باس پروكۋرور اقش-قا جۇمىس ساپارىمەن باردى

استانا. 19 اقپان. باس پروكۋرور اسحات داۋىلباەۆ اقش-تا جۇمىس ساپارىمەن بولدى. ول اقش مەملەكەتتىك حاتشىسىنىڭ ايرىقشا تاپسىرمالارى جونىندەگى كەڭەسشىسى توماس شەننونمەن جانە ەسىرتكىمەن كۇرەس جونىندەگى باسقارما ديرەكتورى ميشەل لەونحارتپەن كەزدەستى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى. اقش مەملەكەتتىك حاتشىسىنىڭ كەڭەسشىسىمەن وتكىزىلگەن كەلىسسوز بارىسىندا باس پروكۋرور قازاقستاندىق پروكۋراتۋرانىڭ زاڭدىلىق پەن قۇقىقتىق ءتارتىپتى, ادام قۇقىقتارى مەن بوستاندىقتارىن قورعاۋدى قامتاماسىز ەتۋ بويىنشا قىزمەتىنىڭ نەگىزگى باعىتتارى تۋرالى باياندادى. سونىمەن قاتار, ەلىمىزدىڭ باس پروكۋراتۋراسىنىڭ امەريكالىق قۇزىرلى ورگاندارمەن ءوزارا ىنتىماقتاستىق قاعيداسى نەگىزىندە قىلمىسقا قارسى ارەكەت ەتۋ, قىلمىستىق ىستەر بويىنشا حالىقارالىق قۇقىقتىق كومەك كورسەتۋ جانە قىلمىسكەرلەردى ۇستاپ بەرۋ سالاسىنداعى بەلسەندى جۇمىستارى اتاپ ءوتىلدى. سۇحباتتاسۋشىلار قازىرگى الەمنىڭ جاھاندىق قاۋىپ-قاتەرلەرىنە قارسى تۇرۋ ماقساتىندا ەكى ەل اراسىنداعى ءوزارا ىقپالداستىقتى بۇدان ءارى جالعاستىرۋعا قاتىستى پىكىر الماستى. ەكسترەميزم مەن تەرروريزمگە قارسى كۇرەس, ادام قۇقىقتارىن قورعاۋ سالالارىنداعى ءوزارا ارەكەتتەستىككە بايلانىستى ماسەلەلەر قاراستىرىلىپ, سونداي-اق ەكسترەميزمگە قارسى كۇرەستە ورتاق شەشىمدەر جانە بىرلەسكەن شارالار ازىرلەۋگە بىرەگەي مۇمكىندىك تۋعىزادى دەپ كۇتىلىپ وتىرعان الدا وتەتىن سامميت جۇمىسى تۋرالى دا ءسوز قوزعالدى. شارتتىق-قۇقىقتىق نەگىزدى كەڭەيتۋ جانە نىعايتۋ ماسەلەسى سۇحباتتىڭ دەربەس تاقىرىبىنا اينالدى. قول قويۋعا دايىنداۋدىڭ ەڭ سوڭعى كەزەڭىن وتكەرىپ جاتقان قىلمىستىق ىستەر بويىنشا ءوزارا قۇقىقتىق كومەك تۋرالى ەكى ەل اراسىنداعى شارتتى جاساسۋ قازاقستان مەن امەريكا قۇراما شتاتتارىنىڭ قۇقىقتىق ىنتىماقتاستىعىن دامىتۋدا ايرىقشا سەرپىن بەرەتىنىن تاراپتار اتاپ ايتتى. ەسىرتكىمەن كۇرەس جونىندەگى باسقارما ديرەكتورىمەن بولعان كەزدەسۋ بارىسىندا ەسىرتكى ساۋداسىنا قارسى كۇرەستەگى ەكىجاقتى ىنتىماقتاستىق ماسەلەلەرى تالقىلانىپ, ەسىرتكى ءترانزيتى مەن جەتكىزۋ جولدارىن انىقتاۋ جونىندەگى بىرلەسكەن ءىس-شارالاردىڭ ناتيجەلەرى اتاپ ءوتىلدى. ا.داۋىلباەۆ ناشاقورلىققا جانە ەسىرتكى ساۋداسىنا قارسى كۇرەس جونىندەگى سالالىق باعدارلامانى ىسكە اسىرۋ اياسىندا زاڭسىز ەسىرتكى اينالىمىنا قارسى ارەكەت ەتۋ بويىنشا ەلىمىزدە قابىلدانىپ جاتقان شارالار تۋرالى مالىمەت بەردى, سونىمەن قاتار قازاقستاننىڭ قۇقىق قورعاۋ جانە ارنايى قىزمەتى قىزمەتكەرلەرى ءۇشىن كۆانتيكو قالاسىندا ورنالاسقان ەسىرتكىمەن كۇرەس جونىندەگى باسقارما اكادەمياسىندا وقۋ سەمينارلارى مەن ترەنينگتەرىن وتكىزۋدىڭ ماڭىزدىلىعىن ەرەكشە اتاپ ءوتتى. سۇحباتتاسۋشىلار ترانسۇلتتىق ەسىرتكى بيزنەسىنە قارسى تۇرۋ بويىنشا ودان ءارى كۇش جۇمىلدىرۋعا, سونداي-اق وسى سالادا جەدەل اقپارات, تاجىريبە جانە زاڭناما الماسۋعا دايىن ەكەندىكتەرىن باسا ايتتى. جولدىباي بازار. دەرەك, سۋرەت: باس پروكۋراتۋرانىڭ ءباسپاسوز قىزمەتى.