سالتاناتتى ءىس-شاراعا New York Film Academy پرەزيدەنتى جانە باس اتقارۋشى ديرەكتورى مايكل يانگ, قر عىلىم جانە جوعارى ءبىلىم ءمينيسترى ساياسات نۇربەك, الماتى وبلىسىنىڭ اكىمى مارات سۇلتانعازيەۆ, اقش-تىڭ رەسمي وكىلدەرى, سونداي-اق كينو جانە مەديا يندۋسترياسىنىڭ قايراتكەرلەرى قاتىستى.
اشىلۋ ءراسىمىنىڭ اتموسفەراسى كينەماتوگرافيالىق ستيلدە ۇيىمداستىرىلىپ, قوناقتاردى ەرەكشە «دۋبل ءتۇسىرۋ» قويىلىمى قارسى الدى. سالتانات بارىسىندا ستۋدەنتتەر ونەر كورسەتىپ, اقش-تىڭ الماتىداعى باس كونسۋلى ميشەل ەركين جاڭا وقۋ ورنىنىڭ مادەني جانە شىعارماشىلىق ءمانىن اتاپ ءوتتى. قوناقتارعا كامپۋستىڭ ينفراقۇرىلىمى – كىتاپحانا, ءدارىس زالدارى, دىبىس جازۋ جانە مونتاجداۋ ستۋديالارى, سونداي-اق Dala Edge كرەاتيۆتى پاركى كورسەتىلدى.
ستۋدەنتتەر مەن قاتىسۋشىلار ءۇشىن حالىقارالىق مامانداردىڭ شەبەرلىك ساباقتارى وتكىزىلدى: NYFA رەجيسسەرى ءارى وقىتۋشىسى روب پەتري, اكتەر جانە يمپروۆيزاتسيا شەبەرى مارك موچابي, AR جانە ويىن تەحنولوگيالارى سالاسىنىڭ مامانى كەۆين كەيتون, پروديۋسەر ءارى رەجيسسەر مايكل حسيۋە, كليپمەيكەر جانە كينورەجيسسەر لادو كۆاتانيا, قازاقستاندىق كينوپروديۋسەر قۋانىش بەيسەك, گولليۆۋد ستسەناريسى گۇلجان توكتوگۇل, رەجيسسەر جانە Unreal Engine مامانى بولات اقنازاروۆ, ۆيزۋالدى ەففەكتىلەر بويىنشا ساراپشى دەنيس ۆەجنوۆەتس, ستسەناريستەر سانات شاپاشوۆ پەن سەرگەي ليتوۆچەنكو, سونداي-اق NYFA اكتەرى ءارى وقىتۋشىسى تودد برۋنو ءدارىس وقىدى.
ايتۋلى شارا سوڭىندا «CIS MEDIA MARKET TOMORROW: CHALLENGES, FOCUS, COMMUNITY» اتتى پانەلدىك تالقىلاۋ ءوتىپ, وندا ايماقتىق مەديانارىقتىڭ دامۋ بولاشاعى ءسوز بولدى.
NYFA پرەزيدەنتى مايكل يانگ ءوز سوزىندە:
ء«بىز New York Film Academy-ءدىڭ قازاقستاندا اشىلعانىنا ماقتان ەتەمىز. بۇل جاي عانا ءبىلىم بەرۋ جوباسى ەمەس, ايماق تالانتتارىن بىرىكتىرىپ, ولاردى الەمدىك كينو يندۋسترياسىنا الىپ شىعاتىن الاڭ», – دەدى.
ال, الماتى وبلىسىنىڭ اكىمى مارات سۇلتانعازيەۆ:
«جاڭا ءبىلىم ورداسى – مەملەكەت باسشىسىنىڭ ەلىمىزدە جەتەكشى الەمدىك ۋنيۆەرسيتەتتەردىڭ فيليالدارىن اشۋ جونىندەگى تاپسىرماسىنا سايكەس جۇزەگە اسىرىلىپ وتىرعان جوبا. بۇل – ءبىلىم بەرۋ مەن كرەاتيۆتى يندۋستريانىڭ دامۋىنا قۋاتتى سەرپىن بەرەتىن, شىعارماشىل جاستارعا جاڭا مۇمكىندىكتەر اشاتىن ماڭىزدى قادام. الماتى وبلىسى تابيعات سۇلۋلىعىمەن عانا ەمەس, باي مادەني مۇراسىمەن دە ەرەكشەلەنەدى. بۇگىندە وبلىستا 2 ميلليوننان استام تۇرعىن بار, ولاردىڭ 30 پايىزدان استامىن جاستار قۇرايدى. بۇل – جاڭا ءبىلىم بەرۋ جوبالارى مەن شىعارماشىلىق الاڭدارعا جوعارى سۇرانىس بار ەكەنىن كورسەتەدى», – دەي كەلىپ, العاشقى ستۋدەنتتەردى قۋانىشتارىمەن قۇتتىقتادى.
اكادەميانىڭ اشىلۋى ءوڭىردى مادەني ءارى تەحنولوگيالىق ورتالىققا اينالدىرىپ, قازاقستاننان عانا ەمەس, شەتەلدەن دە دارىندى ستۋدەنتتەردى تارتۋعا ىقپال ەتپەك.
New York Film Academy Kazakhstan – كينو, مەديا جانە كرەاتيۆتى يندۋستريا سالاسىندا بىلىكتى مامانداردى دايارلايتىن ءىرى ءبىلىم ورداسىنا اينالىپ, ايماق پەن ەلدىڭ وركەندەۋىنە ىقپال ەتەرىنە زور سەنىم ءبىلدىردى.
الماتى وبلىسى.
