فوتو: اشىق دەرەككوز
قاي وڭىرگە نەشە تۋريست بارعانى, ولار قانداي ورىنداردى ارالاپ, قىزىقتاعانى تۋرالى اقپارات ءتۋريزمدى دامىتۋدى ويلاستىرعان ءىرى كومپانيالارعا عانا ەمەس, جەكە كاسىپكەرلەرگە دە قىزىق. سەبەبى قوناقتار ءتۋريزمنىڭ قاي باعىتىن دۇرىس كورسە, ەلدەگى تۋريستىك كومپانيالار سول باعىتتا جۇمىس ىستەسە ەڭبەك ونەدى. ستاتيستيكا نەعۇرلىم ناقتى بولسا, تۋريست ءجيى باراتىن ولكەنىڭ ينفراقۇرىلىمىنا, قىزمەت كورسەتۋ ساپاسىنا سوعىرلىم ەرتە كوڭىل بولۋگە بولادى.
جۋىردا وتكەن Digital Bridge 2025 حالىقارالىق فورۋمىندا تۋريستىك اعىنداردى باقىلاۋ ءۇشىن ءموبيلدى دەرەكتەردى پايدالانۋعا ارنالعان پانەلدىك سەسسيا ءوتتى. وندا ۇلتتىق ستاتيستيكا بيۋروسىنىڭ باسشىسى ماقسات تۇرلىباەۆ پەن «Kazakh Tourism» ۇك» اق باسقارما توراعاسىنىڭ مىندەتىن اتقارۋشى دانيەل سەرجان ۇلى جاساندى ينتەللەكت پەن ءموبيلدى دەرەكتەرگە نەگىزدەلگەن تۋريستىك ستاتيستيكانىڭ جاڭا مودەلىن ەنگىزۋ تۋرالى حابارلادى. جوبانى ۇلتتىق ستاتيستيكا بيۋروسى «Kazakh Tourism» ۇك اق, دۇنيەجۇزىلىك بانك جانە پوزيتيۋم وكىلدەرىنىڭ قاتىسۋىمەن ىسكە اسىرىپ جاتىر.
تۋريستەر اعىنىن باقىلايتىن قازىرگى جۇيە تەك قوناقۇيلەردە تىركەلگەن تۋريستەردى عانا انىقتاي الادى. سونىڭ وزىندە قوناقۇيلەردىڭ بارلىعى تولىق جانە ۋاقتىلى اقپارات بەرە بەرمەيدى. سالدارىنان كەيبىر تۋريستەر ستاتيستيكاعا ەنبەيدى. ەندى ءموبيلدى دەرەكتەر ەنگىزىلگەن سوڭ, تۋريستەر تۋرالى اقپارات تولىعىپ, قوناقتاردىڭ كەلگەن-كەتكەنى ەسەپتەن تىس قالمايدى. بۇل قادام –تۋريستىك اعىنداردى نەعۇرلىم تولىق ءارى سەنىمدى تۇردە كورسەتۋدى قامتاماسىز ەتەدى. سونداي-اق تانىمال مارشرۋتتاردى, ماۋسىمدىق اۋىتقۋلاردى جانە باعىتتاردى انىقتايدى.
الدىن الا تالداۋ ناتيجەلەرى ۇيالى بايلانىس وپەراتورىنىڭ دەرەكتەرى رەسمي ستاتيستيكادان ايتارلىقتاي اسىپ تۇسەتىنىن كورسەتتى. مىسالى, الاكول كۋرورتتىق ايماعىندا ءموبيلدى دەرەكتەر 658 مىڭ قوناقتى تىركەگەن. بۇل رەسمي كورسەتكىشتەردەن 2,4 ەسە كوپ. بالقاشتا دا جاعداي شامامەن وسىنداي. قوناق ۇيلەردە 135 مىڭ قوناق تۇنەسە, جاڭادان ەنگىزىلەتىن ۇيالى بايلانىس دەرەكتەرى بويىنشا 534 مىڭنان استام تۋريست كەلىپ, قوناق سانى 4 ەسە كوپ تىركەلگەن. بۋرابايدا ورنالاستىرۋ ورىندارى بويىنشا 346 مىڭ تۋريست تىركەلسە, ۇيالى بايلانىس دەرەكتەرى 1,5 ميلليون ءتۋريستى قامتىعان, ياعني بەس ەسە كوپ دەگەن ءسوز. وسىلايشا, ەلىمىز تمد ەلدەرى اراسىندا تۋريزم ستاتيستيكاسىنا جي پەن ءموبيلدى دەرەكتەردى بىرىكتىرگەن ءبىرىنشى مەملەكەت اتانىپ وتىر. ال تاجىريبە قانشالىقتى ۇتىمدى بولادى دەگەن سۇراقتىڭ جاۋابى ۋاقىتتىڭ ەنشىسىندە.
