سۋرەت: adyrna.kz
يگى ىسكە وبلىس ورتالىعى مەن قوسشى قالاسىنىڭ تۇرعىندارى ۇيىتقى بولدى. كوكشەتاۋ قالاسىنىڭ ىرگەسىندەگى بۇقپا تاۋىنىڭ باۋرايى ادامدار اعىنىنا تولدى.
ۇيىمداستىرۋشىلاردىڭ ايتۋىنا قاراعاندا, بيىلعى جىلدىڭ العاشقى جارتىسىندا «تازا قازاقستان» اكتسياسىنا قاتىسۋشى ادامداردىڭ سانى 463 مىڭنان اسقان. ءىس ناتيجەسىندە 80 مىڭ توننا قوقىس جينالعان. جەرگىلىكتى وقۋ ورىندارىنىڭ ستۋدەنتتەرى مەن ءبىلىم الۋشىلارى اعا بۋىننىڭ ءتالىمدى ىسىنەن تاعىلىم الىپ, قولعابىس ەتىپ ءجۇر. كوكشەتاۋدا UNISEF حالىقارالىق ەرىكتىلەر قوزعالىسىنا 300-دەن استام جاس قوسىلىپتى.
سەنبىلىك بارىسىندا قوسشى قالاسىندا دا اۋقىمدى جۇمىس اتقارىلدى. سارقىراما وزەنىنىڭ جاعالاۋى جەل ۇشىرىپ اكەلگەن قوقىستان تازارتىلىپ, كوپ-كورىم جاقسارىپ قالدى. جەرگىلىكتى بيلىك قوسشىداعى جۇمىس الدەقاشان داستۇرگە اينالعانىن ايتادى.
– جازدا «جاسىل ەل» اكتسياسى وتكىزىلدى, – دەيدى قوسشى قالاسىنىڭ اكىمى ازامات قاپىشەۆ, – اكتسياعا جۇزدەگەن ادام قاتىستى. نەگىزىنەن ستۋدەنتتەر مەن مەكتەپ وقۋشىلارى. ولار جازعى دەمالىس كەزىندە قول قۋسىرىپ قاراپ وتىرماي, قوعامعا قاجەتتى شارۋامەن اينالىستى. ءار جىل سايىن تابيعات جاناشىرلارىنىڭ قاتارى كوبەيىپ كەلەدى. بۇل قۋانارلىق جايت. دەمەك وزدەرى تۇرىپ جاتقان جەردى قۇرمەتتەپ, ونىڭ اجارلى بولۋىن قالايتىن, ادەمى بولعانىن كورگىسى كەلەتىن ىزەتتى بۋىن ءوسىپ كەلەدى. مۇنداي اكتسيالاردىڭ پايدالى جاعى دا وسى.
سەنبىلىككە «استانا» حالىقارالىق ۋنيۆەرسيتەتىنىڭ ەكولوگ ماماندىعىن يگەرىپ جاتقان ستۋدەنتتەرى دە قاتىستى. «StopMusor» جوباسى دا «تازا قازاقستان» اكتسياسىمەن ساباقتاسىپ جاتىر.
– ءبىز ءار ءۇش اي سايىن كۇش بىرىكتىرىپ ورتاق ىسكە اتسالىسامىز, – دەيدى ەكولوگيالىق ۇيىمدار قاۋىمداستىعىنىڭ توراعاسى ايگۇل سولوۆەۆا. – پرەزيدەنت حالىققا جولداۋىندا تسيفرلاندىرۋ ماسەلەسى تۋرالى ورىندى پىكىر ايتتى. ەلىمىزدىڭ ەكولوگيا ماسەلەسىنە دە تسيفرلاندىرۋ وتە كەرەك.
اركىم ءوزىنىڭ تۋعان ولكەسىنىڭ تازا بولعاندىعىن قالايدى. تەك جاقسى ىسكە جارشى بولىپ, ۇيىمداستىرا ءبىلۋ قاجەت.
– ءبىز وسى اكتسيانى ءتورتىنشى جىل وتكىزۋدەمىز, – دەيدى ەكولوگيا جانە تابيعي رەسۋرستار مينيسترلىگى ەكولوگيالىق رەتتەۋ جانە باقىلاۋ كوميتەتىنىڭ توراعاسى ەربولات قوجىقوۆ. – ءبىر كۇن ىشىندە ەلىمىز كولەمىندە ميلليوننان استام ادام قاتىسقان يگىلىكتى جۇمىس اتقارىلدى. الپىس مىڭ تونناعا جۋىق قوقىس شىعارىلىپ, ءتيىستى ورنىنا جەتكىزىلدى. بۇگىندە جۇمىستىڭ اۋقىمىنا عانا ەمەس, ساپاسىنا دا نازار اۋدارامىز. تۇرمىستىق قالدىقتاردى ىرىكتەپ جينايمىز. ماسەلەن, پلاستيكالىق ىدىستار بولەك جينالادى.
تازالىق اكتسياسى وبلىستىڭ بارلىق اۋداندارىندا وتكىزىلدى. وسى ءبىر تىزە قوسقان تاعىلىمدى ىستەن ەل بىرلىگىنىڭ بەكەم ەكەندىگىن ايقىن اڭعارۋعا بولادى.
اقمولا وبلىسى
