تازالىققا شىققان ازاماتتار قورشاعان ورتانى قورعاۋعا ءوز ۇلەستەرىن قوسىپ, ەكولوگيالىق مادەنيەتتى قالىپتاستىرۋدىڭ جارقىن ۇلگىسىن كورسەتتى. «شىعىس جاستارى» قوعامدىق قورىنىڭ اتقارۋشى ديرەكتورى ءاليبي ءابدىرايىموۆ جۇرگىنشىلەردى تازالىقتى ساقتاۋعا شاقىردى.
– «تازا قازاقستان» ەكولوگيالىق اكتسياسى مەملەكەت باسشىسى قاسىم-جومارت توقاەۆتىڭ باستاماسىمەن جۇزەگە اسىپ جاتقان يگى ىستەردىڭ ءبىرى. اكتسيا بارىسىندا سەمەي – استانا باعىتىنداعى اۋماقتار تازارتىلدى. نەگىزگى ماقسات – ءوڭىر تۇرعىندارى اراسىندا قورشاعان ورتانى تازا ۇستاۋ مادەنيەتىن قالىپتاستىرۋ. بۇگىنگى اكتسياعا 50-دەن اسا ادام قاتىسىپ, بەلسەندىلىك تانىتتى. قالامىزدىڭ تازالىعى – بارلىعىمىزدىڭ ورتاق مىندەتىمىز. بارشا تۇرعىنداردى تابيعاتتى ايالاۋعا, مۇنداي ءىس-شارالارعا بەلسەنە قاتىسۋعا شاقىرامىن, – دەدى ول.
وبلىستىق ءباسپاسوز قىزمەتىنىڭ مالىمەتىنە سۇيەنسەك, «تازا قازاقستان» باعدارلاماسى اياسىندا جىل باسىنان وبلىستا 282 381 ادام, ونىڭ ىشىندە 13 585 ۇيىم مەن مەكەمە وكىلدەرى قاتىسقان. جۇمىسقا 8 558 تەحنيكا جۇمىلدىرىلدى. ناتيجەسىندە 157 072 اۋلا تازالانىپ, 49 467 توننا قاتتى تۇرمىستىق قالدىقتار قوقىس (قتق) پوليگوندارىنا شىعارىلدى. وبلىس بويىنشا 2 443 ساياباق پەن سكۆەر تازارتىلىپ, 1 001 ەسكەرتكىشتىڭ اينالاسى اباتتاندىرىلىپ, 10 285 شارشى مەتر تاسجول جوندەلدى. 50 201 كوشەت جانە 7 883 شىبىق وتىرعىزىلدى. سەنبىلىك 16 811 الەۋمەتتىك جانە وندىرىستىك نىساندى, سونداي-اق 2 287 جاساندى سۋ قويماسىن قامتىدى. اتالعان ەكولوگيالىق اكتسيا اباي وبلىسىندا الداعى ۋاقىتتا دا جالعاسا بەرمەك.
اباي وبلىسى
