«كوك شالعىن» گۇلزارى ماڭگىلىك الاۋ مەموريالدىق كەشەنى, داڭق اللەياسى, تاۋەلسىزدىك الاڭى مەن ماقتاي ساعديەۆ كوشەسىن ءوزارا تۇتاستىرىپ, بايلانىستىرادى. مەيلىنشە قىسقا مەرزىمدە اتقارىلعان جۇمىس ءوز ناتيجەسىن بەرىپ, وتىرعىزىلعان اعاشتار مەن كوپ جىلدىق جاپىراقتى ەكپەلەر, گۇلدەر ءوسىپ-ءونىپ, بەرىك ۇيلەسىم تاۋىپ كەتسە, بۇل ارا ناعىز كوڭىل توعايتىپ, كوز قىزىقتىرار دەمالىس اۋماعى بولعالى تۇر. وسى زامانعى 11, 14 مەترلىك شابدال شامداردىڭ, جاڭا بەدەرتاستاعى جايلى ورىندىقتار مەن كوزگە جىلى دەكوراتيۆتىك ساۋلەلەردىڭ اراسىندا اسىرەسە, كەشكى مەزگىلدە قىدىرىپ جۇرەتىن ادامدار كوبەيدى.
– ءبىز بۇل قوعامدىق كەڭىستىكتى قاۋىپسىزدىك تالاپتارىن ساقتاي وتىرىپ, قالا حالقى مەن قوناقتارىنىڭ دەمالىسىنا جاڭاشا سيپات بەرۋ ماقساتىندا جاسادىق. وركەنيەتتىڭ سىننان وتكەن تەحنولوگيالارىن قولداندىق. مۇنىڭ ءبارى تۇرعىندارعا قولايلى ءومىر ءسۇرۋ, دۇرىس دەمالۋ جاعدايلارىن تۋعىزۋ تۇرعىسىندا اتقارىلىپ جاتقان جۇمىستار, – دەپ اتاپ ءوتتى وبلىس اكىمى مارات احمەتجانوۆ گۇلزاردىڭ اشىلۋ سالتاناتىندا.
بۇل پىكىردى ودان ءارى دامىتا تۇسكەن وسى جوبانىڭ اۆتورى, الماتىلىق لاندشافتى ساۋلەتشى-ۋربانيست رومان شنايدەرمان:
– «كوك شالعىن» – قوعامدىق كەڭىستىكتەر جەلىسى. ول 2,5 شاقىرىم ارالىقتى قالا ورتالىعىمەن قوسىپ, جاڭا جاعالاۋعا دەيىن باراتىن بولادى. ءسويتىپ, تۇرعىندار «كوك شالعىن» بويىمەن تولىققاندى دەمالۋدىڭ پايداسى مەن تيىمدىلىگىن ءوز كوڭىل-كۇيلەرى ارقىلى بارىنشا كەڭىنەن سەزىنە تۇسەدى, – دەدى.
كەلەر جىلى جاعالاۋدىڭ ءون بويى تىڭ نىساندارمەن تولىعا تۇسۋگە ءتيىس. سارىارقا شاعىن اۋدانىندا ۋەفا ستاندارتتارىنا ساي, زاماناۋي 10 مىڭ ورىندىق ستاديوننىڭ قۇرىلىسى جوسپارلانىپ وتىر. تاياۋ بولاشاقتا 20 قاباتتى تۇرعىن ۇيلەر دە سالىنا باستايدى.
ءوڭىر باسشىسى قالا تۇرعىندارىنىڭ نازارىن جاڭا قۇرىلىس نىساندارىنا ۇقىپتىلىقپەن قاراۋ قاجەتتىلىگىنە اۋداردى. اللەيالاردا بەينەكامەرالار ورناتىلادى. قوعامدىق ءتارتىپتى بۇزۋشىلار مەن جاسالىپ جاتقان يگىلىككە نۇسقان كەلتىرۋشىلەر زاڭ جۇزىندە قاتاڭ جاۋاپكەرشىلىككە تارتىلاتىن بولادى.
جاڭا قوعامدىق كەڭىستىكتى اشۋ سالتاناتى ناعىز مەرەكەگە اينالدى. داڭق اللەياسىندا انالار كەڭەسى ساندىك-قولدانبالى ونەر كورمەسىن ۇيىمداستىردى. باتىر, اكادەميك مالىك عابدۋللين ەسكەرتكىشى تۇرعان الاڭعا باتىر مۋزەيىنىڭ كوشپەلى ەكسپوناتتارى قويىلدى. «قوعامدىق كەلىسىم» قاۋىمداستىعى مەن ەتنو-مادەني بىرلەستىكتەردىڭ وكىلدەرى دە حالىقتى وزدەرىنىڭ كوزتارتار بۇيىمدارىمەن قۋانتتى.
كوكشەتاۋ
