3 قازان كۇنى الەۋمەتتىك جەلىدە كۇشتىك قۇرىلىمعا ۇقساس فورماداعى ەر ادامنىڭ جەدەل جاردەم كولىگىندە توبەلەس شىعارعان ۆيدەوسى تارادى. جانىندا جۇرگەن پوليتسيا قىزمەتكەرلەرى ەر ادامدى مەديتسينا قىزمەتكەرلەرى تەكسەرۋ كەرەگىن ايتىپ, جاعا جىرتىسۋعا ۇمتىلعان ەر ادامدى تىنىشتاندىرۋعا تىرىستى.
- 2 قازان كۇنى بالىقشى ىقشاماۋدانىندا ادامدار Toyota Highlander كولىگىنىڭ ىشىندە ەسىنەن ايىرىلعانداي كۇيدە وتىرعان ەكى ەر ادامدى بايقاپ قالىپ, “103”-كە حابارلاسقان. ەكەۋى دە قاتتى ماس. ءبىرى پوليتسياعا تاپسىرىلدى, ال ەكىنشىسى — 29 جاستاعى اتىراۋلىق اياعىنان جاراقات العاندىقتان جەدەل جاردەم كولىگىنە جەتكىزىلدى. الايدا ول جەدەل جاردەم ىشىندە قارسىلىق كورسەتىپ, توبەلەس شىعارعان. ول پوليتسيا فورماسىنا ۇقسايتىن كامۋفلياج كيگەن, – دەلىنگەن جازبادا.
پوليتسيا دەپارتامەنتى ەر ادامنىڭ قۇقىق قورعاۋ ورگاندارىنا ەشقانداي قاتىسى جوق ەكەنىن ناقتىلادى.
- قىلمىستىق كودەكستىڭ 346-بابى (كولىك قۇرالىن باسقارۋ قۇقىعىنان ايىرىلعان ادامنىڭ كولىك جۇرگىزۋى) بويىنشا قىلمىستىق ءىس قوزعالدى جانە اكىمشىلىك قۇقىق بۇزۋشىلىق تۋرالى كودەكستىڭ 675-بابى (فورمالىق كيىمدى جانە ارنايى كيىمدى زاڭسىز كيۋ) بويىنشا حاتتاما تولتىرىلدى, – دەپ مالىمدەدى پوليتسيا.
ءىس ماتەريالدارى سوتقا جىبەرىلدى.
