فوتو: kaz.inform.kz
الاياقتار تۇرلى ەلدەردە جول قوزعالىسى ەرەجەسىن بۇزعانى ءۇشىن جالعان ايىپپۇلدار جىبەرە باستاعان.
قاسكويلەر اۆتوكولىك يەلەرىنە ەلەكتروندىق پوشتا نەمەسە مەسسەندجەرلەر ارقىلى حاتتار مەن حابارلامالار جىبەرەدى. وندا جۇرگىزۋشىنىڭ جەكە دەرەكتەرى, كولىك ءنومىرى جانە «ايىپپۇلدى تولەۋگە ارنالعان» سىلتەمە قوسا جىبەرىلەدى. ءىىم وسى مازمۇنداعى حابارلامالاردىڭ فيشينگتىك شابۋىل ەكەنىن ايتىپ, ايىپپۇلداردى رەسمي سايتتاردان تەكسەرۋگە كەڭەس بەرىپ وتىر.
«ەگەر ادام بانك كارتاسىنىڭ دەرەكتەرىن ەنگىزسە, الاياقتار ونىڭ ەسەپشوتىنا قول جەتكىزەدى. كەي جاعدايلاردا سىلتەمەلەر ارقىلى جەكە دەرەكتەردى ۇرلايتىن ۆيرۋستار دا تارالادى. مۇنداي شابۋىلدار اقش پەن رەسەيدە تىركەلگەن, ال ەندى ولاردىڭ قازاقستاندا تارالۋ قاۋپى بار», دەدى الماتى قالاسى پد كيبەرقىلمىسقا قارسى كۇرەس باسقارماسىنىڭ باستىعى انەس قالدىباەۆ.
ال ايىپپۇلداردى egov.kz, qamqor.gov.kz سايتتارىندا نەمەسە بانكتەردىڭ ءموبيلدى قوسىمشالارى ارقىلى تەكسەرۋگە بولادى.
ەگەر كۇماندى حابارلاما كەلسە:
• سىلتەمەلەرگە وتپەڭىز جانە تىركەلگەن فايلداردى اشپاڭىز;
• اقپاراتتى تەك رەسمي دەرەككوزدەردەن تەكسەرىڭىز;
• ەگەر كارتا دەرەكتەرىن ەنگىزىپ قويعان بولساڭىز – دەرەۋ كارتاڭىزدى بۇعاتتاپ, بانككە جانە پوليتسياعا «102» ءنومىرى ارقىلى حابارلاسۋ كەرەك.
