مامانداردىڭ ايتۋىنشا, «جانۇيا» ورتالىقتارىنىڭ باستى مىندەتى – ومىرلىك قيىندىققا تاپ بولعان وتباسىلارعا جان-جاقتى كومەك كورسەتۋ. مۇندا تۇرعىندار تەگىن قۇقىقتىق, پسيحولوگيالىق جانە الەۋمەتتىك كەڭەس الا الادى. ارنايى دايىندىقتان وتكەن زاڭگەرلەر مەن پسيحولوگتار, الەۋمەتتىك قىزمەتكەرلەر ازاماتتاردىڭ ماسەلەلەرىن شەشۋگە بارىنشا جاردەمدەسۋدە.
جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەرمەك ميزامباەۆتىڭ سوزىنشە, مۇنداي ورتالىقتاردىڭ اشىلۋى – وبلىستاعى وتباسىلاردىڭ بولاشاعىنا جاسالعان ناقتى قولداۋ.
– ءبىزدىڭ ماقساتىمىز تەك كەڭەس بەرۋمەن شەكتەلمەيدى. جۇمىسقا ورنالاستىرۋ, قۇقىقتىق قورعاۋ, پسيحولوگيالىق دەمەۋ كورسەتۋ – بارلىعى قامتىلعان. بۇل ورتالىقتار حالىققا شىنايى كومەك كورسەتەتىن ورتاعا اينالادى, – دەدى ول.
جەرگىلىكتى تۇرعىندار دا جاڭا باستامانى قۋانا قابىلداۋدا. جانسۇگىروۆ اۋىلىنىڭ تۇرعىنى, كوپ بالالى انا ماريام دۇيسەنبينا:
– بۇرىن مۇنداي قىزمەتكە قول جەتكىزۋ قيىن ەدى. ەندى مامانداردىڭ كومەگىن كەز كەلگەن ۋاقىتتا, تەگىن الۋعا مۇمكىندىك بار. بۇل ءبىز ءۇشىن ۇلكەن دەمەۋ, – دەپ ريزاشىلىعىن ءبىلدىردى.
ايتا كەتەيىك, 2025 جىلى تالدىقورعان قالاسىندا دا جاڭا ورتالىق اشىلماق. قازىرگى تاڭدا «جانۇيا» جوباسى وبلىستىڭ توعىز قالا مەن اۋدانىن قامتىپ وتىر. بيىلعى جىلدىڭ وزىندە 212 وتباسىنان 570-تەن استام ادام ءتۇرلى باعىتتاعى قولداۋعا جۇگىنگەن.
