ورتالىق كوممۋنيكاتسيالار قىزمەتى الاڭىندا جاڭا زامان تالاپتارى مەن سىن-قاتەرى – تسيفرلاندىرۋ مەن جاساندى ينتەللەكتىگە, سونداي-اق قىلمىس سيپاتىنىڭ وزگەرۋىنە وراي سالادا بولىپ جاتقان وزگەرىستەر جايىندا بريفينگ ءوتتى. وندا ادىلەت مينيسترلىگى سوت ساراپتامالارى ورتالىعىنىڭ ديرەكتورى باقىتجان بايتىلەسوۆ ءسوز سويلەپ, ورتالىقتىڭ ماتەريالدىق-تەحنيكالىق بازاسىن نىعايتۋدى, يننوۆاتسيالىق ادىستەمەلەردى ازىرلەۋ مەن ۇدەرىستەردى تسيفرلىق ترانسفورماتسيالاۋدى ۇشتاستىرا وتىرىپ, ءوز قىزمەتىن جۇيەلى تۇردە جاڭعىرتۋ ماسەلەلەرى تۋرالى ايتتى.
«بيىل زەرتحانالىق جابدىقتارعا ارنالعان باعالار قايتا قارالىپ, ەسەپتەلدى. بۇل جابدىقتار ساراپشىلارعا ەسىرتكى زاتتارىنىڭ ىزدىك مولشەرلەرىن انىقتاۋعا, ولاردىڭ حيميالىق قۇرىلىمىن ءدال بەلگىلەۋگە جانە زاڭسىز نارىقتا ءجيى پايدا بولىپ جاتقان جاڭا سينتەتيكالىق ەسىرتكىلەردى دەر كەزىندە تانۋعا مۇمكىندىك بەرەدى. بۇل – زاماناۋي گازدى حروماتوگرافتار, ماسس-سپەكترومەترلەر جانە سۇيىقتىق حروماتوگرافتار. ونسىز سوت ۇدەرىستەرىندە ساپالى ءارى عىلىمي نەگىزدەلگەن قورىتىندىلاردى قامتاماسىز ەتۋ مۇمكىن ەمەس», دەدى سپيكەر.
سوت ساراپتامالارى ورتالىعى زەرتحانالىق بازانى جاڭارتۋمەن قاتار ادىستەمەلىك الەۋەتتى دامىتۋدى دا نازاردان تىس قالدىرمايدى. قازىر تسيفرلىق اكتيۆتەردىڭ اينالىمى مەن قارجى اعىندارىنا, سونداي-اق ار-نامىس پەن قادىر-قاسيەتتى قورلاۋ بەلگىلەرىنە قاتىستى نىسانداردى ساراپتامالىق زەرتتەۋ جۇرگىزۋگە ارنالعان جاڭا ادىستەمەلىك جوبالار ازىرلەنىپ جاتىر.
ولاردىڭ العاشقىسى – تسيفرلىق اكتيۆتەرگە قاتىستى ىستەردى تەرگەۋ بارىسىندا اينالىم كولەمىن بەلگىلەۋگە, سونداي-اق اقشا قاراجاتى مەن ولاردىڭ بالامالارىنىڭ اينالىمىن انىقتاۋعا ارنالعان. بۇل ادىستەمە تسيفرلاندىرۋ جاعدايىندا ەكونوميكالىق قىلمىستاردى تەرگەۋدە بىرىڭعاي ءارى عىلىمي نەگىزدەلگەن ءتاسىل ءۇشىن ماڭىزعا يە.
«مەملەكەت باسشىسى ءوز جولداۋىندا كيبەرقىلمىسقا, ونىڭ ىشىندە كيبەرالاياقتىققا قارسى بەلسەندى كۇرەس جۇرگىزۋ قاجەتتىلىگىن, سونداي-اق وسى سالادا تەرگەۋ جۇرگىزەتىن مەملەكەتتىك ورگانداردىڭ قۇزىرەتتەرىن ارتتىرۋدىڭ ماڭىزدىلىعىن ەرەكشە اتاپ ءوتتى. وسىعان وراي, جاڭا ادىستەمە زالالدى ەسەپتەۋ دالدىگىن ەداۋىر ارتتىرىپ, سونىڭ ناتيجەسىندە ىستەردى سوتتا قاراۋ كەزىندە دالەلدەمەلىك بازانى نىعايتۋعا مۇمكىندىك بەرەدى», دەدى ورتالىق باسشىسى.
ونىڭ ايتۋىنشا, ەكىنشى ادىستەمە ار-نامىس پەن قادىر-قاسيەتتى قورلاۋ بەلگىلەرىن قامتيتىن نىساندارعا سوت-ساراپتامالىق زەرتتەۋ جۇرگىزۋگە باعىتتالعان. ونىڭ ەنگىزىلۋى مۇنداي فاكتىلەردى باعالاۋدىڭ وبەكتيۆتى قۇرالىنا اينالادى. بۇل مەديا كەڭىستىكتەگى قۇقىق بۇزۋشىلىقتار كوبەيىپ تۇرعان كەزدە اسا ماڭىزدى.
سونداي-اق ب.بايتىلەسوۆ سوت-مەديتسينالىق تاجىريبەگە تسيفرلىق تەحنولوگيالار ەنگىزىلىپ جاتقانى جايىندا باياندادى. اتاپ ايتقاندا, فيليالداردىڭ بىرىندە ۆيرتۋالدى اۋتوپسيا بويىنشا قاناتقاقتى جوبا باستالعان. جوبا اياسىندا زەرتتەۋ جۇرگىزىلىپ, ءداستۇرلى اۋتوپسيا كومپيۋتەرلىك توموگرافيامەن سالىستىرىلىپ, ناتيجەلەر بىرقاتار ءولىم جاعدايى بويىنشا ساراپتامالىق قورىتىندىلاردىڭ تولىق سايكەستىگىن كورسەتكەن.
«بۇل ناتيجە وتە ماڭىزدى: ول كومپيۋتەرلىك توموگرافيانى تەك كومەكشى رەتىندە عانا ەمەس, سونىمەن قاتار سوت-مەديتسينالىق زەرتتەۋلەردىڭ بالاما ءادىسى رەتىندە دە قولدانۋعا بولاتىندىعىن كورسەتەدى. ۆيرتۋالدى اۋتوپسيا قورىتىندىلاردىڭ وبەكتيۆتىلىگى مەن سەنىمدىلىگىن ساقتاي وتىرىپ, ەڭ از ارالاسۋمەن تالداۋدى قامتاماسىز ەتەدى. بۇل, اسىرەسە ءداستۇرلى اۋتوپسيانى جۇرگىزۋ قيىن نەمەسە الەۋمەتتىك تۇرعىدان قاجەت بولعان جاعدايلاردا وتە ماڭىزدى», دەدى سپيكەر.
