فوتو: ەرلان ومار
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, 2025 جىلدىڭ باسىنان بەرى رەسپۋبليكالىق بيۋدجەتتەن بالا تۋىنا بايلانىستى 41,7 ملرد تەڭگە سوماسىندا 230,8 مىڭ ادام, ونىڭ ىشىندە تامىز ايىندا 29,2 مىڭ ادام 5,3 ملرد تەڭگە سوماسىندا جاردەماقى العان.
«بالاعا كۇتىم جاسايتىن ادام مىندەتتى الەۋمەتتىك ساقتاندىرۋ جۇيەسىنە قاتىسۋشى بولىپ تابىلماعان جاعدايدا تۋعان, اسىراپ العان, سونداي-اق قورعانشىلىققا العان بالالارى بار, ەگەر ولار باسقا اتا-انانىڭ وتباسىندا ەسكەرىلمەسە, وگەي بالالارى بار ادامداردىڭ (وتباسىلاردىڭ) بالا كۇتىمىنە بايلانىستى جاردەماقى الۋعا قۇقىعى بار. ەسەپتى كەزەڭدە 1,5 جاسقا تولعانعا دەيىن بالا كۇتىمى بويىنشا جاردەماقىمەن 29,1 ملرد تەڭگە سوماسىندا ورتا ەسەپپەن 124,3 مىڭ ادام قامتىلدى, ونىڭ ىشىندە تامىز ايىندا 3,7 ملرد تەڭگە سوماسىن 125,8 مىڭ ادام الدى», دەلىنگەن حابارلامادا.
بيىلعى بالا تۋىنا ارنالعان جاردەماقى مولشەرى:
- ءبىرىنشى, ەكىنشى, ءۇشىنشى بالاعا – 38,0 اەك نەمەسە 149 416 تەڭگە;
- ءتورتىنشى جانە ودان كەيىنگى بالالارعا – 63,0 اەك نەمەسە 247 716 تەڭگە.
بالا 1,5 جاسقا تولعانعا دەيىن ونىڭ كۇتىمىنە بايلانىستى تولەنەتىن جاردەماقى اي سايىن كەلەسىدەي مولشەردە تولەنەدى:
- ءبىرىنشى بالاعا – 5,76 اەك نەمەسە 22 648 تەڭگە;
- ەكىنشى بالاعا – 6,81 اەك نەمەسە 26 777 تەڭگە;
- ءۇشىنشى بالاعا – 7,85 اەك نەمەسە 30 866 تەڭگە;
- ءتورتىنشى جانە ودان كەيىنگى بالالارعا – 8,90 اەك نەمەسە 34 995 تەڭگە.
سونىمەن قاتار, جۇمىس ىستەيتىن ايەلدەرگە جۇكتىلىك, بوسانۋ نەمەسە بالا اسىراپ الۋعا بايلانىستى تابىسىنان ايىرىلعان جاعدايدا مەملەكەتتىك الەۋمەتتىك ساقتاندىرۋ قورىنان (ماسق) ارنايى تولەم تاعايىندالادى. بۇل تولەم ەڭبەككە جارامسىزدىق پاراعىندا كورسەتىلگەن بارلىق كۇنگە تولەنەدى جانە مولشەرى سوڭعى 12 ايداعى ورتاشا ايلىق تابىسقا نەگىزدەلىپ ەسەپتەلەدى.
«اتالعان بىرجولعى تولەمدى جىل باسىنان بەرى جالپى سوماسى 210,6 ملرد تەڭگەگە 148,3 مىڭ ادام الدى, ونىڭ ىشىندە مامىر ايىندا 20 ملرد تەڭگە سوماسىنا 18,6 مىڭ ادام الدى. 2025 جىلدىڭ 5 ايىندا تاعايىندالعان تولەمنىڭ ورتاشا مولشەرى 1 500 347 تەڭگەنى قۇرادى», دەلىنگەن حابارلامادا.
سونداي-اق, جۇمىس ىستەيتىن اتا-انالارعا بالاسى 1,5 جاسقا تولعانعا دەيىن كىرىستەن ايىرىلعان جاعدايدا ماسق ارقىلى اي سايىنعى تولەم قاراستىرىلعان. بۇل تولەم بالانىڭ تۋعان كۇنىنەن باستاپ تاعايىندالىپ, سوڭعى 2 جىلداعى ورتاشا ايلىق تابىستىڭ 40%-ىن قۇرايدى. ەگەر ءبىر ۋاقىتتا بىرنەشە بالا دۇنيەگە كەلسە, تولەم ءار بالاعا جەكە ەسەپتەلەدى.
اتالعان تولەم بويىنشا 2025 جىلدىڭ 8 ايىندا بۇل تولەم 289,3 ملرد تەڭگەگە 170,4 مىڭ ادامعا تاعايىندالعان. ونىڭ ىشىندە تولەم تامىز ايىندا 19,6 مىڭ الۋشىعا, تولەمنىڭ سوماسى مامىر ايىندا 35,1 ملرد تەڭگەنى قۇرادى. 8 ايداعى تولەمنىڭ اي سايىنعى ورتاشا مولشەرى – 87 849 تەڭگە.
