وسى اپتادا قازاقستان, جاپونيا, پولشا مەن چەحيا ەلدەرىڭ ماماندارى بىرىگە وتىرىپ, الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ بازاسىندا جاڭا ەندوسكوپيالىق وقۋ ورتالىعىنىڭ اشىلۋىنا ىقپال ەتتى. كوپتەن كۇتتىرگەن ورتالىق ەندى قازاقستاننىڭ عانا ەمەس, ورتالىق ازيا ەلدەرىنەن كەلگەن ەندوسكوپيست-دارىگەرلەردىڭ دە كاسىبيلىگىن شىڭداپ, ەندوسكوپيالىق دياگنوستيكانى جاڭا دەڭگەيگە كوتەرەتىن زاماناۋي ءبىلىم بەرۋ حابىنا اينالماق.
زاماناۋي ەندوسكوپيالىق ورتالىق Evis X1 ەندوسكوپيالىق جۇيەلەرى مەن جوعارى تەحنولوگيالى سيمۋلياتورلار سياقتى ەڭ سوڭعى قۇرال-جابدىقتارمەن جابدىقتالعان. وسىنداي وزىق وقۋ ۇدەرىسى حالىقارالىق ستاندارتتارعا ساي كاسىبي بىلىكتىلىكتى كوتەرۋگە سەپتەسەدى. ءارى بۇل جۇيە ەندوسكوپيانى جاساندى ينتەللەكتپەن بىرگە جاڭا دەڭگەيگە كوتەرىپ, دارىگەرگە ءتىپتى وتە كىشكەنتاي, كوزگە كورىنۋى جانە جەتۋى قيىن ىسىكتەردى انىقتاۋعا كومەكتەسەدى.
«ورتالىقتىڭ اشىلۋىنا الەمدىك مەديتسينالىق جابدىقتار ءوندىرىسىنىڭ كوشباسشىسى – Olympus كومپانياسىمەن ستراتەگيالىق ارىپتەستىگىمىز ىقپال ەتتى. سەرىكتەستەرىمىزگە كورسەتكەن قولداۋى ءۇشىن شىنايى العىسىمدى بىلدىرەمىن», – دەدى كىاعزي باسقارما توراعاسى رۇستەم تولەۋتاەۆ.
رۇستەم تولەۋتاەۆ جاڭا ورتالىقتىڭ ءوز دارىگەرلەرىمىزبەن قوسا, وزبەكستان, تاجىكستان, تۇرىكمەنستان, قىرعىزستاننان كەلگەن مامانداردى دا ماشىقتاندىرا وتىرىپ, وزىق تەحنولوگيالاردى مەڭگەرەتىن ماڭىزدى الاڭعا اينالاتىنىنا سەنىم بىلدىرە كەلە, ونىڭ دياگنوستيكا مەن مەديتسينالىق كومەكتىڭ ساپاسىن ارتتىرۋعا مۇمكىندىك بەرەتىنىن اتاپ ءوتتى.
جاپونياداعى Olympus Corporation وكىلى يوحي ماەدا: «ترەنينگ ورتالىعىن قۇرۋعا قازاقستان, جاپونيا, پولشا مەن چەحيا كوماندالارىنىڭ ات سالىسقانىنا قۋانىشتىمىز. ورتالىق مامانداردى دايارلاۋ, ءبىلىم الماسۋ جانە جوعارى ستاندارتتاردى ەنگىزۋ سالالارىندا جاڭا مۇمكىندىكتەر اشادى», – دەيدى.
ءوز كەزەگىندە Olympus OCG ديرەكتورى توماش ستاۆيارسكي: «ماقساتىمىز – ادامداردى اجالدان اراشالاۋ. ءبىز دارىگەرلەردى جابدىقتى دۇرىس ءارى ءتيىمدى پايدالانۋعا ۇيرەتەمىز, سەبەبى, ناۋقاستاردىڭ ءومىرى مەن دەنساۋلىعى وسىعان تاۋەلدى. وسى ماڭىزدى جوبانىڭ ءبىر بولىگى بولعانىمىزدى ماقتان تۇتامىز», دەدى.
باسقارما توراعاسىنىڭ عىلىمي-كلينيكالىق جانە يننوۆاتسيالىق قىزمەت جونىندەگى ورىنباسارى ءجاميلا قايبۋللاەۆا ەندوسكوپيالىق ورتالىقتىڭ ءوز دارىگەرلەرىمىزدى ساپالى كولونوسكوپيا ادىستەرىنە ۇيرەتىپ قانا قويماي, ADR كورسەتكىشىن ەسەپتەۋ جۇيەسىن ەنگىزىلەتىنىن دە جەتكىزدى. بۇل كورسەتكىش – تىك ىشەك پەن توق ىشەك قاتەرلى ىسىگىمەن كۇرەستەگى شەشۋشى فاكتور. ونى قولدانۋ مىڭداعان ادامنىڭ ءومىرىن ساقتاپ قالۋعا مۇمكىندىك بەرەدى.
ەندوسكوپيا جانە ينتەرۆەنتسيالىق گاستروەنتەرولوگيا بولىمشەسىنىڭ مەڭگەرۋشىسى الما حابيجانوۆا دا ورتالىق ورتالىق ازيادا ەندوسكوپيالىق قىزمەتتىڭ دامۋىنا ايتارلىقتاي ۇلەس قوساتىنىنا سەنىمدى.
وقۋ ورتالىعىنىڭ باعدارلامالارىنا تەوريالىق كۋرستارمەن قاتار, سيمۋلياتورلار مەن ناقتى ومىرلىك, كلينيكالىق جاعدايدا وتكىزىلەتىن كەڭ كولەمدى پراكتيكالىق ساباقتار دا كىرەدى. بۇل وقۋ پروتسەسىنىڭ تيىمدىلىگىن بارىنشا ارتتىرۋعا جول اشادى.
بۇل ماڭىزدى وقيعا قازاقستانداعى مەديتسينالىق ءبىلىم بەرۋ مەن تەحنولوگيالاردى دامىتۋدىڭ جاڭا كەزەڭىنىڭ باستالعانىن بىلدىرەدى.
الماتى
