فوتو: اشىق دەرەككوزدەن
تۇزەتۋگە ساي ۇلتتىق ۋران كومپانياسىنا ۋران ءوندىرۋ بويىنشا ايرىقشا قۇقىقتار بەرىلەدى.
زاڭ جوباسى كومىرسۋتەكتى بارلاۋ مەن وندىرۋگە ينۆەستيتسيا تارتۋعا, سونداي-اق ۋران ونەركاسىبىندە مەملەكەت مۇددەسىن قورعاۋعا باعىتتالعان. اتاپ ايتقاندا, ۇلتتىق ۋران كومپانياسىنا ۋران ءوندىرۋ وپەراتسيالارىن جۇرگىزۋگە ايرىقشا قۇقىقتار بەرۋ, ۋراننىڭ پايدالى قازبالارى مەن كەن ورىندارىن بارلاۋ ءۇشىن اۋماقتاردى رەزەرۆتە ۇستاۋ مۇمكىندىگىن بەرۋ جوسپارلانىپ وتىر.
سونداي-اق, كومىرسۋتەكتەردى يگەرىلمەگەن جەرلەردە بارلاۋ مەن ءوندىرۋ كۇشەيتىلەدى.
زاڭ جوباسىنا «از زەرتتەلگەن اۋماقتار» تۇسىنىگى ەنگىزىلگەن. وسىنداي ايماقتاردا قىزمەتىن جۇزەگە اسىراتىن جەر قويناۋىن پايدالانۋشىلارعا گەولوگيالىق بارلاۋ ليتسەنزياسىنان كومىرسۋتەكتەردى بارلاۋعا جانە وندىرۋگە ارنالعان ۇلگىلىك كەلىسىمشارتقا كوشۋگە باسىم قۇقىق بەرىلەدى. ەسەسىنە, كومپانيالار كەلىسىمشارت اۋماعىنىڭ كەمىندە 30 پايىزىن قامتيتىن 2D سەيسميكالىق زەرتتەۋلەر جۇرگىزۋگە جانە العاشقى ءۇش جىل ىشىندە كەم دەگەندە ءبىر بارلاۋ ۇڭعىماسىن بۇرعىلاۋعا مىندەتتى بولادى.
بۇدان بولەك, جەرلەردى ناشار بارلانعان اۋماقتارعا جاتقىزۋ ءتارتىبى ايقىندالىپ, مۇنداي جەر قويناۋى ۋچاسكەلەرىندە كومىرسۋتەكتەردى بارلاۋعا جانە وندىرۋگە ارنالعان ۇلگىلىك كەلىسىمشارت نىسانى بەلگىلەنەدى. از زەرتتەلگەن اۋماقتاردان ءىرى كەن ورنى تابىلعان جاعدايدا جەر قويناۋىن پايدالانۋشىدان جەر قويناۋىن پايدالانۋ قۇقىعىنىڭ كەمىندە 50 پايىزىن ۇلتتىق كومىرسۋتەك كومپانياسىنا بەرۋ تالاپ ەتىلەدى. ءوز كەزەگىندە كومپانيا سالىق ەسەبىنە سۇيەنە وتىرىپ, گەولوگيالىق بارلاۋ شىعىندارىنىڭ ءبىر بولىگىن وتەۋى كەرەك.
سونداي-اق زەرتتەلمەگەن اۋماقتاردا اۋكتسيون ءراسىمىن جەڭىلدەتۋ جانە ونىڭ ۇزاقتىعىن ءبىر اي دەپ (باسقا اۋماقتاردا ەكى اي جانە ودان دا كوپ) بەلگىلەۋ ۇسىنىلادى. ەگەر اۋكتسيونعا ءبىر قاتىسۋشى جىبەرىلسە, ول جەڭىمپاز دەپ تانىلادى (باسقا اۋماقتاردا بۇل جاعدايدا اۋكتسيون وتپەدى دەپ تانىلادى). جەر قويناۋىن پايدالانۋشىلارعا كومىرسۋتەكتى بارلاۋعا جانە وندىرۋگە ارنالعان كەلىسىمشارتتاردى ولاردىڭ قولدانىلۋ مەرزىمىنىڭ العاشقى ءۇش جىلى ىشىندە ساتۋعا تىيىم سالادى. ۇلتتىق كومىرسۋتەگى كومپانيالارىنا اۋماقتى رەزەرۆتەۋگە ءۇش جىلدىق شەكتەۋ, سونداي-اق تىكەلەي كەلىسسوزدەر ارقىلى جەر قويناۋىن پايدالانۋ قۇقىعىن الۋعا بولاتىن ءۇش جىلدىق مەرزىم دە بەلگىلەنەدى.
