ول «جىلىويگاز» جشس-دا ەڭبەكتى قورعاۋ جانە قاۋىپسىزدىك تەحنيكاسى جونىندەگى ينجەنەر بولىپ قىزمەت ەتەدى. مىندەتى – وندىرىستەگى قاۋىپسىزدىكتىڭ ساقتالۋىن قاداعالاۋ. جوعارى ءبىلىمدى جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنەن العان. كەيىن تەحنيكا جانە تەحنولوگيا سالاسىنىڭ ماگيسترى اتاندى.
ۋنيۆەرسيتەتتەگى وقۋىن اياقتاعاننان كەيىن ۇلكەن ەڭبەك جولىن وسى سەرىكتەستىكتە باستادى. جاس مامان بىردەن تاباندىلىعىمەن, جۇمىستى جاۋاپكەرشىلىكپەن اتقاراتىن ىسكەرلىگىمەن ەرەكشەلەندى. اۋدانداعى ەلدى مەكەندەردى «كوگىلدىر وتىنمەن» قامتيتىن سەرىكتەستىك باسشىلارى جاس مامانعا سەنىم ارتىپ, ەڭبەكتى قورعاۋ جانە قاۋىپسىزدىك تەحنيكاسى جونىندەگى ينجەنەر مىندەتىن جۇكتەدى.
«ماعان جۇكتەلگەن مىندەت تابيعي گازدى تاسىمالداۋمەن بايلانىستى بولعاندىقتان, جۇمىسىمدى قاۋىپسىزدىك تەحنيكاسىن تەكسەرۋدەن باستايمىن. جابدىقتاردى مۇقيات تەكسەرىپ, جۇمىس ورىندارىنىڭ جاي-كۇيىن باعالايمىز. سەبەبى اپاتتىڭ سالدارىن جويۋدان گورى ونىڭ الدىن الۋ الدەقايدا جەڭىل. باستى قاعيدات – اپاتتى بولدىرماۋ», دەيدى ا.امانجولوۆ.
جاس ينجەنەردىڭ ايتۋىنشا, اتقاراتىن جۇمىسى سان الۋان. بىرىنشىدەن, گاز قۇبىرىندا اپاتتىق جاعدايلاردى بولدىرماۋ جونىندەگى ءىس-شارالاردى جۇرگىزەدى. ەكىنشىدەن, جەكە قورعانۋ قۇرالدارىنىڭ جارامدىلىعى مەن قولدانۋدى باقىلايدى. ۇشىنشىدەن, سەرىكتەستىك قىزمەتكەرلەرىن وقىتۋدى ۇيىمداستىرادى. تورتىنشىدەن, بەس جىل سايىن ءبىر رەت مامانداردى اتتەستاتتاۋدان وتكىزەدى.
«ۇجىم – مەنىڭ ەكىنشى ءۇيىم. جۇمىس ىستەگەنىمە سونشالىقتى كوپ ۋاقىت وتپەسە دە مۇنى جاقسى ءتۇسىندىم. ويتكەنى تولىمدى تاجىريبەسىن بولىسۋدەن تارتىنبايتىن تالىمگەرلەرمەن كوزقاراسىمىز ورتاق, ماقساتىمىز ءبىر», دەيدى ا.امانجولوۆ.
ول ۇجىمداعى ءتۇرلى ءىس-شارانى ۇيىمداستىرۋشىلاردىڭ بەل ورتاسىندا جۇرەدى. مەرەكەلىك كەشتەردى جۇرگىزەدى. قوعامدىق جۇمىستان باس تارتپايدى. سپورتتىق جارىستارعا قاتىسادى. اپتا سايىن «تازا قازاقستان» اكتسياسى اياسىندا وتەتىن سەنبىلىكتە قورشاعان ورتانىڭ تازالىعىن ساقتاۋعا اتسالىسادى.
«بالا كۇننەن بەرگى ءحوببيىم – اتپەن سەرۋەندەۋ. بۇل رۋحىڭدى وياتادى, شىدامدىلىققا جەتەلەيدى. التى جاسىمنان جىلقىعا قالاي كۇتىم جاساۋدى ۇيرەندىم. جۇمىستان قولىم بوساعان كەزدە اكەم, اعالارىممەن بىرگە سەرۋەندەيمىز. اتقا مىنگەندە قانات بىتكەندەي كورىنەدى», دەيدى جاس ينجەنەر.
ونىڭ كۇندەلىكتى قاعيداسى – ۇيرەنۋ, ۇيرەتۋ, الاڭسىز, قاۋىپسىز ءومىر ءسۇرۋ. بۇل اسىرەسە جاستاردىڭ جادىنا مىقتاپ تۇيەتىن ۇستانىم بولۋى كەرەك. جاقىندا ا.امانجولوۆ «ەڭبەك جولى» رەسپۋبليكالىق بايقاۋىنىڭ وبلىستىق كەزەڭىندە «وندىرىستەگى ۇزدىك جاس مامان» اتالىمىندا جەڭىمپاز اتاندى. مۇنى ءوزىنىڭ عانا ەمەس, ۇجىمنىڭ جەڭىسى دەپ بىلەدى.
اتىراۋ وبلىسى
