فوتو: ۇكىمەت
كاسكاعا ورناتىلعان كامەرا جاساندى ينتەللەكتپەن ينتەگراتسيالانىپ, ديناميك جانە ميكروفونمەن جابدىقتالعان. وسى مۇمكىندىك شەڭبەرىندە «اقىلدى كاسكا» ناقتى ۋاقىت رەجيمىندە جۇمىسشىنىڭ بارلىق ءىس-ارەكەتىن مەنەدجەرگە حابارلاپ وتىرادى. ەكى جاقتى بايلانىس ورناتۋعا دا مۇمكىندىك قاراستىرىلعان. وندىرىستەگى لوكاليزاتسيا دەڭگەيى 63%-عا جەتەتىن قۇرىلعى ورنالاسقان جەردى باقىلاۋعا ارنالعان GPS مودۋلىمەن جابدىقتالعان جانە Wi-Fi ءارى ۇيالى بايلانىس ارقىلى جۇمىس ىستەيدى.
تەحنيكالىق «كورۋدى» قولدانا وتىرىپ, جاساندى ينتەللەكت كامەرادان بەينە اعىنىن تالدايدى جانە قاۋىپسىزدىك ەرەجەلەرى بۇزىلسا اۆتوماتتى تۇردە انىقتايدى.
«ەگەر قىزمەتكەر كاسكاسىز, قولعاپسىز نەمەسە جۇمىس كيىمىنسىز جۇمىس ىستەسە, جۇيە ونى جازىپ الادى دا دەرەۋ ديسپەتچەرگە حابارلاما جىبەرەدى. بۇل جۇيە جۇمىس ورىندارىنداعى قاۋىپسىزدىكتى باقىلاۋعا, ەڭبەك ونىمدىلىگىن ارتتىرۋعا, ءوندىرىس مادەنيەتىن جاقسارتۋعا مۇمكىندىك بەرەدى جانە قىزمەتكەرلەر مەن باسشىلىق اراسىنداعى بايلانىستى جەڭىلدەتەدى», دەدى كومپانيا ديرەكتورى ساكەن سادىقوۆ.
ءوندىرۋشى كومپانيا جاقىن ارادا تولىق ينتەگراتسيالانعان كاسكا شىعارۋدى جولعا قويىپ, ناقتى ۋاقىت رەجيمىندە وندىرىستىك وپەراتسيالاردى ورىنداۋ كەزىندە قىزمەتكەرلەرگە كەڭەس بەرە الاتىن داۋىستىق كومەكشىنى ازىرلەۋدى جوسپارلاپ وتىر.
