سۋرەت: irkutsk.bonodono.ru
الاتاۋ باۋرايىندا 88 مەملەكەتتەن كەلگەن 842 قاتىسۋشى باق سىنادى. 11 تۋردان تۇرعان جارىس شۆەيتساريالىق جۇيەمەن ءوتتى. جەر-جاھاننىڭ اسا دارىندى جاس ورەندەرى باس قوسقان بايراقتى باسەكەدە الدىمەن اليشا بيساليەۆانىڭ (G8) باعى جاندى. شەشۋشى تۇستا چجۋ تسزياحە (قىتاي) مەن بولد-ەردەنە تسەلمەگتى (موڭعوليا) باسىپ وزعان ول باس جۇلدەنى ولجالادى.
ءوز قاتارلاستارىنىڭ بارلىعىن قاپى قالدىرعان ءادينۇر ادىلبەك (O8) تە التىننان القا تاقتى. كۇمىس پەن قولا مەدالدى فيودور سيدەلنيكوۆ (رەسەي, FIDE) پەن ۆان يۋيسيۋان (قىتاي) ەنشىلەدى. 12 جاسقا دەيىنگى ويىنشىلار سايىسىندا دانيس قۋاندىق ۇلى (O12) مەن ءالي پويراز وزدەمير (2196, تۇركيا) بىردەي ۇپاي جيناعانىمەن, قوسىمشا كورسەتكىشتەر جونىنەن قانداسىمىز قارسىلاسىنىڭ الدىن ورادى.
ءسويتىپ, ءۇش التىن يەلەنگەن ەلىمىز شاحماتشىلارى جارىس كەستەسىندە جەكە-دارا كوش باستادى. ەكىنشى, ءۇشىنشى ورىندارعا قىتاي, اقش قۇرامالارى يە بولدى. بىلتىر دا جەرلەستەرىمىز قوس التىن ولجالاپ, جالپى ەسەپتە الدارىنا جان سالماعان ەدى. بيىل سول ناتيجەنى قايتالادى.
