فوتو: 5-tv.ru
رەسەيدە قازاقستان ازاماتتارىن ۇستاۋ جاعدايلارى كوبەيىپ جاتىر. كورشى ەلگە جۇك تاسىمالداپ, ناپاقاسىن تاۋىپ جۇرگەن قازاقستاندىق جۇرگىزۋشىلەر جۇمىسسىز قالۋى مۇمكىن ەدى.
ءماجىلىس دەپۋتاتى ءوزىنىڭ Facebook پاراقشاسىندا جازعانداي, بىرنەشە كۇندىك قارقىندى جۇمىستىڭ ناتيجەسىندە قازاقستان ۇكىمەتى رەسەي فەدەراتسياسىنداعى ارىپتەستەرىمەن كەلىسىمگە كەلىپ, حالىقارالىق جۇك جانە جولاۋشىلار تاسىمالىمەن اينالىساتىن جۇرگىزۋشىلەرگە جاڭا كوشى-قون شەكتەۋلەرى قولدانىلمايتىن بولدى.
بۇل شەشىمنىڭ ناتيجەسىندە:
-
قازاقستاندىق جۇرگىزۋشىلەر بۇل ەلدە 90 كۇننەن ارتىق بولا الادى;
-
جاپپاي دەپورتاتسيا مەن ايىپپۇلدار توقتاتىلدى;
-
شاعىن اۆتوكاسىپورىندارداعى مىڭداعان جۇمىس ورنى ساقتالدى.
دەپۋتاتتىڭ ايتۋىنشا, جۇرگىزۋشىلەر — ءوز ءىسىنىڭ كاسىبي ەليتاسى. ولار حالىقارالىق تاسىمال جۇيەسىن جەتىك مەڭگەرىپ, ەل ەكونوميكاسىنىڭ تۇراقتىلىعىنا تىكەلەي ۇلەس قوسىپ كەلەدى.
«بۇل جاي عانا جۇرگىزۋشىلەر ەمەس — جوعارى دەڭگەيدەگى كاسىبي ماماندار. ەگەر بۇل سالانى جوعالتساق, وندا تۇتاس كاسىبي قاۋىمدى جوعالتامىز. سوندىقتان مەملەكەت ءوز ازاماتتارىن قورعاۋى ءتيىس», دەپ جازدى دەپۋتات.
سونىمەن قاتار ول ۇكىمەت پەن ءماجىلىستىڭ ۇيلەسىمدى جۇمىسىنىڭ ارقاسىندا ۋاقىتشا شەشىم قابىلدانىپ, قازاقستاندىق تاسىمالداۋشىلاردى رەسەيدىڭ جاڭا ەرەجەلەرىنەن شىعارۋ مۇمكىن بولعانىن اتاپ ءوتتى.
«قازاقستان ءوز ازاماتتارىن تاستامايدى. مۇنداي شەشىمدەر ەۋرازيالىق ەكونوميكالىق وداق اياسىندا الدىن الا كەلىسىلىپ قابىلدانۋى ءتيىس. سەبەبى وداق – بۇل توسقاۋىلدار ورنى ەمەس, ەركىندىك پەن ءوزارا قۇرمەت كەڭىستىگى», دەپ تۇيىندەدى دەپۋتات.
ايتا كەتەيىك, بيىل جىل باسىندا جاڭا ميگراتسيالىق ەرەجەلەر كۇشىنە ەنگەن. ەندى شەتەل ازاماتتارى, سونىڭ ىشىندە قازاقستاندىقتار دا, رەسەي اۋماعىندا ءبىر جىلدا 90 كۇننەن ارتىق بولا المايدى. وسى تالاپتىڭ كەسىرىنەن ونداعان جۇرگىزۋشىگە ايىپپۇل سالىنىپ, دەپورتاتسيا جاريالاندى, ءتىپتى كەيبىرى قاماۋعا الىنعان.
