فوتو: اشىق دەرەككوز
جاڭا سالىق كودەكسىن تۇسىندىرۋگە ارنالعان سەميناردا بايانداماشى ققس مولشەرلەمەسى 16 پايىز بولىپ بەلگىلەنگەنىن ەسكە سالدى. دارىلىك زاتتار, مەديتسينالىق ماقساتتاعى بۇيىمدار مەن مەديتسينالىق قىزمەتتەر ءۇشىن ققس مولشەرلەمەسى 2026 جىلدان باستاپ 5% دەڭگەيىندە بەلگىلەندى, ال 2027 جىلدان باستاپ 10% قۇرايدى.
«تەگىن مەديتسينالىق كومەكتىڭ كەپىلدىك بەرىلگەن كولەمى جانە ءمامس اياسىندا, سونداي-اق ۇكىمەت ايقىندايتىن تىزبە بويىنشا ورفاندىق جانە الەۋمەتتىك ماڭىزى بار اۋرۋلاردى ەمدەۋ ءۇشىن دارىلىك زاتتاردى وتكىزۋ ءارى يمپورتتاۋ جانە مەديتسينالىق قىزمەتتەر ققس-تان بوساتىلادى», دەدى جانىبەك نۇرجانوۆ.
سپيكەردىڭ مالىمەتىنشە, 2026 جىلدان باستاپ تۇرعىن ءۇيدى ساتۋ نەمەسە جالعا بەرۋ كەزىندە ققس-تان بوساتۋ ءتارتىبى الىنىپ تاستالادى.
«ياعني تۇرعىن ءۇي سالۋمەن اينالىساتىن قۇرىلىس كومپانيالارى كەلەسى جىلدان باستاپ ءوز اينالىمدارىن ققس تولەمدەرى رەتىندە مويىنداۋى ءتيىس. الايدا 2026 جىلدىڭ 1 قاڭتارىنا دەيىن باستالعان قۇرىلىس نىساندارىنا قاتىستى جەڭىلدىك سوڭىنا دەيىن, ياعني تولىق وتكىزىلىپ بىتكەنگە دەيىن ساقتالادى», دەپ ناقتىلادى جانىبەك نۇرجانوۆ.
سونىمەن قاتار ىشكى تۋريزم بويىنشا تۋروپەراتورلاردىڭ قىزمەتتەرى, وتاندىق كىتاپتاردى ساتۋ, باسپا تۇرىندە كىتاپ شىعارۋ قىزمەتتەرى جانە ارحەولوگيالىق جۇمىستار ققس-تان بوساتىلادى.
«سونداي-اق ارنايى سالىقتىق رەجيم قولدانىلاتىن تاۋارلار مەن قىزمەتتەردىڭ اينالىمى ققس وبەكتىسى بولىپ تانىلمايدى. دەمەك, ارنايى رەجيمدە جۇمىس ىستەيتىن كاسىپكەرلەر ققس تولەۋشىلەردىڭ قاتارىنا كىرمەيدى», دەدى قارجى مينيسترلىگى مەملەكەتتىك كىرىستەر كوميتەتى توراعاسىنىڭ ورىنباسارى.
