مىنە, سونداي دانەكەر تۇلعانىڭ ءبىرى – پروفەسسور, ساياساتتانۋشى, مەملەكەتشىل مەنەدجەر زۇلفۋحار عايىپوۆ. ەلگە قالتقىسىز قىزمەت ەتىپ, مەملەكەت دامۋىنا ايانباي اتسالىسىپ جۇرگەن وسى ازاماتتىڭ بەل-بەلەسىنە كوز جۇگىرتسەك, ەلىمىزدىڭ جەتەكشى جوعارى وقۋ ورنى – ءال-فارابي اتىنداعى قازاق ۇلتتىق ۋنيۆەرسيتەتى مەن پرەزيدەنت جانىنداعى مەملەكەتتىك قىزمەت اكادەمياسىنا دەيىنگى ساليقالى ءبىلىم وردالارىنىڭ ونەگەلى مەكتەبى ويعا ورالادى. ول قازمۋ-دى ۇزدىك ءبىتىرىپ, عىلىمي قىزمەتكە قالدىرىلعان كەزدەن باستاپ, تاۋەلسىز قازاقستاننىڭ وركەندەۋىنە ءبىلىم-بىلىگىمەن, پايىم-پاراساتىمەن ۇلەس قوسىپ كەلەدى.
فيلوسوفيا جانە ساياساتتانۋ فاكۋلتەتىندەگى جيىرما جىلعا جۋىق ەڭبەك تاجىريبەسى زۇلفۋحار سۇلتان ۇلىنىڭ ۇستازدىق, ۇيىمداستىرۋشىلىق, زەرتتەۋشىلىك بەل-بەلەستەرىن كورسەتتى. جاس عالىمدار كەڭەسىن باسقارا ءجۇرىپ, جاڭا بۋىندى جوو مادەنيەتىنە, عىلىمعا تارتا ءبىلدى.
ءبىلىم جانە عىلىم مينيسترلىگىندە جوعارى وقۋ ورىنداردىڭ دەكان, پرورەكتور, رەكتور قىزمەتىندە جۇرگەن بىلىكتى مامانداردى سالا باسشىلىعىنىڭ ءتۇرلى لاۋازىمدى قىزمەتىنە تارتۋ ءداستۇر قالىپتاسقان ەدى. تاۋەلسىزدىك تۇسىنداعى ەلىمىزدىڭ تۇڭعىش جەكەمەنشىك جوعارى وقۋ ورنى – «قاينار» ۋنيۆەرسيتەتىندە رەكتورلىق قىزمەتتە جۇرگەنىمىزدە سول كەزدەگى مينيستر ءشامشا بەركىمباەۆا جوعارى ءبىلىم بەرۋ دەپارتامەنتى باسشىلىعىنا ۇسىنعانىن بۇگىندە ماقتانىشپەن ايتامىز. بۇل جەردە ايتايىن دەگەنىمىز: جوعارى وقۋ ورىندارىنداعى ءبىلىمى مەن بىلىگى ساي, مىقتى مەنەدجەرلەردى مينيسترلىككە تارتۋ وسى كۇنگە دەيىن جالعاسىپ كەلە جاتىر.
يگى باستامالار مينيستر باقىتجان جۇماعۇلوۆ تۇسىندا دا ءساتتى جۇزەگە استى. ۋنيۆەرسيتەتتەرگە بىلىكتى رەكتورلار مەن پرورەكتورلار تاعايىندالىپ, جاۋاپتى ورىنداردىڭ مارتەبەسى بيىكتەي ءتۇستى. وسى ورايدا 2010 جىلى جوعارى مەكتەپتىڭ تاجىريبەلى مەنەدجەرى زۇلفۋحار سۇلتان ۇلى مينيسترلىككە شاقىرىلىپ, ءبىلىم جانە عىلىم سالاسىنداعى باقىلاۋ كوميتەتى توراعاسىنىڭ ورىنباسارى قىزمەتىنە تاعايىندالدى.
جوعارى جانە جوعارى وقۋ ورنىنان كەيىنگى ءبىلىم سالاسىندا بىرىڭعاي مەملەكەتتىك ساياساتتى قالىپتاستىرۋعا قاتىسىپ, جوعارى ساپانى قامتاماسىز ەتۋ باعىتىندا زۇلفۋحار عايىپوۆتىڭ قارىم-قابىلەتى, ىسكەرلىگى, بىلىكتىلىگى, مادەنيەتى تارازىعا تارتىلعان كەز وسى شاق ەدى. ونىڭ ۇستىنە ەلىمىزدەگى ساپاسىز ۋنيۆەرسيتەتتەردىڭ سانىن قىسقارتۋ مىندەتى دە وعان جۇكتەلگەنىن جاقسى بىلەمىز. ەل باسشىلىعىنىڭ باقىلاۋىندا تۇرعان وسى تاپسىرمانى ول ابىرويمەن ورىنداپ, بەدەل بيىگىنەن كورىنگەنى دە شىندىق.
بۇدان كەيىن زۇلفۋحار سۇلتان ۇلى ون جىل بويى استاناداعى عاسىرلىق تاريحى بار كولىك جانە كوممۋنيكاتسيا كوللەدجىنىڭ ديرەكتورى بولىپ, وسى وقۋ ورنىن ەلورداداعى ساپالى ءبىلىم وشاعىنا اينالدىرا الدى.
بۇگىندە ول – قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ ينستيتۋت ديرەكتورى. مەملەكەتتىك قىزمەتشىلەردىڭ كاسىبي دامۋى مەن ءبىلىم الۋىنا اتسالىسىپ, مەملەكەتتىك اپپارات ماماندارى مەن كاسىبي باسقارۋشىلاردى دايارلاۋ ىسىندە جىگەرلى جەتەكشى, بىلىكتى باسشى, ۇتقىر ۇيىمداستىرۋشى, مىقتى مەنەدجەر رەتىندە تانىلدى.
ءبىز بىرنەشە جىلدان بەرى زۇلفۋحار سۇلتان ۇلىنىڭ قايراتكەرلىك تۇلعاسىن ودان سايىن جاقىننان تانىپ, ءتانتى بولىپ ءجۇرمىز. پرەزيدەنت جانىنداعى ۇلتتىق قۇرىلتاي مۇشەسى, استانا قالاسى قوعامدىق كەڭەسىنىڭ توراعاسى سىندى مەملەكەتشىلدىك قىزمەتىندە ول ارقاشان باستاماشىل توپتىڭ ىشىندە, قايناعان يدەيالاردىڭ ورتاسىندا جۇرەدى. ءبىلىمنىڭ ماڭىزى, مادەنيەتتىڭ جاۋاپكەرشىلىگى, جاستاردىڭ مۇددەسى, شاھار جۇرتشىلىعىنىڭ سان ءتۇرلى وزەكتى ماسەلەلەرى – زۇلفۋحار عايىپوۆ پەن پىكىرلەستەرىنىڭ نىساناسى.
اشىق ازاماتتىق قوعام مەن ادىلەتتى مەملەكەت قۇرۋ مەن دەموكراتيالىق ۇدەرىستەردى ورنىمەن جۇرگىزۋدە ۇلتتىق قۇرىلتايدىڭ ورنى ەرەكشە ەكەنى بەلگىلى. ساياساتتانۋ عىلىمدارىنىڭ دوكتورى, پروفەسسور, قوعام قايراتكەرى زۇلفۋحار سۇلتان ۇلى سالانىڭ كوكەيكەستى پروبلەمالارىن, ەلوردا حالقىنىڭ ارمان-تىلەگىن جاۋاپتى ورىندارعا قۇرىلتاي مىنبەرىنەن ورايلى جەتكىزىپ تە ءجۇر.
ەلىمىزدەگى قوعامدىق كەڭەستەر حالىق پەن مەملەكەتتىك ورگاندار اراسىنداعى قارىم-قاتىناستى جەڭىلدەتۋ جانە اشىق ديالوگ الاڭىن قۇرۋعا ايانباي كومەكتەسىپ جۇرسە, وسى جۇمىستىڭ جۋان ورتاسىنداعى ەلوردا قوعامدىق كەڭەسى, ونىڭ توراعاسى زۇلفۋحار عايىپوۆتىڭ ورنى – ءوز الدىنا بولەك اڭگىمە. ەڭ باستىسى, ورتاق ىستە ناتيجە بار.
قوعام مىنبەرى – ەل ءۇمىت ارتقان كەڭەستەر, ال ونىڭ قۋاتى – القالاعان حالىق پەن جاۋاپتى زيالى. ەكەۋى ۇيلەسسە, حالىق ۇتادى. ادىلەتتىك تە وسى باعداردا ورىستەيدى.
كەڭەستىك قازاقستاننىڭ العاشقى سىرتقى ىستەر ءمينيسترى تولەگەن تاجىباەۆتىڭ ساياسي قايراتكەرلىك قىرلارىن ىندەتە زەرتتەپ, ديسسەرتاتسيا قورعاعان عالىمنىڭ ءوزى دە بۇگىندە كاسىبي تولىسقان, رۋحاني كەمەلدەنگەن كەزەڭگە كوتەرىلدى. ارىپتەسىمىزدىڭ كاسىپتىك-تەحنيكالىق ءبىلىم باعىتىنداعى وي-تولعامى مەن ۇسىنىستارى ساپالانۋعا بەت العان سالا ءۇشىن ماڭىزدى دەپ سانايمىز.
جاڭا تۇرپاتتى ادىلەتتى قازاقستان مەملەكەتشىل, جاۋاپتى ازاماتتارىن ماقتانىش ەتەدى. زيالىلىق ءداستۇر ساباقتاستىعىنىڭ ءمانى دە وسىندا.
كارىمبەك قۇرماناليەۆ,
ۇلتتىق قۇرىلتاي مۇشەسى, اكادەميك
