فورۋم Generative Nation تۇجىرىمداماسى اياسىندا ۇيىمداستىرىلىپ وتىر. بۇل – قازاقستاننىڭ جاڭا تەحنولوگيالارعا نەگىزدەلگەن ءبىلىمدى قوعام قۇرۋعا جانە ادام كاپيتالىن دامىتۋعا باعىتتالعان ستراتەگيالىق ۇستانىمىنىڭ ايعاعى.
فورۋمنىڭ باستى قوناقتارىنىڭ ءبىرى – بىرىككەن اراب امىرلىكتەرىنىڭ جاساندى ينتەللەكت جونىندەگى ءمينيسترى ومار ءال-ولاما. ول 2017 جىلدان بەرى ەلدىڭ تسيفرلىق ساياسات باعىتىنا جاۋاپتى جانە 2023 جىلى Time جۋرنالىنىڭ «AI سالاسىنداعى ەڭ ىقپالدى 100 تۇلعا» تىزىمىنە ەنگەن. ونىڭ مەملەكەتتىك تسيفرلىق ستراتەگيا قۇرۋداعى جانە حالىقارالىق ىنتىماقتاستىق ورناتۋداعى تاجىريبەسى Digital Bridge 2025 پىكىرتالاستارىنا تىڭ سەرپىن بەرەدى.
جاساندى ينتەللەكتىڭ بولاشاعى تاقىرىبىن الەمگە تانىمال فۋتۋرولوگ, Sinovation Ventures ۆەنچۋرلىق قورىنىڭ نەگىزىن قالاۋشى ءارى 01.AI كومپانياسىنىڭ باس ديرەكتورى كاي-فۋ لي جالعاستىرادى. بۇعان دەيىن ول Google China-نى باسقارعان, Microsoft Research Asia ورتالىعىن قۇرۋعا اتسالىسقان. «AI 2041» اتتى كىتابى الەمدىك بەستسەللەرگە اينالعان ول ەندى فورۋمدا جاساندى ينتەللەكتىڭ ەرتەڭىمىزگە ىقپالى جونىندەگى ءوز كوزقاراسىن ورتاعا سالادى.
سونىمەن قاتار ستەنفورد بيزنەس مەكتەبىنىڭ پروفەسسورى, ۆەنچۋرلىق كاپيتال جونىندەگى بەدەلدى زەرتتەۋشى يليا سترەبۋلاەۆ تەحنولوگيالاردىڭ جاھاندىق ەكونوميكاعا اسەرى تۋرالى اڭگىمەلەيدى. ونىڭ عىلىمي ەڭبەكتەرى الەمدىك باسىلىمداردا جاريالانىپ, عىلىمي يدەيالاردىڭ تابىستى بيزنەسكە قالاي اينالاتىنىن دالەلدەپ كەلەدى.
فورۋم تەك ءداستۇرلى تاقىرىپتارمەن شەكتەلمەيدى. اعىلشىن فۋتبولىنىڭ اڭىزى سول كەمپبەلل سپورتتاعى جاساندى ينتەللەكتىڭ قولدانىسى تۋرالى ويىمەن بولىسەدى. ال كومپيۋتەرلىك عىلىمنىڭ كلاسسيكتەرى – ايگىلى عالىم پيتەر نورۆيگ پەن تيۋرينگ سىيلىعىنىڭ لاۋرەاتى دجون حوپكروفت جاساندى ينتەللەكت پەن الگوريتمدەردىڭ بولاشاعى جايلى اڭگىمە وربىتەدى.
Digital Bridge بۇگىندە وڭىردەگى ەڭ اۋقىمدى IT ءىس-شارا رەتىندە تانىلدى. التى جىلدىڭ ىشىندە فورۋم 100 ەلدەن 67 مىڭنان استام قاتىسۋشىنىڭ باسىن قوسىپ, مىڭنان اسا سپيكەر مەن 550 مەملەكەتتىك جانە حالىقارالىق ۇيىم وكىلدەرىن ءبىر الاڭعا جينادى. بيىل فورۋم العاش رەت تولىق كوممەرتسيالىق نەگىزدە, بيۋدجەت قاراجاتىنسىز وتەدى. كەز كەلگەن ادام بيلەت ساتىپ الىپ, جىلدىڭ باستى تەحنولوگيالىق وقيعاسىنا قاتىسا الادى. بيلەتتەر digitalbridge.kz سايتىندا قولجەتىمدى.
Digital Bridge 2025 فورۋمىن وتكىزۋ سەرىكتەستەر قولداۋىنىڭ ارقاسىندا مۇمكىن بولدى. فورۋمنىڭ باس سەرىكتەسى – Freedom Bank Kazakhstan. التىن سەرىكتەستەر – Kaspi.kz جانە Yandex Qazaqstan, قولا سەرىكتەس – BI Group. تەحنولوگيالىق سەرىكتەستەر – IEC Telecom Kazakhstan جانە بيتريكس24.
فورۋمدى Astana Hub حالىقارالىق يننوۆاتسيالىق كلاستەرى قر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى جانە استانا قالاسى اكىمدىگىمەن بىرلەسىپ ۇيىمداستىرادى.
