دەپۋتات ءوز ساۋالىندا مەملەكەت باسشىسى قاسىم-جومارت توقاەۆتىڭ ءبىلىم سالاسىنا ايرىقشا ءمان بەرىپ وتىرعانىن اتاپ ءوتتى. ول 2019 جىلدان باستاپ اتقارىلعان جۇمىستاردى ەسكە سالدى: ءبىلىم سالاسىنىڭ بيۋدجەتى ءۇش ەسە ارتقانىن, 1 ميلليوننان استام وقۋشىعا ارنالعان 1200 مەكتەپ اشىلعانىن, «كەلەشەك مەكتەپتەرى» ۇلتتىق جوباسى اياسىندا 217 جاڭا مەكتەپتىڭ سالىناتىنىن, ونىڭ 128-ءى پايدالانۋعا بەرىلگەنىن, ءبىلىم بەرۋ ينفراقۇرىلىمىن قولداۋ قورى ەسەبىنەن 60-تان استام مەكتەپ اشىلعانىن ايتتى.
سونىمەن بىرگە, «پەداگوگ مارتەبەسى تۋرالى» زاڭ قابىلدانىپ, «قازاقستاننىڭ ەڭبەك سىڭىرگەن ۇستازى» اتاعى ەنگىزىلگەنىن, بۇگىندە 74 مۇعالىم وسى قۇرمەتكە يە بولعانىن, ەكى ۇستازدىڭ «قازاقستاننىڭ ەڭبەك ەرى» اتانعانىن جەتكىزدى.
سونىمەن قاتار, قايرات بالابيەۆ ءبىلىم ساپاسىن جەتىلدىرۋ ءۇشىن ۇكىمەتكە مىناداي ۇسىنىستارىن ءبىلدىردى:
-
باستاۋىش سىنىپتاردا «الىپپە», «انا ءتىلى» مەن ماتەماتيكا پاندەرىن نەگىزگى رەتىندە قالدىرىپ, دامىتۋ. بالانىڭ وقۋ ساۋاتتىلىعى 1-سىنىپتان باستاپ «الىپپەمەن» ءارىپ ۇيرەنۋ, بۋىنعا قوسىپ وقۋ ارقىلى قالىپتاسۋى ءتيىس.
-
جوعارى سىنىپتاردا كاسىبي باعدار نەگىزىندە قازاق ءتىلى, قازاق ادەبيەتى, ماتەماتيكا, جاراتىلىستانۋ, تاريح, قۇقىق, شەت تىلدەرى سياقتى پاندەردى تەرەڭدەتىپ وقىتۋ. بجب مەن تجب سياقتى فورمالدى باعالاۋ جۇيەلەرىن الىپ تاستاپ, باعالاۋدى قۇندىلىققا جانە جەكە دامۋ پروگرەسىنە نەگىزدەۋ.
-
بالاباقشادان باستاپ مەكتەپكە دەيىنگى باعدارلامادا ەڭبەككە باۋلۋ, شىعارماشىلىققا ۇيرەتۋ جانە تۇلعالىق دامۋعا باعىتتالعان بىرىڭعاي ادىستەمەنى ەنگىزۋ. بىرىڭعاي مەكتەپ فورماسىن بەكىتۋ ارقىلى اتا-انالاردىڭ ارتىق شىعىنعا ۇشىراماۋىن قامتاماسىز ەتۋ. «الەۋمەتتىك ءاميان» جۇيەسىن ءتيىمدى ىسكە قوسىپ, مۇقتاج وتباسىلارعا اۆتوماتتى قولداۋ تەتىكتەرىن ەنگىزۋ.
-
مۇعالىمدەردى ارتىق ەسەپ بەرۋدەن بوساتىپ, تەك وقىتۋ مەن تاربيەگە كوڭىل بولۋىنە جاعداي جاساۋ.
-
مۇعالىمدەردىڭ بىلىكتىلىگىن ارتتىرۋ كۋرستارىن تاجىريبەگە نەگىزدەلگەن جانە ناقتى قۇرالدارمەن جابدىقتالعان جۇيەگە كوشىرۋ.
دەپۋتات بۇل شارالار ءبىلىم بەرۋ ساپاسىن ارتتىرۋعا, ۇستازداردىڭ كاسىبي الەۋەتىن كۇشەيتۋگە, الەۋمەتتىك ادىلەتتىلىكتى قامتاماسىز ەتۋگە ىقپال ەتەتىنىن ايتتى.
