مەكتەپتە ءپان كابينەتتەرى تولىق جابدىقتالىپ, STEM-زەرتحانالار, بيولوگيا, حيميا, فيزيكا سىنىپتارى تاجىريبەلىك ساباقتارعا ارنالعان قۇرالدارمەن قامتاماسىز ەتىلگەن. سونداي-اق وقۋشىلاردىڭ شىعارماشىلىق جانە سپورتتىق الەۋەتىن دامىتۋ ءۇشىن حورەوگرافيا زالى, زاماناۋي سپورت زالى مەن الاڭى, مۋزىكا جانە بەينەلەۋ ونەرى كابينەتتەرى, ەڭبەككە باۋلۋ شەبەرحانالارى قاراستىرىلعان. كىتاپحانا, اسحانا, اكت زالى, كوۆوركينگ پەن دەمالىس ايماقتارى دا بار.
اشىق ەسىك كۇنى بارىسىندا اتا-انالار مەكتەپتىڭ ىشكى تارتىبىمەن, وقۋ كابينەتتەرىمەن, قوسىمشا ۇيىرمەلەرمەن جانە زاماناۋي جابدىقتالعان سىنىپتارمەن تانىستى. مەكتەپ ديرەكتورى ەركىنالى اقبەرديەۆ بۇل ءىس-شارانىڭ اتا-انالار مەن مەكتەپ اراسىنداعى سەنىمدى نىعايتۋعا باعىتتالعانىن اتاپ ءوتتى. ونىڭ ايتۋىنشا, «كەلەشەك مەكتەپتەرى» ۇلتتىق جوباسىنىڭ يگىلىگىن وتەعۇل اۋىلىنىڭ تۇرعىندارى دا كورىپ وتىر. بۇعان دەيىن ەلدى مەكەندەگى جالعىز ءبىلىم ۇياسى ءۇش اۋىسىمدى مەكتەپ قاتارىنا ەنۋگە شاق قالعان ەدى.
ء«بىزدىڭ ماقساتىمىز – وقۋشىلارعا ساپالى ءبىلىم بەرۋمەن قاتار ولاردىڭ جان-جاقتى دامۋىنا جاعداي جاساۋ. مەملەكەت باسشىسى قاسىم-جومارت توقاەۆتىڭ باستاماسىمەن جۇزەگە اسىپ جاتقان «كەلەشەك مەكتەپتەرى» ۇلتتىق جوباسى اۋىل بالاسىنا ۇلكەن مۇمكىندىك بەرىپ وتىر», دەدى مەكتەپ ديرەكتورى.
اتا-انالار جاڭا مەكتەپتىڭ وقۋ-تاربيە ۇدەرىسىن ءتيىمدى ۇيىمداستىرۋعا قولايلى ەكەنىن, كابينەتتەردىڭ كەڭ ءارى قاۋىپسىز ەكەنىن جانە بالالاردىڭ بوس ۋاقىتىن ءتيىمدى وتكىزۋگە جاعداي جاسالعانىن جوعارى باعالادى.
مۇنداي كەزدەسۋلەر الداعى ۋاقىتتا ءداستۇرلى تۇردە ءوتىپ, مەكتەپ پەن اتا-انالار اراسىنداعى ىنتىماقتاستىقتى نىعايتۋعا ىقپال ەتپەك.
ايتا كەتەيىك, «كەلەشەك مەكتەپتەرى» باعدارلاماسى اياسىندا ەڭ كوپ مەكتەپ تۇركىستان وبلىسىندا سالىنۋدا. بۇگىنگى تاڭدا وڭىردە 29 مەكتەپتىڭ 21-ءى قولدانىسقا بەرىلدى. الداعى توقساندا تاعى سەگىز جاڭا مەكتەپ وقۋشىلارعا ەسىگىن اشادى.
