تەرگەۋ دەرەگىنشە, 2021, 2023 جانە 2024 جىلدارى كۇدىكتىلەر كوكشەتاۋ قالاسىندا بىرنەشە اداممەن كەزدەسۋ كەزىندە ويدان شىعارىلعان نە بولماشى سەبەپتەرمەن اقشا تالاپ ەتىپ, قورقىتقان ءارى كۇش كورسەتكەن.
ولار جابىرلەنۋشىلەردەن 5 مىڭنان 1,5 ميلليون تەڭگەگە دەيىن, ال ءبىر ادامنان قۇنى 4,5 ملن تەڭگە تۇراتىن اۆتوكولىك بەرۋدى تالاپ ەتكەن.
بارلىعى ءتورت جابىرلەنۋشى سوتتا كۋالىك بەرگەن.
سوتتا ولاردىڭ كىناسى كۋاگەرلەر مەن جابىرلەنۋشىلەردىڭ ايعاقتارىمەن, ساراپتامالارمەن, ءتىنتۋ جانە بەتتەستىرۋ حاتتامالارىمەن دالەلدەندى.
جەڭىلدەتەتىن ءمان-جاي رەتىندە سوت اعايىندىلاردىڭ كامەلەتكە تولماعان بالالارىنىڭ بارىن ەسكەرگەن.
اعايىندىلاردىڭ بىرىنە 6 جىل باس بوستاندىعىنان ايىرۋ جازاسى بەرىلدى.
ەكىنشىسىنە جانە ولاردىڭ تانىسى 6,5 جىلعا سوتتالدى.
ءبىر ايىپتالۋشىنىڭ ارەكەتتەرىندە رەتسيديۆ بەلگىلەرى بار ەكەنى انىقتالدى.
سوت ۇكىمىمەن اعايىندىلاردان جابىرلەنۋشىگە 250 مىڭ تەڭگە مورالدىق وتەماقى ءوندىرۋ تۋرالى شەشىم قابىلداندى.
سونىمەن قاتار, سوت پوليتسيا دەپارتامەنتى مەن پروكۋراتۋراعا قىلمىستىق ءىس جۇرگىزۋ زاڭناماسىنىڭ بۇزىلۋىنا جول بەرمەۋ تۋرالى جەكە قاۋلىلار جىبەردى.
سوت اكتىلەرى ازىرگە زاڭدى كۇشىنە ەنگەن جوق.
