تايقازان پەتروپاۆلدان پاۆلودارعا تابىس ەتىلدى

پەتروپاۆل. 19 اقپان. «قازاقستان حالقى اسسامبلەياسى-20 يگى ءىس «ەستافەتاسى اياسىندا ۇيىمداستىرىلعان اكتسيا قىزىلجار ءوڭىرىن بىرنەشە كۇن ارالاپ, ءوز مارەسىنە جەتتى. بۇل تۋرالى egemen.kz ءتىلشىسى حابارلادى. شارا بارىسىندا ۇيىمداستىرىلعان كوشپەلى ءباسپاسوز كونفەرەنتسياسىنا اكىمدىكتىڭ جاۋاپتى قىزمەتكەرلەرى مەن ەتنومادەني بىرلەستىك وكىلدەرى قاتىستى. ولار اكتسيا اياسىندا اتقارىلعان جۇمىستارعا توقتالدى. جيىندى وبلىس اكىمىنىڭ ورىنباسارى انارحان دۇيسەنوۆا اشتى. ول پرەزيدەنتتىڭ «ءبىزدىڭ باستى بايلىعىمىز – بىرلىگىمىز. مەن اۋىزبىرشىلىكتەن اينىمايتىن اقجۇرەك جۇرتىمنىڭ قۋاتتى ۇلتقا, شۋاقتى ۇلىسقا اينالارىنا كامىل سەنەمىن» دەگەن پايىمدارىن ەسكە سالا وتىرىپ, حالىقتار مەن دىندەر اراسىنداعى كەلىسىم قىزىلجار ءوڭىرىنىڭ دە باستى وزەگى بولىپ تابىلاتىنىن العا تارتتى. ونىڭ ءسوزىن «ورىس قاۋىمداستىعى» ۇيىمىنىڭ باسشىسى نيكولاي اۆدەەۆ, «قازاق ءتىلى» قوعامىنىڭ توراعاسى كارىباي مۇسىرمان, سقمۋ-گى قازاقستان اسسامبلەياسى كافەدراسىنىڭ جەتەكشىسى ليۋدميلا گريۆەننايا, تاعى باسقالارى تولىقتىرىپ, ءبىزدىڭ وتانىمىز – ورتاق, تىلەگىمىز – ءبىر, ماقساتىمىز جالعىز. ماڭگىلىك ەل – اتا-بابالارىمىزدىڭ سان مىڭ جىلدان بەرگى اسىل ارمانى. كەلەشەگى كەمەل نۇرلى جولدا بىرلىگىمىز بەرىك بولسىن دەگەن تىلەكتەرىن ارنادى. ەستافەتانىڭ سوڭعى نۇكتەسى پوگودين اتىنداعى ورىس دراما تەاترىندا قويىلدى. وندا وبلىس اكىمىنىڭ ورىنباسارى ا.دۇيسەنوۆا قازاقستان حالقى اسسامبلەياسى جىلىنىڭ اشىلۋ راسىمىنە وراي ۇيىمداستىرىلعان «20 يگى ءىس» ەستافەتاسىنىڭ سيمۆولى – تايقازاندى   پاۆلودار وبلىستىق اسسامبلەياسىنىڭ حاتشىلىق مەڭگەرۋشىسى سەيسەنباي جەتپىسباەۆقا ءدۇيىم جۇرتشىلىقتىڭ الدىندا سالتاناتتى تۇردە تابىس ەتتى. سالتاناتتى ءراسىم سوڭى كونتسەرتكە ۇلاستى. ءومىر ەسقالي. دەرەك: egemen.kz. سۋرەت: «قازاقپارات».