بەيسەنباي تاجىباەۆ جاڭا قىزمەتكە تاعايىندالدى

بۇل تۋرالى بەيسەنباي تاجىباەۆتىڭ ءوزى الەۋمەتتىك جەلىدەگى پاراقشاسىندا حابارلادى. 

ول تۇركىستان وڭىرىندە قوعامدىق-الەۋمەتتىك سالالارعا جەتەكشىلىك جاساعان. بەيسەنباي تاجىباەۆ  تۇركىستان وبلىسى اكىمىنىڭ ورىنباسارى بولعان تۇستا ەڭسەرىلگەن اۋقىمدى شارالاردى قورىتىندىلادى. 

ء«بىلىم سالاسى بويىنشا ۇنەمدەلگەن قاراجات ەسەبىنەن بىلتىر 200 مەكتەپ جوندەۋدەن ءوتىپ, 128 مەكتەپتىڭ جىلۋ قازاندىعى گازعا اۋىستىرىلدى. بيىل 100 مەكتەپكە جوندەۋ جۇرگىزىلدى. ەكى جىلدىڭ ىشىندە 400-دەن استام ءبىلىم ۇياسىنا قاراجات ءبولدىرتىپ, رەتتەدىك. «كەلەشەك مەكتەپتەرى» ۇلتتىق جوباسى اياسىنداعى 29 جاڭا مەكتەپ ءبىلىم ينفرا قۇرىلىمىنا ۇلكەن سەرپىلىس اكەلدى. قازىر وبلىستا ءۇش اۋىسىمدى 1, اپاتتى 1 مەكتەپ عانا قالدى. ەكەۋىنىڭ دە قۇرىلىسى قولعا الىندى, كەلەر جىلى بۇل ماسەلەگە نۇكتە قويىلادى.

بالاباقشا ماسەلەسىن ۆاۋچەر ارقىلى تۇبەگەيلى وڭتايلى شەشۋگە قول جەتكىزدىك. ءار جىل سايىن 8 مىڭداي بوس ورىندى انىقتاپ, قىسقارتىپ, كەزەكتە تۇرعان بالالاردىڭ ورنالاسۋىنا جول اشتىق. رەسپۋبليكا كولەمىندە بالاباقشامەن قامتۋ 99,6%-عا جەتىپ, جوعارى ەڭ جوعارعى كورسەتكىشتى يەلەندىك. الەۋمەتتىك سالادا «سامعاۋ» جانە «شۇعىلا» وڭالتۋ ورتالىقتارى اشىلدى. تاياۋدا جاڭا «ارداگەرلەر ءۇيى» مەن «قامقورلىق» ورتالىعى پايدالانۋعا بەرىلەدى. بىلتىر شالعاي اۋىلداردا 55 مەديتسينالىق نىسان سالىندى. بيىل تاعى 32-ءى بوي كوتەرۋدە. 10-نان استام اۋراحاناعا كۇردەلى جوندەۋ جۇرگىزىلدى», دەپ جازدى بەيسەنباي تاجىباەۆ.

سونداي-اق  بەيسەنباي داۋلەت ۇلى ءوز جازباسىندا «تۇركىستان قالاسىنىڭ ەرەكشە مارتەبەسى تۋرالى» زاڭنىڭ جۇمىس توبىندا 1,5 جىل ەڭبەك ەتكەنىنە نازار اۋداردى. 

جاڭادان تاعايىندالعان پرەزيدەنت اكىمشىلىگىنىڭ مەملەكەتتىك ينسپەكتورى ەڭبەك جولىن «شىمكەنت كەلبەتى», «پانوراما شىمكەنتا» گازەتتەرىندە باستاپ, ءار جىلدارى شىمكەنت قالاسى ءباسپاسوز قىزمەتىنىڭ باسشىسى, تۇركىستان وبلىستىق ىشكى ساياسات باسقارماسىنىڭ باسشىسى,  2019-2022 جىلدارى «Nur Otan» پارتياسى تۇركىستان وبلىستىق فيليالى توراعاسىنىڭ ءبىرىنشى ورىنباسارى, 2022 جىلدىڭ ناۋرىز ايىنان باستاپ وسى كۇنگە دەيىن «AMANAT» پارتياسى تۇركىستان وبلىستىق فيليالىنىڭ اتقارۋشى حاتشىسى لاۋازىمىن اتقارىپ كەلدى. سونداي-اق 2020 جىلدان تۇركىستان وبلىستىق ءماسليحاتىنىڭ VII شاقىرىلىمداعى دەپۋتاتى بولدى. جوعارىدا اتاپ وتكەنىمىزدەي كەيىنگى ءۇش جىلدا تۇركىستان وبلىسى اكىمىنىڭ ورىنباسارى قىزمەتىن اتقاردى.