قازىرگى كەزدە «ەلەكتر جابدىقتارى» ماماندىعى بويىنشا ەلەكترومەحانيكا زاۋىتىندا جۇمىس ىستەپ جاتقان الماتى تەلەكوممۋنيكاتسيا جانە ماشينا جاساۋ كوللەدجىنىڭ تۇلەكتەرى تەوريالىق بىلىممەن قاتار الەۋمەتتىك سەرىكتەستەرمەن بىرلەسكەن تاجىريبەلىك داعدىلارعا ماشىقتانۋدا. بىلتىرعى وقۋ جىلىندا كوللەدجدىڭ التى تۇلەگى جيناقتالعان ترانسفورماتورلىق قوسالقى ستانسالاردىڭ سلەسار-جيناقتاۋشىسى بولىپ زاۋىتقا جۇمىسقا قابىلدانىپ, لايىقتى جالاقىمەن, الەۋمەتتىك قولداۋمەن قامتاماسىز ەتىلگەن بولاتىن. بيىلعى وقۋ جىلىندا 25 ستۋدەنت ءدۋالدى وقىتۋ فورماتى بويىنشا وندىرىستىك تاجىريبەدەن ءوتىپ جاتىر.
– «جۇمىسشى ماماندىقتار جىلى» جاريالانعان سوڭ, قالا كوللەدجدەرىمەن تىعىز ءارى بەلسەندى جۇمىس ىستەي باستادىق. سولاردىڭ ءبىرى – الماتى تەلەكوممۋنيكاتسيا جانە ماشينا جاساۋ كوللەدجى. قازىر زاۋىتتا كوللەدجدىڭ 50-دەن استام ستۋدەنتى جۇمىس ىستەيدى. ولاردىڭ التاۋى رەسمي تۇردە جۇمىسقا قابىلدانىپ, ايىنا 500 مىڭ تەڭگەدەن استام جالاقى الىپ وتىر. ستۋدەنتتەر زاۋىتقا ءبىرىنشى كۋرستان باستاپ وندىرىستىك تاجىريبەگە قابىلدانۋ تاجىريبەسى كەڭ تاراعان. ءدۋالدى وقىتۋ بارىسىندا ستۋدەنتتەردىڭ 9 اي تاجىريبەدەن ءوتۋى قاراستىرىلىپ وتىر. كوللەدجبەن ارىپتەستىك اياسىندا جىل سايىن 30-40 ستۋدەنت قابىلداپ وتىرۋ ءداستۇرلى شاراعا اينالىپ, ولاردىڭ كوپشىلىگى تۇراقتاپ, جۇمىسقا ورنالاسىپ جاتادى, – دەيدى «الماتى ەلەكترومەحانيكا زاۋىتىنىڭ» باسقارما توراعاسى اسحات ەرگەشەۆ.
ال الماتى اۆتومەحانيكا كوللەدجى «كولىككە تەحنيكالىق قىزمەت كورسەتۋ, جوندەۋ مەن پايدالانۋ» باعىتى بويىنشا ماماندار دايارلاۋدا جەتەكشى ورىندى يەلەنىپ وتىر. بۇل ەلىمىزدە جۇمىسقا ورنالاسۋ مۇمكىندىگى جوعارى, ەڭ سۇرانىسقا يە باعىتتىڭ ءبىرى سانالادى. كوللەدج تۇلەكتەرى ءىرى اۆتوسەرۆيستەر مەن كولىك كاسىپورىندارىندا ءساتتى جۇمىس ىستەپ ءجۇر. ولاردىڭ كوپشىلىگى اۆتوكولىككە قاتىستى ءىس-شارالار مەن كورمەلەرگە قاتىسىپ, بىلىكتى مەحانيكتەر, اۆتوەلەكتريكتەر, اۆتوجوندەۋ شەبەرى رەتىندە تانىلعان. كەيبىرى ءوزىنىڭ جەكە سەرۆيس ستانساسىن اشىپ العان.
– «الماتى اۆتومەحانيكا كوللەدجىمەن 20 جىلدان بەرى تىعىز جۇمىس ىستەپ كەلەمىز. ءبىرىنشى كۋرس ستۋدەنتتەرىنىڭ ءوزى جاقسى ناتيجە كورسەتىپ جاتادى. ندە-كوللەدجدى بىتىرگەننەن كەيىن جۇمىسقا قالىپ جاتقان تۇلەكتەر دە كوپ. قازىر زاۋىتتا جۇمىس ىستەپ جاتقان تۇلەكتەر بىلىكتىلىگىمەن كوزگە ءتۇسىپ ءجۇر, – دەيدى «سۆس-ترانس» جشس سەرۆيس ورتالىعىنىڭ ديرەكتورى تايىر نۇرلانوۆ.
كوللەدجدە مودۋلدىك-قۇزىرەتتىلىككە نەگىزدەلگەن وقىتۋ ءادىسى ەنگىزىلە باستادى. ستۋدەنتتەر وقۋ بارىسىندا-اق تاجىريبە جيناقتاپ, ەڭبەك نارىعىندا باسەكەگە قابىلەتتىلىگىن دالەلدەپ جاتىر. «مەن بۇل كومپانيادا ءبىر جىلدان بەرى گەومەتريست بولىپ ىستەيمىن. ەكى جىل وسى كاسىپورىندا كاسىبي تاجىريبەدەن ءوتتىم. العاشىندا جاي اۆتومەحانيك بولىپ ىستەپ, كەيىن مەنى گەومەتريست بولىپ قابىلداندىم. بۇل مەنىڭ كوللەدجە العان ءبىلىمىمنىڭ ناتيجەسى» دەيدى نايل باباەۆ.
قالاداعى كوللەدجدەر جەتىستىگىنىڭ ءبىرى – ستۋدەنتتەردىڭ بىلىكتىلىگىن كورسەتىپ, دايارلىق ساپاسىن دالەلدەۋگە مۇمكىندىك بەرەتىن WorldSkills جارىسىنا قاتىسۋى. وڭىرلىك چەمپيوناتتاردا الماتى اۆتومەحانيكا كوللەدج ستۋدەنتتەرى «كۋزوۆ جوندەۋ», «اۆتوكولىكتى تەحنيكالىق قىزمەت كورسەتۋ جانە جوندەۋ» قۇزىرەتتىلىگى بويىنشا جۇلدەلى ورىندارعا يە بولىپ ءجۇر. بيىل قازان ايىندا كوللەدجدە «اۆتوكولىك قۇرالدارىن تەحنيكالىق قىزمەت كورسەتۋ, جوندەۋ جانە پايدالانۋ» ماماندىعى بويىنشا قۇزىرەتتەر ورتالىعى اشىلماق. قالا اكىمدىگى مەن ءبىلىم باسقارماسىنىڭ تەحنيكالىق جانە كاسىپتىك ءبىلىم بەرۋ جۇيەسىن جاڭعىرتۋ اياسىندا قۇرىلعان قۇزىرەتتەر ورتالىعى اۆتوسەرۆيس سالاسىندا جوعارى بىلىكتى ماماندار دايارلاۋعا ارنالعان ۇلگىلى الاڭعا اينالىپ, WorldSkills حالىقارالىق ستاندارتتارىنا ساي كەلەتىن زاماندىق ءبىلىم بەرۋ باعدارلامالارىن جۇزەگە اسىرۋعا مۇمكىندىك بەرەدى. كوللەدج وقىتۋشىلارى ەستونيا, لاتۆيا, فينليانديا, وڭتۇستىك كورەيا مەن قىتايدا تاعىلىمدامادان ءوتتى.
ەڭبەك نارىعىندا تۋريزم جانە قوناقجايلىلىق يندۋسترياسى كوللەدجى تۇلەكتەرىنە دە سۇرانىس ارتقان. كوللەدج باسشىلىعى بيزنەسپەن ىنتىماقتاسىپ, تاجىريبەمەن ۇشتاسقان وقۋ ءادىسىن ساتىمەن جۇزەگە اسىرىپ كەلەدى. كوللەدج كوپ جىل بويى قوناق ءۇي مەن مەيرامحانا بيزنەسىنە كادر دايارلاپ كەلە جاتقان تەحنيكالىق جانە كاسىپتىك ءبىلىم بەرەتىن ەلىمىزدەگى جەتەكشى مەكەمە سانالادى. سالالىق كاسىپورىندارمەن تىعىز بايلانىس ورناتا وتىرىپ, كوللەدج وقۋ ساپاسىن جوعارى دەڭگەيدە ۇستاپ تۇرۋمەن قاتار, ستۋدەنتتەرىنە قىزمەتتە ءوسىپ-ونەتىن مۇمكىندىك ۇسىنا الادى.
بۇگىندە كوللەدج قالاداعى 280 كاسىپورىنمەن – قوناق ۇيلەر, مەيرامحانالار, تۋريستىك كومپانيالارمەن ىنتىماقتاستىق تۋرالى كەلىسىمشارتقا وتىرعان. كوللەدج ديرەكتورى نۇرداۋلەت جابىقباەۆتىڭ ايتۋىنشا, جۇمىس بەرۋشىلەرمەن, الەۋمەتتىك سەرىكتەستەرمەن تىعىز بايلانىس ورناعان. بۇل ستۋدەنتتەردىڭ جۇمىسقا جىلدام ورنالاسۋىنا مۇمكىندىك بەرەدى. بيىل كوللەدجدى 460 ستۋدەنت بىتىرسە, ولاردىڭ 80 پايىزدان استامى ءوز ماماندىعى بويىنشا جۇمىسقا ورنالاستى.
كوللەدجدە تۇلەكتەردىڭ ءوسۋى مەن جۇمىسقا ورنالاسۋىن قامتاماسىز ەتەتىن ارنايى ورتالىق جۇمىس ىستەيدى. بۇل ورتالىق تۇلەكتەردىڭ وندىرىستە جۇمىسقا ورنالاسۋ كورسەتكىشىن بارىنشا ارتتىرۋعا تىرىسادى. «مۇندا ءتۇرلى شەبەرلىك ساباقتارى, قوناق دارىستەرى وتكىزىلەدى. ءبىز جۇمىس بەرۋشىلەردى شاقىرىپ, تۇلەكتەرگە جۇمىسقا ورنالاسۋ جولدارىن تۇسىندىرەمىز, جارمەڭكەلەر ۇيىمداستىرامىز» دەيدى وقۋ-وندىرىستىك جۇمىس جونىندەگى ورىنباسار گ ۇلىم ومىربەكوۆا. كوللەدج باسشىلىعى جوعارى ناتيجەگە الەۋمەتتىك سەرىكتەستىك پەن كاسىبي ماماندار دايارلاۋعا باعىتتالعان تۇراقتى جۇمىستىڭ ارقاسىندا قول جەتكىزگەنىن ايتادى.
