فوتو: egemen.kz/ قىرمىزى جۇماعاليقىزى
ء«بىزدىڭ باستى ماقساتىمىز – اشىق, ادىلەتتى جانە ەڭ باستىسى, ءاربىر ازامات ءۇشىن قولجەتىمدى دەنساۋلىق ساقتاۋ جۇيەسىن قالىپتاستىرۋ. 2026 جىلدان باستاپ تۇرمىسى تومەن ازاماتتار جەرگىلىكتى بيۋدجەتتەر ەسەبىنەن مەديتسينالىق ساقتاندىرۋ جۇيەسىمەن قوسىمشا قامتىلادى. وسىنداي اۋقىمدى وزگەرىستەردى بىرلەسىپ جۇزەگە اسىرۋعا كۇش جۇمىلدىرۋ كەرەك», دەدى ولجاس بەكتەنوۆ.
ۇكىمەت باسشىسى وسى ماقساتتا دەنساۋلىق ساقتاۋ مينيسترلىگىنە ەڭبەك مينيسترلىگى جانە ءوڭىر اكىمدىكتەرىمەن بىرگە مەديتسينالىق ساقتاندىرۋدىڭ جاڭا تەتىگىن ەنگىزۋ بويىنشا ۇيلەسىمدى جۇمىس جۇرگىزۋدى تاپسىردى.
سونداي-اق ءوڭىر اكىمدىكتەرى مەن دەنساۋلىق ساقتاۋ مينيسترلىگى مەديتسينالىق كومەك ساپاسىن ارتتىرۋ بويىنشا پارمەندى شارالار قابىلداپ, ساقتاندىرۋ جۇيەسىنە جارنا تولەۋگە قاتىستى مىندەتتەمەلەردىڭ ورىندالۋىن قامتاماسىز ەتۋى قاجەت.
و.بەكتەنوۆ حالىقتىڭ الەۋمەتتىك وسال توپتارى قاتارىنداعى ازاماتتاردىڭ مۇددەلەرىنە ەرەكشە نازار اۋدارۋ كەرەكتىگىن دە اتاپ ءوتتى.
«مەديتسينالىق كومەكتىڭ قولجەتىمدىلىگى مەن ساپاسىنا, تەگىن ءدارى-دارمەكپەن قامتاماسىز ەتۋ ماسەلەسىنە قاتىستى الاڭداۋشىلىق بىلدىرگەن ازاماتتارعا دا قۇلاق اسۋ قاجەت. كەيبىر جاڭا ەرەجەلەردى ءتۇسىنۋ قيىن. سوندىقتان ءاربىر ادام مەديتسينالىق كومەك الۋ تەتىكتەرى مەن ونى جەتىلدىرۋ جۇمىستارىنان حاباردار بولۋى كەرەك. بالالارعا, زەينەتكەرلەرگە, مۇگەدەكتەر مەن ازاماتتاردىڭ باسقا دا جەڭىلدىكتى ساناتتارىنا مەديتسينالىق كومەك كورسەتۋ ءتارتىبى مەن كولەمى وزگەرىسسىز قالۋى ءتيىس», دەدى پرەمەر-مينيستر.
