جالپى وتىرىستا دەپۋتاتتارعا «جاساندى ينتەللەكت تۋرالى» زاڭ جوباسىن ىلەسپە تۇزەتۋلەرىمەن ەكىنشى وقىلىمدا قاراۋ ۇسىنىلادى. ءماجىلىس دەپۋتاتتارى باستاما كوتەرگەن قۇجاتتار جاساندى ينتەللەكت تەحنولوگيالارىن قولدانۋعا بىرىڭعاي قۇقىقتىق نەگىز قۇرۋعا باعىتتالعان. ولار تۇتىنۋشىلاردىڭ جانە دەربەس دەرەكتەردىڭ قۇقىقتارىن قورعاۋدى قاراستىرادى. سونداي-اق جاساندى ينتەللەكتىنى قولدانۋعا بايلانىستى قۇقىقبۇزۋشىلىقتار ءۇشىن اكىمشىلىك جاۋاپكەرشىلىكتى بەلگىلەيدى. زاڭنىڭ قابىلدانۋى مەملەكەت باسشىسىنىڭ جولداۋىن ءىس جۇزىندە جۇزەگە اسىرۋداعى ماڭىزدى قادام بولماق.
سونىمەن قاتار دەپۋتاتتاردىڭ تالقىلاۋىنا قازاقستان مەن ماروككو اراسىنداعى ۇستاپ بەرۋ, سوتتالعان ادامداردى بەرۋ جانە قىلمىستىق ىستەر بويىنشا ءوزارا قۇقىقتىق كومەك تۋرالى كەلىسىمدەر ەنگىزىلدى. كەلىسىمدەر ەكى مەملەكەتتىڭ قۇزىرلى ورگاندارىنىڭ ەكستراديتسيا, سوت ۇكىمدەرىن ورىنداۋ جانە قىلمىستىق ىستەر بويىنشا قۇقىقتىق كومەك كورسەتۋ سالاسىنداعى ىنتىماقتاستىعىن دامىتۋعا باعىتتالعان.
جالپى وتىرىستا قىلمىستىق جولمەن الىنعان كىرىستەردى زاڭداستىرۋ (جىلىستاتۋ) جانە تەرروريزمدى قارجىلاندىرۋ تاۋەكەلدەرىن باعالاۋ حالىقارالىق ورتالىعىن قۇرۋ تۋرالى كەلىسىمدى راتيفيكاتسيالاۋ تۋرالى زاڭ جوباسىن قاراۋ ۇسىنىلادى. ورتالىق حالىقارالىق اقپاراتتىق جۇيە رەتىندە جۇمىس ىستەيدى, ول تمد ەلدەرىنىڭ قارجىلىق بارلاۋ بولىمشەلەرىن انىقتالعان قاۋىپ-قاتەرلەرگە ۋاقتىلى ارەكەت ەتۋ ءۇشىن بىرىكتىرەدى. سونداي-اق ەلدەرگە ترانسشەكارالىق تاۋەكەلدەردى تالداۋعا, ستاتيستيكالىق دەرەكتەرمەن الماسۋعا, ولاردى تومەندەتۋ بويىنشا ۇسىنىمدار ازىرلەۋگە جانە فاتف حالىقارالىق ستاندارتتارىنا سايكەس تاسىلدەردى ۇيلەستىرۋگە مۇمكىندىك بەرەدى.
سونداي-اق جالپى وتىرىس بارىسىندا ءماجىلىس كوميتەتتەرى جاڭا زاڭ جوبالارىن جۇمىسقا الادى. كونستيتۋتسيالىق سوت شەشىمدەرىن ورىنداۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى, قىلمىستىق-پروتسەستىك كودەكس پەن اكىمشىلىك قۇقىق بۇزۋشىلىق كودەكسىنە تولىقتىرۋلار ەنگىزۋ, سونداي-اق قازاقستان مەن موڭعوليا ۇكىمەتتەرى اراسىنداعى زەينەتاقى سالاسىنداعى ىنتىماقتاستىق تۋرالى كەلىسىم بار.
