ونىڭ ايتۋىنشا, كونكۋرسقا قىزىعۋشىلىق وتە جوعارى بولدى.
«بۇگىنگى كۇنى 20 مىڭنان استام ءوتىنىم ءتۇستى. ازاماتتارىمىزدىڭ بۇل بايقاۋعا قاتىسۋعا دەگەن ىقىلاسى زور. ءبىز الدىن الا تالداۋ جۇرگىزدىك. ۇسىنىستار نەگىزىنەن ءۇش بلوكقا بولىنەدى», دەدى ساتقاليەۆ ماجىلىستەگى بريفينگتە.
ءبىرىنشى بلوك گەوگرافيالىق اتاۋلارعا بايلانىستى. قازاقستاندىقتار بالقاش, ىلە, ۇلكەن (ستانتسيا سالىناتىن اۋىلدىڭ اتاۋىنا سايكەس), سونداي-اق مويىنقۇم اەس اتاۋلارىن ۇسىنعان.
ەكىنشى بلوك – تانىمال تۇلعالاردىڭ ەسىمدەرى. ولاردىڭ ىشىندە اكادەميك شافيك چوكين, اقىن-اعارتۋشى اباي قۇنانباەۆ, عالىم قانىش ساتباەۆ بار.
ءۇشىنشى بلوك تەحنيكالىق جانە ەنەرگەتيكالىق تاقىرىپتارعا نەگىزدەلگەن. مۇندا «جارىق», «قۋات», «بەيبىت اتوم», «ەنەرگيا» سەكىلدى نۇسقالار ۇسىنىلعان.
«ۇسىنىستاردى تالداۋ جۇمىسىن ءتيىستى كوميسسيا جالعاستىرادى. ونىڭ قۇرامىنا ەتنوگرافتار, يستوريوگرافتار, ۋران ونەركاسىبى وكىلدەرى, بلوگەرلەر مەن قوعام بەلسەندىلەرى كىرگەن. بارلىق ۇسىنىستار جينالعان سوڭ اتاۋلار تالقىلاناتىن بولادى», دەپ تولىقتىردى اگەنتتىك باسشىسى.
