سەزد اياسىندا ءدىن كوشباسشىلارى جاھاندىق سىن-قاتەرلەردى بىرلەسىپ تالقىلاپ, قوعامداعى ءرولىن كۇشەيتۋ جولدارىن قاراستىردى. سونىمەن قاتار بۇل باسقوسۋ مادەنيەتارالىق جانە وركەنيەتتىك كيكىلجىڭدەردى ەڭسەرۋدە, سونداي-اق جاھاندىق تاتۋلىقتى نىعايتۋدا ءدىن قايراتكەرلەرىنىڭ بەلسەندى ارەكەت ەتۋىنە سەرپىن بەردى.
ستاتيستيكاعا سۇيەنسەك, جەر شارىنداعى حالىقتىڭ شامامەن 80 پايىزى ءوزىن ءبىر دىنمەن بايلانىستىرادى. دەمەك ءدىننىڭ ءسوزى مەن ۇندەۋىنىڭ كۇشى وتە زور. ءدىني كوشباسشىلاردىڭ ءار ايتقان ويى, ۇندەۋى, ءتىپتى قاراپايىم ارەكەتى ميلليونداعان, ميللياردتاعان ادامنىڭ ومىرىنە ىقپال ەتە الادى. سوندىقتان باستى مىندەت – ءوز جاماعاتتارىمىزدىڭ ساناسىن وياتۋ, ادامدارعا دۇرىس باعىت-باعدار بەرۋ. قازىر قوعامدا جەككورۋشىلىككە, توزىمسىزدىككە, الاۋىزدىققا يتەرمەلەيتىن فاكتورلار از ەمەس. وسى ورايدا ءدىن كوشباسشىلارى تەرىس قۇبىلىستارعا قارسى تۇرۋعا مەيلىنشە اسەر ەتە الادى. ولار ادامزاتتى ىزگىلىككە, بەيبىتشىلىككە شاقىرىپ قانا قويماي, جاس بۋىنعا, اسىرەسە بالالارعا جول كورسەتەدى.
بۇل سەزد – جاي عانا جيىن ەمەس, بۇكىل الەمنىڭ ءدىن جەتەكشىلەرى باس قوساتىن حالىقارالىق پلاتفورما. ءبىر جاعىنان مۇنداي جيىن ءار دەلەگاتتىڭ ورتاق ماقسات جولىندا ناقتى قادامدارعا دايىن ەكەنىن اڭعارتادى. بايقاساق, الەمدەگى جاعدايلار ءبىر ءدىننىڭ شەڭبەرىندەگى ماسەلە ەمەس. سوندىقتان مۇنداي باسقوسۋلار وتكىر دە وزەكتى جاھاندىق تۇيتكىلدەردى اشىق تالقىلاپ, ورتاق شەشىم تابۋعا جول اشادى. وسىلاي عانا بەيبىتشىلىكتى ۇلتتىق دەڭگەيدە عانا ەمەس, بۇكىل الەمدە نىعايتۋعا مۇمكىندىك بار.
قازىرگى پالەستينالىقتاردىڭ تاعدىرىنا ساياسات ايرىقشا ىقپال ەتتى. وسى ماسەلە توڭىرەگىندە ءبىز بۇۇ-عا جۇگىنەمىز. ەسكە سالساق, وتكەن عاسىردا ەكى دۇنيەجۇزىلىك سوعىس ميلليونداعان ادامنىڭ ءومىرىن جالماعان سوڭ, بۇۇ ءدال وسىنداي قاسىرەتتەردى بولدىرماۋ ءۇشىن قۇرىلعان ەدى. حالىقارالىق قاۋىمداستىقتار دا بەيبىتشىلىككە قارسى باعىتتالعان وقيعالارعا ءۇنسىز قالماي, باتىل ءارى ناقتى پوزيتسيا تانىتۋى قاجەت.
مۇنداي كەزەڭدەردە ءدىن كوشباسشىلارى دا بەيتاراپ قالا المايدى. ولار ءدىننىڭ اتىمەن جاسالعان وزبىرلىقتار مەن قىلمىستاردىڭ شىنايى سەنىم مەن رۋحاني قۇندىلىقتارعا ەش قاتىسى جوق ەكەنىن اشىق مالىمدەۋگە ءتيىس. سەبەبى ءدىن كوشباسشىلارىنىڭ ميلليونداعان ءىزباسارلارى بار, ولاردىڭ ءسوزى مەن ۇستانىمى قوعامنىڭ مورالدىق باعدارىن ايقىندايدى. جاقسىلىق پەن جاماندىقتى اجىراتىپ, ادىلەت پەن ز ۇلىمدىقتىڭ شەكاراسىن ناقتىلاۋ – ءدىن قايراتكەرلەرىنىڭ باستى ميسسياسى.
تاريح كورسەتكەندەي, ساياسي جانە ءدىني كۇش-جىگەر بىرىككەندە ناقتى شەشىمدەرگە قول جەتكىزۋگە بولادى. ارينە, دۇنيەجۇزىندە كوپتەگەن كونفەرەنتسيا وتەدى, ءتۇرلى مىنبەرلەردەن ادەمى سوزدەر ايتىلادى. بىراق باستىسى – ناقتى ناتيجە. سول تۇرعىدان قاراعاندا, استانادا وتكەن سەزد سوزدەن گورى ىسكە باسىمدىق بەرۋ قاجەتتىگىن كورسەتىپ وتىر. قازاقستان پرەزيدەنتى قاسىم-جومارت توقاەۆ تا ءوز سوزىندە وسىعان نازار اۋداردى: ءدىن كوشباسشىلارى بەيبىتشىلىك پەن كەلىسىمدى ىلگەرىلەتۋ ءۇشىن پراگماتيكالىق كوزقاراس تانىتىپ, شىنايى ناتيجەلەرگە قول جەتكىزۋگە ۇمتىلۋعا ءتيىس دەدى.
شەيح مۇحاممەد بەن ابدۋلكاريم ءال-يسا,
دۇنيەجۇزىلىك يسلام ليگاسىنىڭ باس حاتشىسى
