بەيىمبەت انەلوۆ
الدىمەن ۇزاق جىلدان بەرى قالا تۇرعىندارىنا قىزمەت ەتىپ كەلە جاتقان «كوكشەتاۋ سۋ ارناسى» كاسىپورنىندا بولدىق. كاسىپورىن تۇرعىن ۇيلەرگە, مەكەمەلەرگە, كاسىپورىندارعا ينجەنەرلىك جەلىلەر ارقىلى ۇزدىكسىز سۋ جەتكىزەدى. نىسانداردان اعىندى سۋدى قابىلداپ, تارتۋدى جۇزەگە اسىرادى. اعىندى سۋلار سانيتارلىق, ەكولوگيالىق تالاپتارعا سايكەس تازارتۋدان وتكىزىلەدى. قورشاعان ورتانى لاستاماي, تازالىق ساقتاۋ, ەكولوگيالىق تەپە-تەڭدىكتى قامتاماسىز ەتۋ باعىتىندا قىرۋار جۇمىس اتقارىلىپ جاتىر. كاسىپورىندا كاسىبي ماماندار زاماناۋي جابدىقتاردى قولدانا وتىرىپ, جۇمىس ساپاسىن جاقسارتۋعا ۇمتىلادى. ۇزاق جىلدان بەرى وسىندا جۇمىس ىستەپ كەلە جاتقان بەيىمبەت انەلوۆ – بەساسپاپ ماماننىڭ ءبىرى.
«نەگىزى اقكول اۋدانىنا قاراستى امانگەلدى اۋىلىنىڭ تۋماسىمىن. 2005 جىلى وسىندا ورنالاستىم. ماماندىعىم – جۇرگىزۋشى. كاسىپورىندا سلەسار بولىپ 11 جىل بويى تابان اۋدارماستان ەڭبەك ەتىپ كەلەمىن, – دەيدى بەيىمبەت انەلوۆ. – جالپى, جۇمىستىڭ وڭايى جوق, سىرت كوزگە بايقالا بەرمەگەنىمەن, ءبىزدىڭ جۇمىستىڭ دا وزىندىك قىر-سىرى بار. ءبىر وكىنىشتىسى, جاستار جاعى ازداۋ. جۇمىسشى ماماندىعىن قادىرلەۋ, دارىپتەۋ تۋرالى پرەزيدەنت وتە ورىندى ماسەلە كوتەرىپ وتىر. اركىم قولىنان كەلگەنشە ادال ەڭبەك ەتىپ, ناعىز مامان بولۋى كەرەك. ءبىزدىڭ سورعى ستانساسىندا ايەلدەر دە جۇمىس ىستەيدى. جۇمىستىڭ قانشالىقتى اۋىر ەكەنىن سەزىنۋگە ءسال عانا مىسال كەلتىرە كەتەيىن. قۇبىر بويىمەن كەلگەن قالدىق سۋدى تازالايتىن سۇزگى بار. سۇزگىگە ءارتۇرلى تۇرمىستىق قالدىق كەپتەلىپ قالادى. سىيىمدىلىعى 20 ليترلىك شەلەكپەن كۇنىنە ەلۋ شاقتى قالدىق شىعارادى. جۇمىس ورنىنداعى جاعىمسىز ءيىستى ەسكەرسەڭىز, اۋىرلىعى ءتىپتى ايقىن بايقالادى. مىنە, وسىنداي ادال ەڭبەك ەتىپ جاتقان ارىپتەستەرىمنىڭ جۇمىسى ەسكەرىلسە ەكەن دەيمىن».
كەلەسى كەزەكتە «Kazrost Engineering» جەكە كومپانياسىندا بولدىق. كومپانيا اۋىل شارۋاشىلىعى تەحنيكالارىن دايىندايدى. ديقانداردى قۋاتتى تەحنيكامەن قامتاماسىز ەتۋ بارىسىندا بايىپتى قىزمەت اتقارىپ كەلەدى. 2019 جىلدىڭ جەلتوقسان ايىنان باستاپ جۇمىس ىستەگەن كومپانيا نەگىزىنەن استىق جيناۋ كومبايندارىن شىعارادى. كاسىپورىندا كومبايننىڭ نەگىزگى بولشەكتەرىن «كز «روستسەلماش» پەن «كلەۆەر» اكتسيونەرلىك قوعامىنان الادى. «Vector 410», «Acros 550» استىق كومبايندارىنىڭ بىرنەشە ءتۇرىن ۇسىنادى. وعان قوسا, شاعىن جانە ورتا قۋاتتى YTO-X904, YTO-X1304 تراكتورلارىن قۇراستىرادى. دايىن تەحنيكالار «كازاگروفينانس», «ونەركاسىپتى دامىتۋ» قورىنىڭ ليزينگتىك كومپانيالارى ارقىلى استىقتى القاپتا ەل ىرىسىن مولايتىپ جاتقان داڭعايىر ديقاندارعا جەتكىزىلەدى.
ساعات قۇرمانباي
«جۇمىسىمىز وزىمىزگە ۇنايدى. ەڭ باستىسى, تاپسىرىلعان ءىستى مۇقيات اتقارىپ, ساپالى جۇمىس ىستەۋ, – دەيدى جيناقتاۋشى سلەسار قۇرمانباي ساعات. – جالاقىمىزدى ۋاقىتىندا بەرەدى, بارلىق الەۋمەتتىك جاعداي جاسالعان. قاراپايىم حالىققا ودان ارتىق نە كەرەك؟ ءبىر كوڭىلگە جاعىمدى جەرى, كەيىنگى جىلدارى جەرگىلىكتى ۇلت وكىلدەرىنىڭ جاستارى تەحنيكالىق ءبىلىم الىپ, وسىنداي ورتادا جۇمىس ىستەۋگە ىقىلاس تانىتا باستادى. جاستاردىڭ ىنتاسىن كورىپ, كوڭىلىڭ ءوسىپ قالادى. ءبىزدىڭ كاسىپورىن اۋىل شارۋاشىلىعى تەحنيكالارىن شىعاراتىندىقتان, ەڭبەگىمىز ارقىلى ەلدىڭ نەسىبەسىن كوبەيتۋگە ۇلەس قوسىپ جاتىرمىز دەگەن وي مەرەيىمىزدى ۇستەم ەتەدى. كاسىپورىنداعى جۇمىسشىلار اراسىندا جاقسى ءداستۇر قالىپتاسقان. تاجىريبەلى ماماندار ەڭبەك جولىن جاڭا باستاعان جاستاردى باۋلىپ, بىلگەندەرىن ۇيرەتىپ وتىرادى. ەڭ باستىسى, بەساسپاپ مامان بولۋ. تەحنيكالىق ءبىلىم الىپ, ءبىلىمىڭدى تاجىريبەمەن بايىتىپ جۇمىس ىستەسەڭ, ەڭبەگىڭنىڭ جاناتىنى ءسوزسىز».
كاسىپورىن جۇمىسشىلارى الەۋمەتتىك جاعىنان تولىق قامتاماسىز ەتىلگەن. العاشقى كەزەڭدە 77 ادام, قازىر 175 ادام تۇراقتى جۇمىسقا ورنالاسقان. ءاربىر جۇمىسشىمەن جەكە كەلىسىمشارت جاسالادى. كەلىسىمشارتتا تەگىن مەديتسينالىق قىزمەت كورسەتۋ, دەنساۋلىعىن قاداعالاۋ, ءدارى-دارمەكپەن قامتاماسىز ەتۋ كورسەتىلگەن. جۇمىسشىلار تەگىن تاماقتانادى, جۇمىس ورنىنا كومپانيا كولىگىمەن تاسىمالدانادى.
تاعى ءبىر جاقسىلىعى, جەرگىلىكتى كاسىبي ءبىلىم بەرەتىن وقۋ ورىندارىمەن بايلانىسىن نىعايتا ءتۇسىپ وتىر. ونىسى – ەلدىڭ ەرتەڭىن ويلاعاندىق. بولاشاق جاس مامانداردى زاماناۋي كاسىپورىننىڭ تىنىس-تىرشىلىگىمەن تانىستىرىپ, ەڭبەككە باۋلۋ ماسەلەلەرىن مىقتاپ قولعا العان. وسى ارادا تاجىريبەدەن دە وتكىزەدى. بولاشاق مامانداردىڭ تۇراقتى جۇمىسقا ورنالاسۋ ماسەلەسىن دە شەشەدى.
«اۆيكس گرۋپ» جشس جانار-جاعارماي نارىعىندا جاقسى دامىپ كەلەدى. كاسىپورىنداعى تاجىريبەلى تەحنولوگتەر ءونىم ساپاسىن جاقسارتۋعا بار كۇش-جىگەرىن جۇمىلدىرعان. ءونىم سۇرانىسقا يە. باسەكەگە قابىلەتتى بولۋ جولىندا نارىقتاعى باعا دا نازاردان تىس قالمايدى. تىنىمسىز ەڭبەكقورلىق پەن جاڭا شەشىمدەردى ىزدەستىرۋ – سەرىكتەستىك تابىسىنىڭ نەگىزگى درايۆەرى. مۇنداعى ىستىققا ءتوزىمدى كونسەرۆانتتار ونەركاسىپكە وتە قاجەت.
يۆان پەتروجيتسسكي
«زەرتحانا بارلىق قاجەتتى قۇرىلعىمەن قامتاماسىز ەتىلگەن, – دەيدى زەرتحانا مەڭگەرۋشىسى يۆان پەتروجيتسكي. – ءونىم ساپاسى ىسىمىزگە جاۋاپكەرشىلىكپەن قاراۋىمىزعا بايلانىستى. ۇجىمدا اۋىزبىرلىك مىقتى. بىرلەسە اتقارعان سوڭ, جۇك تە جەڭىلدەي تۇسەدى. سەرىكتەستىك شىعاراتىن ءونىمنىڭ بارلىعى زەرتحانادا مۇقيات تەكسەرىستەن وتكىزىلەدى. وسىنداي ىلكىمدى جۇمىستىڭ ارقاسىندا ءونىمىمىز دە وڭىردە جاقسى قىرىنان تانىلدى. جۇمىسشىلارعا بارلىق جاعداي جاسالعان. اتقارعان جۇمىسىمىزعا سايكەس ەڭبەكاقىمىز ۋاقىتىندا تولەنەدى».
ءبىز تىلدەسكەن جۇمىسشىلاردىڭ بارلىعى ءوز ماماندىقتارىن جاقسى مەڭگەرىپ, ايانباي ەڭبەك ەتىپ جۇرگەندىكتەرىن ايتادى. ولاردىڭ كوكىرەگىندە مەن جۇمىسشىمىن دەگەن ماقتانىش سەزىم بار.
كوكشەتاۋ
