جاستار اراسىندا الەم بىرىنشىلىگىنىڭ كۇمىس جۇلدەگەرى اسىلجان ەسەنكەلدى 61 كگ سالماقتا سىنعا ءتۇسىپ, العاشقى اينالىمدا شۆەيتساريالىق نيلس لەۋتەرت پەن اۋستراليالىق گەورگي وكوروكوۆتى مەرزىمىنەن بۇرىن ۇتتى. سودان كەيىن ونىڭ جولى توكيو وليمپياداسىنىڭ جەڭىمپازى, الەمنىڭ ەكى دۇركىن چەمپيونى زاۋر ۋگۋەۆپەن قيىستى. ءبىرىنشى كەزەڭدە ەسەنكەلدى رەسەيدىڭ داڭقتى بالۋانىمەن تەڭ دارەجەدە ايقاستى. بىراق ۇزىلىستەن كەيىن قارقىنىن كۇرت كۇشەيتكەن ۋگۋەۆ قانداسىمىزعا باس كوتەرتپەدى. جۇبانىش بەلدەسۋىندە اسىلجان ارمەنيالىق مانۆەل حندزرتسياننىڭ تاس-تالقانىن شىعاردى.
ءۇشىنشى ورىنعا تارتىس دراماعا تولى بولدى. اسىلجان اقش-تىڭ 18 جاستاعى اسا دارىندى شەبەرى, پانامەريكا ويىندارىنىڭ جەڭىمپازى دجاكسەن فوررەستپەن ابدەن ارپالىستى. بىردە فوررەست, بىردە ەسەنكەلدى العا شىقتى. باسەكەنىڭ اياقتالۋىنا 3 سەكۋند قالعاندا 9:8 ەسەبىمەن اسىلجان الدا كەلە جاتتى. سول ساتتە امەريكالىققا بۇيرەگى بۇرعان تورەشى بالۋانىمىزعا ەسكەرتۋ جاساپ, تارازى باسى تەڭەستى. ەرەجە بويىنشا مۇنداي جاعدايدا سوڭعى ۇپايدى كىم السا, جەڭىستىڭ سوعان بەرىلەتىنى بەلگىلى. بۇل شەشىممەن كەلىسپەيتىنىن بىلدىرگەن ۇلتتىق قۇرامانىڭ باس باپكەرى ماديار قۇرامىسوۆ دەرەۋ «چەلەندج» باستى. ءىستىڭ اق-قاراسىن انىقتاعان سوڭ, باس قازى كىلەمدەگى تورەشىنىڭ قاتەلىگىن مويىنداپ, جەڭىستى اعايىندى رولان مەن ەركەبۇلان كەشۋباەۆتاردىڭ شاكىرتىنە بەردى. ەسەپ – 10:8. ءسويتىپ, 23 جاستاعى اسىلجان ەسەنكەلدى الەم چەمپيوناتىنىڭ قولا جۇلدەگەرى اتاندى.
70 كگ سالماقتا كۇرەسكەن نۇرقوجا قايپانوۆ ءوزىن دە, جانكۇيەرلەرىن دە ءبىراز ابىرجىتتى. العاشىندا جاستار اراسىنداعى الەم, پانامەريكا چەمپيونى, 18 جاستاعى امەريكالىق پەتەر ديۋكتەن 0:4 ەسەبىمەن جەڭىلىپ جاتقان نۇرقوجا ەكىنشى كەزەڭدە جەڭىستى قارسىلاسىنىڭ ۋىسىنان ج ۇلىپ اكەتتى – 11:7. كوپ كەشىكپەي مەكسيكانىڭ ساقا سپورتشىسى, سان مارتە ءوز قۇرلىعىنىڭ تەڭدەسسىزى دەپ تانىلعان وستين گومەسپەن كۇش سىناستى. ءبىرىنشى كەزەڭنەن كەيىن قايپانوۆ 0:6 ەسەبىمەن ۇتىلىپ جاتتى. ەكىنشىسىندە «كامبەك» جاساپ, قاتارىنان 11 ۇپايدى ءوز ەنشىسىنە جازدى, ەسەپ – 11:7.
جارتىلاي فينالدا نۇرقوجانىڭ الەم چەمپيوناتىنىڭ قولا جۇلدەگەرى, ازيا ويىندارىنىڭ جەڭىمپازى, موڭعوليالىق تۇلعا ءتومور وچيرىنگە ءالى جەتپەدى – 2:5. قولا مەدال ءۇشىن باسەكەدە قازاقتىڭ قايسار ۇلى شەبەرلىك تانىتىپ, مولدوۆانىڭ ماقتانىشى ۆاسيل دياكوندى بوزكىلەمدە قامىرشا يلەدى. ەسەپ 13:2-گە جەتكەندە تورەشى كەزدەسۋدى توقتاتتى. ەندى نۇرقوجا قايپانوۆتىڭ قورجىنىندا الەم چەمپيوناتىنىڭ تولىق جۇلدە جيىنتىعى بار. 27 جاستاعى جەرلەسىمىز 2019 جىلى استانادا كۇمىسپەن كۇپتەلسە, 2024 جىلى تيرانادا التىن الدى. ەندى مىنە, زاگرەبتە قولا مەدالدى موينىندا جارقىراتتى.
جارىستىڭ العاشقى كۇنى بوزكىلەمگە شىققان الىشەر ەرعالي (125 كگ) بولگاريالىق الەن حۋبۋلوۆتىڭ وسال تۇسىن تابا المادى. كەيىنگى ەكى الەم چەمپيوناتىندا قولاعا قول سوزعان ازامات داۋلەتبەكوۆتىڭ دە (86 كگ) جولى بولمادى. باستاپقى باسەكەلەردە قارسىلاستارىن ايقىن باسىمدىقپەن ۇتقان بالۋانىمىز شيرەك فينالدا فرانتسيانىڭ نامىسىن قورعاعان شەشەن جىگىتى راقىم ماگامادوۆتان جەڭىلدى.
ەكىنشى كۇنى تاعى ءتورت سالماق دارەجەسى بويىنشا باسەكەلەر ءوتتى. تۇساۋكەسەر كەزدەسۋلەرىندە ادىلەت المۇحامەدوۆ (57 كگ) بەلارۋستىك ارايىن تيۋتريننەن, ايبەك ابدىقاسىموۆ (74 كگ) ماجارستاندىق مۇرات قۇراماگومەدوۆتەن, بولات ساقاەۆ تۇركيالىق يبراگيم جاپىراقتان جەڭىلدى. 92 كگ سالماقتا سىنعا تۇسكەن 20 جاستاعى كامىل كرۋگليەۆ العاشقى بەلدەسۋلەرىندە قىتايلىق حۋا زە مەن يزرايلدىك يۋري كالاشنيكوۆتى جەڭدى. الايدا شيرەك فينالدا وزىنەن 10 جاس ۇلكەن رەسەيدىڭ وكىلى امانۋللا گادجيماگومەدوۆتەن ايلاسىن اسىرا المادى. جۇبانىش بەلدەسۋىندە يتاليالىق بەندجامين ءحونيستى قاپى قالدىردى. قولا مەدال ءۇشىن تارتىستا كامىلدىڭ جولى ازيانىڭ ءۇش دۇركىن چەمپيونى ءامىر حوسسەين فيرۋزپۋرمەن قيىستى. بۇل باسەكە پارسى بالۋانىنىڭ ايقىن جەڭىسىمەن اياقتالدى.
ەركىن كۇرەس شەبەرلەرى اراسىنان ەڭ سوڭعى بولىپ جارىس جولىنا شىققان ناچىن كۋلار (65 كگ) مەن ريزابەك ايتمۇحان دا (97 كگ) ەل سەنىمىن اقتاي المادى. تىۆالىق لەگيونەر العاشقى ەكى قارسىلاسىن وڭاي ەڭسەرگەنىمەن, رەسەيلىك يبراگيم يبراگيموۆكە ەسە جىبەردى. ريزابەك وسى چەمپيوناتتا داڭقى جەر جارعان ابدۋلراشيد سادۋللاەۆتى الماستىرعان داعىستاندىق ماگومەد قۇربانوۆپەن كۇش سىناستى. بەلدەسۋ بارىسىندا تارازى باسى ۇزاق ۋاقىت بويى تەڭسەلىپ تۇردى. باسەكەنىڭ اياقتالۋىنا ساناۋلى سەكۋندتار قالعاندا ايتمۇحان ءبىر ۇپاي ايىرماشىلىعىمەن العا شىقتى. الايدا ايقاستىڭ اياقتالۋىنا نەبارى ءۇش سەكۋند قالعاندا تورەشى ءبىزدىڭ بالۋانعا ەسكەرتۋ بەردى. باپكەرلەر نارازىلىق ءبىلدىرىپ, «چەلەندج» باستى. بىراق ودان ەشتەڭە وزگەرگەن جوق. ءسويتىپ, وتاندىق ەركىن كۇرەس تاريحىنداعى تۇڭعىش الەم چەمپيونى ريزابەك ايتمۇحان حورۆاتياداعى چەمپيوناتتىڭ العاشقى اينالىمىنان سوڭ كورەرمەندەر قاتارىنا قوسىلدى.
قازىردە بارشا قازاق جانكۇيەرلەرى ايەلدەر كۇرەسى مەن گرەك-ريم كۇرەسى شەبەرلەرىنىڭ جولدارىنا ۇلكەن ۇمىتپەن قاراپ وتىر. جارىس 21 قىركۇيەكتە مارەسىنە جەتەدى.
