۇزگى اعاش وتىرعىزۋ جۇمىستارى ءجيى ءوتىپ تۇرادى. بۇگىن بۇكىل قالا اۋماعىندا ءوتىپ جاتقان اعاش وتىرعىزۋ اكتسياسىنا وسىنداعى 4 كوللەدج بەن ارقالىق پەداگوگيكا ۋنيۆەرسيتەتىنىڭ ستۋدەنتتەرى شىقتى. ماسەلەن, ءوزىمىز تۇرعان احمەت بايتۇرسىن ۇلى ساياباعىندا پوليتەحنيكالىق كوللەدج ستۋدەنتتەرى قاراعاي, قايىڭ كوشەتتەرىن وتىرعىزىپ جاتىر. جالپى, ارقالىق جاستارى پرەزيدەنت باستاماسىن قاشان دا قولدايدى. «تازا قازاقستان» باعدارلاماسى ەلدى مەكەندەردىڭ سانيتارلىق جاعدايىن جاقسارتۋدان باستاپ, جاسىل ايماقتاردى قالپىنا كەلتىرۋگە جانە ينفراقۇرىلىمدى جاڭعىرتۋعا دەيىنگى كەڭ اۋقىمدى مىندەتتەردى قامتيدى. ءبىزدىڭ تورعاي وڭىرىنە دە ەرەكشە نازار اۋدارىلىپ جاتىر. الداعى ۋاقىتتا مۇندا كوپتەگەن ەكولوگيالىق باستامالار ءىرى ينفراقۇرىلىمدىق جوبالارمەن قاتار جۇزەگە اسپاق. ونىڭ ىشىندە تورعايدى دامىتۋدا ايرىقشا ستراتەگيالىق ماڭىزعا يە «ورتالىق – باتىس» اۆتوجولىنىڭ قۇرىلىسى دا بار», دەيدى قالالىق جاستار رەسۋرستىق ورتالىعىنىڭ باسشىسى دانيار قوجاحمەتوۆ.
