فوتو: istockphoto.com
جوعارعى سوتتىڭ ءباسپاسوز قىزمەتىنىڭ حابارلاۋىنشا, 2022 جىلدىڭ ناۋرىز ايىنىڭ سوڭىندا 45 جاستاعى ايەل ورال قالاسىنداعى اۋرۋحاناعا جەدەل جۇقپالى اۋرۋ دياگنوزىمەن جەتكىزىلگەن. دارىگەرلەردىڭ ەمدەۋ شارالارىنا قاراماستان, ناۋقاستىڭ جاعدايى ناشارلاپ, ءبىر اپتادان كەيىن قايتىس بولدى.
«قايعىلى وقيعادان كەيىن مارقۇمنىڭ اناسى مەن اپكەسى وبلىستىق دەنساۋلىق ساقتاۋ باسقارماسى مەن اۋرۋحانانىڭ ۇستىنەن مورالدىق شىعىندى بىرلەسىپ ءوندىرىپ الۋدى سۇراپ, سوتقا شاعىم تۇسىرگەن. ولار تالاپ قويۋدا جاقىندارىنىڭ ولىمىنە مەديتسينا قىزمەتكەرلەرىنىڭ قىزمەتتىك مىندەتتەرىن ورىنداۋداعى سالعىرتتىعى مەن مەديتسينالىق كومەك كورسەتۋ نورمالارىن بۇزۋىنىڭ سالدارى سەبەپ بولعانىن كورسەتكەن. تالاپقويۋشىلار قىزى مەن اپكەسىنەن ايىرىلۋ ولار ءۇشىن اۋىر پسيحولوگيالىق كۇيزەلىس بولعانىن اتاپ كورسەتكەن. ءۇش جىل وتسە دە, ولار اۋىر پسيحيكالىق, فيزيكالىق جانە ەموتسيونالدىق ازاپتى باستان كەشىرىپ وتىر», دەلىنگەن حابارلامادا.
دەنساۋلىق ساقتاۋ مينيسترلىگى مەديتسينالىق جانە فارماتسەۆتيكالىق باقىلاۋ كوميتەتىنىڭ دەپارتامەنتى جۇرگىزگەن تەكسەرۋ بارىسىندا ناۋقاستى دياگنوستيكالاۋ, ەمدەۋ جانە باقىلاۋ كەزىندە بىرقاتار زاڭ بۇزۋشىلىقتار انىقتالعان. اتاپ ايتقاندا, ەمدەۋشى دارىگەر مەديتسينالىق كومەك كورسەتۋ ستاندارتتارىنان اۋىتقىپ, كاسىبي مىندەتتەرىن ءتيىستى دەڭگەيدە ورىنداماعان, سونداي-اق مەديتسينالىق قۇجاتتاردى بۇرمالاعان.
اكىمشىلىك قۇقىق بۇزۋشىلىق ىستەرى جونىندەگى مامانداندىرىلعان سوت اۋرۋحانانىڭ ءۇش دارىگەرىن ساپاسىز مەديتسينالىق قىزمەت كورسەتكەنى ءۇشىن تارتىپتىك جاۋاپكەرشىلىككە تارتىلعان.
ال باتىس قازاقستان وبلىسى بايتەرەك اۋدانىنىڭ №2 سوتى مەديتسينا قىزمەتكەرلەرىنىڭ ارەكەتى مەن ناۋقاستىڭ ءولىمى اراسىنداعى تىكەلەي سەبەپتىك بايلانىستى انىقتاپ, مارقۇمنىڭ تۋىستارى تالاپ ەتكەن مورالدىق وتەماقىنى ءىشىنارا قاناعاتتاندىردى. سوت شەشىمىمەن اۋرۋحانادان مارقۇمنىڭ اناسى مەن اپكەسىنىڭ پايداسىنا 3 ملن تەڭگەدەن استام وتەماقى وندىرىلگەن.
سوتتىڭ شەشىمى زاڭدى كۇشىنە ەندى.
