1957 جىلى اندوررادا قۇرىلعان PGI تاۋ شاڭعىسى كۋرورتتارىن ستراتەگيالىق دامىتۋعا, ماركەتينگ جۇرگىزۋگە, جوبالاردى تولىق باسقارۋعا جانە كەڭەس بەرۋگە ماماندانعان. وسى ۋاقىت ىشىندە كومپانيا جيىرمادان استام ەلدە 120-دان استام كۋرورتتى, سونىڭ ىشىندە جىل بويى جۇمىس ىستەيتىن دەمالىس ايماقتارىن جۇزەگە اسىرۋعا اتسالىسقان.
PGI-ءدىڭ تاۋ شاڭعىسى ينفراقۇرىلىمىن جوبالاۋ جانە باسقارۋ سالاسىنداعى حالىقارالىق ساراپتاماسى جوبالاردىڭ تولىق ومىرلىك تسيكلىن قامتيدى. كومپانيا فرانتسيا, يسپانيا, اندوررا سياقتى ەلدەردە ەڭ قاتاڭ ەكولوگيالىق ستاندارتتاردى ساقتاي وتىرىپ تابىستى جوبالار ىسكە اسىرعان. ەندى سول تاجىريبەنى قازاقستاندا قولدانۋدى كوزدەپ وتىر.
Almaty Superski جوباسى الماتى تاۋ كلاستەرىنىڭ (اتك) نەگىزگى بولىگى ءارى ءوڭىر ءتۋريزمىنىڭ باستى درايۆەرى رەتىندە قاراستىرىلۋدا. جوبا اياسىندا شامامەن 5 مىڭ جاڭا جۇمىس ورنى قۇرىلسا, جالپى تاۋ كلاستەرى بويىنشا بۇل كورسەتكىش 10 مىڭنان اسادى دەپ كۇتىلۋدە. سونىمەن بىرگە سالىق تۇسىمدەرى ۇلعايىپ, تۋريستىك اعىم ارتادى, ال الماتىنىڭ حالىقارالىق دەڭگەيدە جىل بويعى بەلسەندى دەمالىس ورتالىعى رەتىندەگى ءيميدجى نىعايادى.
PGI-ءدىڭ مىندەتتەرىنە جوبالاۋ-ىزدەستىرۋ جۇمىستارىن ۇيلەستىرۋ كىرەدى. بۇل رەتتە كومپانيا ۇزدىك حالىقارالىق تاجىريبەلەر مەن قازاقستان رەسپۋبليكاسىنىڭ قولدانىستاعى نورماتيۆتىك تالاپتارىنىڭ ورىندالۋىن قاتاڭ قاداعالايدى. جوسپارلاۋ بارىسىندا اۋماقتى بارىنشا ءتيىمدى پايدالانۋ كوزدەلىپ, تەك تاۋ شاڭعىسى, جاياۋ سەرۋەندەۋ, تاۋ ۆەلوسيپەدى سياقتى بەلسەندى تۋريزم باعىتتارىنا قاجەتتى ينفراقۇرىلىم قاراستىرىلادى.
