كوكشەتاۋدا اكىمدىك پەن «وتباسى» بانك بىرلەسىپ جاڭا باعدارلامانى جۇزەگە اسىردى. بۇل يگى ءىس وسى تاراپتىڭ العاشقى قارلىعاشى ىسپەتتى. بۇگىن 21 وتباسى ءوز پاتەرلەرىنىڭ كىلتىن الدى. الداعى ۋاقىتتا تاعى 47 پاتەر كىلتى تابىس ەتىلەدى.
تۇرعىندارعا پاتەرلەردىڭ كىلتىن تاپسىرۋ سالتاناتى كەزىندە وبلىس اكىمىنىڭ ورىنباسارى التىناي امىرەنوۆا تۇرعىن ۇيمەن قامتاماسىز ەتۋ مەملەكەتتىك ساياساتتىڭ باسىم باعىتتارىنىڭ ءبىرى ەكەندىگىنە توقتالىپ ءوتتى.
«بۇل – وتباسى بانكىنىڭ تولىق اۆتوماتتاندىرىلعان رەجيمدە وتكىزگەن العاشقى نەسيەلىك تۇرعىن ءۇيدى ءبولۋى. ادام فاكتورى تولىعىمەن الىنىپ تاستالدى – جۇيە قاتىسۋشىلاردى وزدىگىنەن انىقتايدى, كەزەككە قويىلعان كۇن مەن كەزەكتە تۇرعان ازاماتتىڭ ساناتىن ەسكەرەدى. ودان كەيىن تابىس دەڭگەيى تەكسەرىلىپ, ۇسىنىلعان پاتەردى قابىلداۋعا دايىن ەكەندىگى راستالادى. وسىلايشا, بارلىق پروتسەسس بارىنشا اشىق جانە ءادىل جۇرگىزىلەدى», دەپ اتاپ ءوتتى «وتباسى بانكى» اق اقمولا وبلىستىق فيليالىنىڭ ديرەكتورى المات نۇراحمەتوۆ.
ءبىرىنشى كەزەكتە شارشى مەترلەر ازاماتتاردىڭ باسىم ساناتتارى اراسىندا ءبولىندى. ولار – ۇوس ارداگەرلەرى مەن ولارعا تەڭەستىرىلگەن تۇلعالار, وزگە مەملەكەتتەردىڭ اۋماعىنداعى سوعىس قيمىلدارىنا قاتىسقان ارداگەرلەر, جەتىم بالالار مەن اتا-اناسىنىڭ قامقورلىعىنسىز قالعان بالالار, كوپبالالى وتباسىلار, ءى جانە ءىى توپتاعى مۇگەدەكتىگى بار ادامدار, ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلار, سونداي-اق جەسىرلەر مەن جەسىر ەرلەر.
ولارعا تۇرعىن ءۇيدىڭ جالپى كولەمىنىڭ كەمىندە 70%-ى بەرىلدى. ونىڭ ىشىندە 20%-ى جەتىم بالالار اراسىندا ءبولىندى. قالعان 30% پاتەر وزگە كەزەكتە تۇرعان ازاماتتار اراسىندا تاراتىلدى.
شارتتار بارىنشا قولايلى – نەسيە جىلدىق 2% (جتسم 2%-دان 2,1%-عا دەيىن) جانە 5% (جتسم 5,2%-دان 5,8%-عا دەيىن) مولشەرلەمەلەرمەن, باستاپقى جارنا نەبارى 10% كولەمىندە تولەنەدى.
«مەملەكەتتىڭ قامقورلىعىنا ءدان ريزامىز. وتباسى بانكىنىڭ بۇل باستاماسى قاراپايىم حالىق ءۇشىن وتە قولايلى. تۇرعىن ءۇيدىڭ ءبىر شارشى مەترى 261 225 تەڭگەدەن كەلىپ وتىر. ءبىر جاقسىسى, بارلىق پاتەرلەرگە جوندەۋ جۇمىستارى جاسالعان, تەك جيھازدارىڭىزدى الىپ كەلسەڭىز بولدى. سۋ, جىلۋ, ەلەكتر قۋاتى, گاز تارتىلعان», دەيدى قالا تۇرعىنى ءاليا بەيسەمباەۆا.
جاڭا پاتەرگە يە بولعانداردىڭ اراسىندا ون جىلداپ كەزەكتە تۇرعاندار بار ەكەن.
«مەن 18 جىل بويى كەزەكتە تۇردىم, سوندىقتان كوپتەن كۇتكەن قۋانىش بولىپ وتىر. قاراپايىم حالىقتى وسىنداي قامقورلىعىنا بولەگەن مەملەكەت باسشىسىنا اق العىسىمىزدى ايتقىمىز كەلەدى», دەيدى جاڭا پاتەرگە يە بولعانداردىڭ ءبىرى جانات نىعمەتجانقىزى.
قونىس تويىنا جينالعان حالىق پاتەرلەردى ارالاپ كورىپ, ساپاسىنا كوڭىلدەرى تولاتىنىن ايتىپ جاتىر. اجەلەر شاشۋ شاشىپ, اتالار باتاسىن بەرۋدە. باسپانانىڭ باقىت كىلتى ەكەندىگى دە راس.
ء«ۇش جەردە جۇمىس ىستەدىم. سوندا دا ءۇي ساتىپ الۋعا قاراجات جيناي المادىم. ءبىزدىڭ وڭىردە تۇڭعىش رەت قولعا الىنعان وسى باستاما قاراپايىم ادامداردىڭ باسپانالى بولۋىنا جاعداي تۋدىرىپ وتىر. قولىمدا قارت انام بار. باسپاناعا قول جەتكىزەمىن دەپ قارا جۇمىس ىستەۋدەن ارلانعان جوقپىن. ەدەن دە جۋدىم, كەڭسەلەردى تازارتۋمەن دە اينالىستىم», دەيدى قۋانىشقا كەنەلگەندەردىڭ ءبىرى ءاليا باياكينا.
كوكشەدەگى قونىس تويى قاراپايىم كوپشىلىكتىڭ كوكىرەكتەرىنە نۇر ساۋلەسىن قۇيعان, اق تۇيەنىڭ قارنى جارىلعان كۇن بولدى.
