شاراعا ەۇۋ-دىڭ ستراتەگيالىق دامۋ جانە ينتەرناتسيونالداندىرۋ جونىندەگى پرورەكتورى دۋمان ايتماعامبەتوۆ مودەراتورلىق ەتتى.
فورۋمنىڭ نەگىزگى باعىتى – ماقساتتى قورلاردى دامىتۋ ستراتەگياسىن, ولاردىڭ تانىمالدىلىعىن ارتتىرۋ جانە قولداۋدى تالقىلاۋ, سونداي-اق ەنداۋمەنت قورلارىنىڭ قازىرگى الەمدەگى ماڭىزى مەن ءرولىن انىقتاۋ.
جيىندا الەمدىك ساراپشىلار ءبىلىم جۇيەسىنىڭ تۇراقتى دامۋىن قامتاماسىز ەتۋ ءۇشىن ەنداۋمەنت قورلارىنىڭ ءتيىمدى قىزمەتىن نىعايتۋ مەن ىلگەرىلەتۋ تاجىريبەلەرىمەن ءبولىستى.
ءىس-شارادا العاشقى بولىپ ءسوز العان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ فورۋمعا قاتىسۋشىلاردى ەلىمىزدە ماقساتتى كاپيتال قورلارى مەن ەنداۋمەنت قورلارى تۋرالى زاڭنىڭ قابىلدانۋىمەن قۇتتىقتادى. ال عىلىم جانە جوعارى ءبىلىم ۆيتسە-ءمينيسترى گۇلزات كوبەنوۆا ەلىمىزدە قازىرگى ۋاقىتتا 22 ەنداۋمەنت قورى بار ەكەنىن, ولاردىڭ 15-ءى ءبىلىم سالاسىندا جۇمىس ىستەيتىنىن, كاپيتالدىق قورى ورتاشا ەسەپپەن ءبىر ميلليارد تەڭگەدەن تومەن ەكەنىن جەتكىزدى. سونداي-اق 2029 جىلعا قاراي ەنداۋمەنت قورلارىنىڭ جالپى كاپيتاليزاتسياسىن 50 ميلليارد تەڭگەگە دەيىن جەتكىزۋ جوسپارلانعانىن ايتتى.
ميننەسوتا ۋنيۆەرسيتەتىنىڭ دامۋ جونىندەگى ديرەكتورى سيۋزان حولتەر ستراتەگيالىق قوردى دامىتۋعا ارنالعان دونورلىق پيراميدا ۇلگىسىن تانىستىرىپ, دونورلارمەن سەنىمدى قارىم-قاتىناس ورناتۋ جولىن ۇسىندى. پوتانين قايىرىمدىلىق قورىنىڭ باس ديرەكتورى وكسانا وراچەۆا رەسەيدەگى ەنداۋمەنتتەردى دامىتۋ تاجىريبەسىمەن ءبولىسىپ, مەملەكەتتىك قولداۋ مەن تانىمالدىلىقتى ارتتىرۋعا ەرەكشە نازار اۋداردى.
فورۋم بارىسىندا ميچيگان ۋنيۆەرسيتەتىنىڭ وكىلى دجون د.برانچ تۇراقتى ۋنيۆەرسيتەت ءوسۋ ستراتەگياسىن, ماسكەۋ مەملەكەتتىك حالىقارالىق قاتىناستار ينستيتۋتى (مگيمو) دامۋ قورىنىڭ ديرەكتورى مارينا پەتروۆا تۇلەكتەر مەن بيزنەس قاۋىمداستىعىن ەنداۋمەنتكە تارتۋ جولدارىن, نازارباەۆ ۋنيۆەرسيتەتىنىڭ الەۋمەتتىك دامۋ كورپوراتيۆتىك قورىنىڭ باسقارما توراعاسى سايات ءنۇسىپوۆ ەنداۋمەنت قورلارىنىڭ الەمدەگى ماڭىزى مەن ورنىن باياندادى. سونىمەن قاتار پوزنانداعى ادام ميتسكەۆيچ ۋنيۆەرسيتەتىنىڭ وكىلدەرى, «Chengwei Capital Evergreen Fund» جانە «Berik and Bayan Kaniyev Scholarship» باعدارلاماسىنىڭ ديرەكتورلارى تاجىريبەلەرى مەن ۇسىنىستارىن ورتاعا سالدى.
ازامات قۇسايىن
