جوبالاردىڭ اراسىندا رۋنا جازۋىن optical مەن intelligent character recognition ارقىلى تانۋ جانە تالداۋ باعدارلاماسى بار. جوبانىڭ نەگىزگى ماقساتى – كۇلتەگىن ەسكەرتكىشىندەگى كونە تۇركى رۋنا جازۋلارىن زاماناۋي تسيفرلىق تەحنولوگيالار ارقىلى تالداۋ. بۇل ءۇشىن وپتيكالىق تاڭبالاردى تانۋ (OCR) الگوريتمى نەگىزىندە ارنايى مودەل قۇرىلعان.
«الگوريتمدى قۇراستىرۋ ءۇشىن ءبىز الدىمەن رۋنا ءالفاۆيتىنىڭ كىتاپحاناسىن جاساقتادىق. بۇل – بارلىق تاڭبالار مەن ولاردىڭ نۇسقالارىن قامتيتىن بازا. كەيىن ەسكەرتكىشتەن تۇسىرىلگەن سۋرەت نەمەسە PDF فايل ەنگىزىپ, جۇيەنى وقىتتىق. وسىلايشا جۇيە تاڭبالاردىڭ جالپى سانىن, جيىلىگىن جانە تارالۋىن ەسەپتەپ بەرەدى. وسى ارقىلى ءماتىن قۇرىلىمىن ستاتيستيكالىق تۇرعىدان تالداۋعا بولادى», دەيدى جوبا اۆتورلارى.
جوبانىڭ عىلىمي جەتەكشىسى كۇلشات اقانوۆا الگوريتمدى جەتىلدىرۋ ءۇشىن جاساندى ينتەللەكت پەن نەيروجەلىلەر قولدانىلعانىن ايتتى. ماشينالىق وقىتۋ ادىستەرى ارقىلى جۇيە رۋنا جازۋىن تانىپ ۇيرەنگەن.
«بۇل جۇيەنى تەك رۋنا جازۋىن وقۋدا ەمەس, باسقا دا سالالاردا قولدانۋعا بولادى. ماسەلەن, اۆتوكولىكتىڭ مەملەكەتتىك ءنومىرىن تانۋ جۇيەسىندە, ۋنيۆەرسيتەتكە كىرەردەگى Face ID سەكىلدى بيومەتريالىق باقىلاۋدا, ۆيدەوباقىلاۋ كەزىندە اۋديتورياداعى ادام سانىن انىقتاۋ جانە جىنىسىنا قاراي جىكتەۋ, قوعامدىق قاۋىپسىزدىكتى باقىلاۋ, ينتەللەكتۋالدى جۇيەلەر قۇرۋ سەكىلدى باعىتتاردا پايدالانا بەرۋگە بولادى. تەك الگوريتمدى وقىتسا, بولعانى», دەيدى ك. اقانوۆا.
كورمەدە بۇدان وزگە دە ءتۇرلى جاساندى ينتەللەكت نەگىزىندە جاسالعان جوبالار تانىستىرىلدى.
ءدارىس وقيتىن جي-اۆاتار - ونلاين وقىتۋدىڭ مۇمكىندىكتەرىن كەڭەيتەتىن يننوۆاتسيالىق قۇرال.
ەۋرازيا ۇلتتىق ۋنيۆەرسيتەتىنىڭ عالىمدارى ونلاين وقىتۋداعى باستى ماسەلەنىڭ ءبىرىن شەشۋ ماقساتىندا جاساعان. قازىرگى كەزدە ستۋدەنتتەردىڭ ەكران الدىنداعى نازارىن ۇزاق ۋاقىت بويى ۇستاپ تۇرۋ – ونلاين ءبىلىم بەرۋدەگى ۇلكەن قيىندىقتاردىڭ ءبىرى. ءداستۇرلى بەينەماتەريالداردا ەموتسيا مەن شىنايى اسەردىڭ جەتىسپەۋى ستۋدەنتتەردىڭ قىزىعۋشىلىعىن تومەندەتەدى.
جي-اۆاتاردىڭ ەرەكشەلىگى – ول تەك ءماتىندى وقىپ قانا قويماي, ەموتسيامەن جەتكىزەدى, قازاق ءتىلىنىڭ سينتاكسيستىك ەرەكشەلىكتەرىنە ساي ىم-يشارا مەن ميميكانى بەينەلەيدى. بۇل ستۋدەنتكە شىنايى ۇستازبەن سويلەسىپ وتىرعانداي اسەر قالدىرادى. بۇل تەحنولوگيا ونلاين كۋرستاردى, مۋلتيمەديالىق وقۋ باعدارلامالارىن دايىنداۋدا ءتيىمدى قۇرال بولا الادى. ءتىپتى كەي جاعدايدا ول مۇعالىمدى تولىق الماستىرىپ, وقۋ بارىسىن اۆتوماتتاندىرۋعا مۇمكىندىك بەرەدى.
