ءسوز باسىندا ءماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ مۇعالىمدەردى وتكەن كاسىبي مەرەكەسىمەن قۇتتىقتاپ, پەداگوگتەردىڭ قوعام ومىرىندەگى جانە ەل دامۋىنداعى ايرىقشا رولىنە توقتالدى. ول «Amanat»-تىڭ نەگىزگى تىرەگى پەداگوگتەر ەكەنىن اتاپ ءوتتى. سەبەبى ەلىمىزدەگى 600 مىڭ مۇعالىمنىڭ 260 مىڭعا جۋىعى – پارتيا مۇشەلەرى.
«الدىمىزدا تۇرعان نەگىزگى مىندەت – ادال, ءبىلىمدى, ادىلەتتى ازامات تاربيەلەۋ. بۇل ۇدەرىس ۇيدەن باستالىپ, مەكتەپتە جالعاسىن تابادى. ءار بالانىڭ وتانشىل بولىپ ءوسۋى, ۇلكەنگە قۇرمەت, كىشىگە ىزەت كورسەتە ءبىلۋى, اينالاسىنا, قورشاعان ورتاعا جاۋاپكەرشىلىكپەن قاراۋى ماڭىزدى. پرەزيدەنت ايتقانداي, ءار ادام ءوزى ادال بولسا, زاڭدى قۇرمەتتەسە عانا ادىلەتتى قازاقستاندى قۇرا الامىز. ال ونداي بۋىن تاربيەلەۋ – مۇعالىمدەردىڭ تاريحي ميسسياسى. وسى ىستە پارتيا ءاردايىم سىزدەرمەن بىرگە بولادى», دەدى ول.
پارتيا توراعاسى تسيفرلاندىرۋ جانە جاساندى ينتەللەكتىنى دامىتۋ ماسەلەسىنە ەرەكشە نازار اۋداردى. ول مەملەكەت باسشىسى قاسىم-جومارت توقاەۆ ءوز جولداۋىندا قازاقستاندى ءۇش جىل ىشىندە جاپپاي تسيفرلىق ەلگە اينالدىرۋ تۋرالى وتە اۋقىمدى مىندەت قويعانىن ەسكە سالدى. بۇل ءبىلىم بەرۋ جۇيەسىنە قاجەت ماڭىزدى مۇمكىندىكتەرگە جول اشادى.
– مەكتەپ تەك دامۋ ۇدەرىسىنە ىلەسىپ قويماي, ونى باسىپ وزۋعا ءتيىس. ماسەلە ەندى جاساندى ينتەللەكت ءبىلىم جۇيەسىندە قاجەت پە, جوق پا دەگەن ساۋالدا ەمەس, ونى ءتيىمدى ەنگىزۋدە. ءبىر نارسەنى ۇنەمى ەستە ساقتاۋ كەرەك: مۇعالىم مەكتەپتىڭ جۇرەگى بولىپ قالا بەرەدى. جاساندى ينتەللەكت مۇعالىمدى الماستىرمايدى, كەرىسىنشە ونى باسى ارتىق جۇمىستان ارىلتىپ, ەڭ نەگىزگى مىندەتىن – وقۋشىعا ءبىلىم بەرۋ, تاربيەلەۋ جانە تۇلعالىق قاسيەتىن قالىپتاستىرۋ ءىسىن الاڭسىز اتقارۋىنا مۇمكىندىك بەرۋگە ءتيىس», دەدى ە.قوشانوۆ.
ءماجىلىس سپيكەرى مەملەكەت باسشىسىنىڭ ءبىلىم جۇيەسىن قولداۋعا قاتىستى ساياساتى مەن ونىڭ تاپسىرماسى بويىنشا «پەداگوگ مارتەبەسى تۋرالى» زاڭنىڭ قابىلدانۋى وڭ ناتيجە بەرگەنىنە نازار اۋداردى. كەيىنگى ءتورت جىلدا ءبىلىم سالاسىنا بولىنگەن قارجى كولەمى ءۇش ەسە ارتتى. مۇعالىمدەردىڭ جالاقىسى ەكى ەسە ءوستى. بيىلدىڭ وزىندە مەكتەپكە 10 مىڭنان اسا جاس مامان كەلدى. ولاردىڭ اراسىندا جوعارى بالل جيناعان تۇلەكتەر مەن «التىن بەلگى» يەگەرلەرى بار. حالىقارالىق زەرتتەۋ ناتيجەلەرى مۇعالىمدەردىڭ باسىم كوپشىلىگى ءوز جۇمىسىنا كوڭىلى تولاتىنىن كورسەتتى.
ءوز كەزەگىندە, «Amanat» پارتياسى دا پەداگوگتەرگە بەلسەندى قولداۋ كورسەتىپ كەلەدى. ماجىلىستەگى پارتيا فراكتسياسىنىڭ قولداۋىمەن حالىقارالىق عىلىمي كونكۋرستاردىڭ جەڭىمپازدارىن تاربيەلەگەن پەداگوگ-تالىمگەرلەرگە ارنايى تولەم قاراستىرىلاتىن زاڭ ماقۇلداندى. مۇنداي وقۋشىلار ەندى «بولاشاق» باعدارلاماسى بويىنشا گرانتقا ۇمىتكەر بولا الادى. زاڭنامالىق دەڭگەيدە مەكتەپ قابىرعاسىندا تاماقتاندىرۋ بارىسىن باقىلاۋدى كۇشەيتۋ, بالاباقشالار مەن ءبىلىم ۇيىمدارىنا جەر ۋچاسكەلەرىن ءبولۋ, العاشقى اسكەري دايىندىق ءپانى مۇعالىمدەرىنىڭ مارتەبەسىن ارتتىرۋ بويىنشا شارالار قابىلداندى.
پارتيا توراعاسى ۇستازدار قاۋىمىن تولعاندىرعان ماسەلەلەر دە از ەمەس ەكەنىن اتاپ ءوتتى. ولاردىڭ قاتارىندا مەكتەپ قابىرعاسىنداعى شامادان تىس قاعازباستىلىق, ءتۇرلى ءىس-شارادا كەزەكشىلىك ەتۋ, مەكتەپ چاتتارى مەن الەۋمەتتىك جەلىلەردى جۇرگىزۋ جۇكتەمەسى, سونداي-اق ۇستازعا ءتان ەمەس وزگە دە مىندەتتەر بار. سونداي-اق مۇعالىمدەردىڭ قاۋىپسىزدىگىن ارتتىرۋ, ولاردى قورلاۋ مەن پسيحولوگيالىق قىسىمنان ءتيىمدى قورعاۋ نورمالارىن كۇشەيتۋ قاجەت. مۇعالىمنىڭ ەڭ نەگىزگى مىندەتى – بالالارعا ءبىلىم بەرۋ. ۇستازداردى ودان وزگەسى الاڭداتپاۋى كەرەك. «Amanat» پارتياسى بۇل ۇستانىمدى اركەز قورعايدى. ءتىپتى, زاڭنامالىق وزگەرىستەر ەنگىزۋگە دە كۇش سالادى.
پارتيا مۇعالىمدەردى جاڭا تەحنولوگيالارمەن جانە ەڭ الدىمەن, جاساندى ينتەللەكتىمەن بەلسەندى جۇمىس ىستەۋگە دايىندايدى. اتاپ ايتقاندا, مۇعالىمدەرگە جاڭا تەحنولوگيالاردى يگەرۋگە كومەكتەسەتىن تەگىن كۋرستار مەن ادىستەمەلىك ماتەريالدارى بار تسيفرلىق پلاتفورما قۇرۋ جوسپارلانىپ وتىر. سونداي-اق العاشقى پەد-حاكاتون وتكىزىلەدى. وندا مۇعالىمدەر جي-ءدى مەكتەپ قابىرعاسىندا قولدانۋعا قاتىستى ءوز يدەيالارىن ۇسىنا الادى. ال ۇزدىك ۇستازدار شەتەلدە تاعىلىمدامادان ءوتۋ مۇمكىندىگىنە يە بولادى. سونىمەن قاتار مۇعالىمدەر تسيفرلىق كودەكستى ازىرلەۋ جۇمىسىنا تارتىلادى. وسى ارقىلى ولاردىڭ پراكتيكالىق تاجىريبەسى ءبىلىم بەرۋ ۇدەرىسىنە قاتىسۋشىلاردىڭ مۇددەسى قۇجاتتا كورىنىس تابۋىنا كومەكتەسەدى.
ءىس-شارا بارىسىندا پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ پەن وقۋ-اعارتۋ ءمينيسترى جۇلدىز سۇلەيمەنوۆا ءسوز سويلەدى. سونىمەن قاتار «مۇعالىم Talks» قاتىسۋشىلارى وزدەرىنىڭ كاسىبي تۇرعىدا قالىپتاسۋ تاريحىمەن ءبولىستى جانە ارىپتەستەرىمەن بىرگە كاسىبي سىن-تەگەۋرىندەردى تالقىلادى.
الماتى وبلىسى ۇزىناعاش اۋىلىنداعى فيزيكا ءپانىنىڭ مۇعالىمى باقىتالى داۋلەشيار وقۋشىلارمەن بىرگە قولدا بار زاتتاردان قۇرال-سايمان, ءتىپتى جاساندى قول پروتەزىن جاساپ, بالالاردى قالىپتان تىس ويلاۋعا ۇيرەتەتىنىن, عىلىمعا دەگەن سۇيىسپەنشىلىكتەرىن وياتاتىنىن ايتتى. اقمولا وبلىسى ارشالى اۋىلىنداعى تاريح ءپانىنىڭ مۇعالىمى ولگا داۆىدوۆا STEM مەن جي ادىستەرىن پايدالانۋ ارقىلى تاريح عىلىمىنا جان بىتىرۋگە بولاتىنىن كورسەتتى. تۇركىستاننان كەلگەن قازاق ءتىلى مەن ادەبيەتى ءپانىنىڭ مۇعالىمى ءاماليات ارقالىق پەداگوگتى قاجەتسىز قاعازباستىلىقتان ارىلتۋ ءۇشىن تسيفرلىق قۇرالداردى پايدالانۋدى ۇسىندى. استانا قالاسىنداعى ينفورماتيكا ءپانىنىڭ مۇعالىمى سالتانات سادىقوۆا جي-ءدى پايدالانا وتىرىپ, تاپسىرمالاردى شاعىن جوبالارعا اينالدىرۋدا. سول ارقىلى وقۋشىلار ءوز شەشىمىن نەگىزدەۋگە جانە قورعاۋعا ۇيرەنەدى.
سەمەي قارجى-ەكونوميكالىق كوللەدجى ديرەكتورىنىڭ ورىنباسارى اسحات مۇحانوۆ جۇمىسشى ماماندىقتار وزگەرىستەردىڭ العى شەبىندە تۇراتىنىن اتاپ ءوتتى. سەبەبى جي وقۋ شەبەرحانالارىندا ماڭىزدى قۇرالعا اينالۋدا. قوستانايدان كەلگەن تاريح ءپانىنىڭ مۇعالىمى ءارى ەرەكشە بالانىڭ اناسى ۇلجان بايگەنجينا قىزمەت بارىسىندا شارشاپ-شالدىعۋ ماسەلەسىنە جانە پەداگوگتەردىڭ ءوزارا قولداۋ كورسەتۋ ءىسىن كەڭەيتۋ قاجەت ەكەنىنە نازار اۋداردى. اتىراۋدان كەلگەن حيميا ءپانىنىڭ مۇعالىمى يبراھيم باقداۋلەت ۇلى وقۋشىلاردى وليمپياداعا دايىنداۋ كەزىندە جي قولدانۋدىڭ تاجىريبەلىك مىسالدارىمەن ءبولىستى. جەتىسۋ وبلىسى جىلاندى اۋىلىنداعى مامانداندىرىلعان ليتسەي-ينتەرناتىنىڭ ديرەكتورى ەلميرا راپيلوۆا الماتىدان تۋعان اۋىلىنا ورالىپ, جوعارى وقۋ ورىندارىمەن جانە دەمەۋشىلەرمەن ارىپتەستىك ورناتا وتىرىپ, ءوز كوللەدجىندە ينجەنەرلىك ءبىلىم ساپاسىن قالاي ارتتىرعانىن ايتتى.
ءىس-شارا سوڭىندا ە.قوشانوۆ بىرقاتار قاتىسۋشىعا «ۇستاز – ۇلت ايناسى» پارتيالىق ناگراداسىن تابىستادى. بيىلدان باستاپ اتالعان ناگرادامەن جىل سايىن ەلىمىزدىڭ ۇزدىك پەداگوگتەرى ماراپاتتالادى. سونداي-اق كاسىبي قىزمەتى بارىسىندا ەلگە سىڭىرگەن ەڭبەگى ءۇشىن مۇعالىمدەرگە پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ پەن وقۋ-اعارتۋ ءمينيسترى جۇلدىز سۇلەيمەنوۆا ۆەدومستۆولىق ناگرادالار تابىستادى.
