مەملەكەت باسشىسىنا سپورت سالاسىن كەشەندى رەفورمالاۋعا قاتىستى بۇعان دەيىن بەرگەن تاپسىرمالارىنىڭ ورىندالۋ بارىسى باياندالدى.
پرەزيدەنتكە بالالار مەن جاسوسپىرىمدەر سپورتىن قولداۋ, حالىقارالىق ىنتىماقتاستىقتى ارتتىرۋ, سپورتقا عىلىمي تاسىلدەردى ەنگىزۋ, بيۋدجەت قاراجاتىن وڭتايلاندىرۋ جانە زاڭنامالىق بازانى جەتىلدىرۋ جونىندە ەسەپ بەرىلدى.
ەربول مىرزابوسىنوۆتىڭ ايتۋىنشا, سپورت سالاسىندا ۆەرتيكالدى باسقارۋ جۇيەسىن قالىپتاستىرۋ جۇمىسى قارقىندى جۇرگىزىلىپ جاتىر. سالانىڭ جاعدايىنا كەشەندى تالداۋ جۇرگىزىلگەننەن كەيىن بىرقاتار وبلىستا سپورت باسقارمالارىنىڭ باسشىلارى تاعايىندالدى, جۇمىس تيىمدىلىگىنىڭ ناقتى كورسەتكىشتەرى بەلگىلەنىپ, سپورتشىلار مەن جاتتىقتىرۋشىلارعا بەرىلەتىن تولەمدەر مولشەرى بىرىڭعاي كورسەتكىشكە كەلتىرىلدى. سونىمەن قاتار سپورتتىڭ باسىم تۇرلەرىنە قويىلاتىن ىرىكتەۋ تالاپتارى انىقتالدى.
بيىل كۇشىنە ەنگەن «دەنە شىنىقتىرۋ جانە سپورت تۋرالى» زاڭنىڭ جاڭا رەداكتسياسى بەلسەندى جۇزەگە اسىرىلىپ جاتىر. اتالعان زاڭ بيۋدجەت قاراجاتىن ءتيىمدى پايدالانۋعا, سپورتتى دامىتۋ ءۇشىن ونىڭ باسىم تۇرلەرىن ايقىنداۋعا, كاسىپقوي كلۋبتارعا تولەنەتىن تولەمدەرگە ليميت ەنگىزۋگە باعىتتالعان.
مەملەكەت باسشىسىنا شەتەلدىك تۋريستەردى تارتۋ جانە زاڭنامالىق بازانى جەتىلدىرۋ شارالارى تۋرالى ايتىلدى. پرەزيدەنت تاپسىرماسى بويىنشا ششۋچە-بۋراباي كۋرورتتىق ايماعى مەن ماڭعىستاۋدى دامىتۋدىڭ كەشەندى جوسپارى ازىرلەندى. الماتى تاۋ كلاستەرىن دامىتۋ جوسپارى دايىندالىپ جاتىر. سونداي-اق كۋرورتتى وڭىرلەردى وركەندەتۋگە ارنالعان ۆەدومستۆوارالىق جول كارتاسى ازىرلەندى. وندا تۋريستەردىڭ قاۋىپسىزدىگىن قامتاماسىز ەتۋگە, سانيتارلىق جاعدايدىڭ ستاندارتتارىن كوتەرۋگە جانە كولىك قولجەتىمدىلىگىن ارتتىرۋعا ەرەكشە كوڭىل بولىنگەن.
مەملەكەت باسشىسى مينيسترگە بىرقاتار مىندەت جۇكتەدى. اتاپ ايتقاندا, ۆەرتيكالدى باسقارۋ جۇيەسىن ەنگىزۋدى جالعاستىرۋ, فۋتبول كلۋبتارىن جەكەشەلەندىرۋدى جەدەلدەتۋ قاجەت. بۇدان بولەك, تۋريزم سالاسىنداعى زاڭنامانى ودان ءارى جەتىلدىرۋ ماڭىزدى مىندەت رەتىندە اتالدى.
