الدىمەن 11–14 قىركۇيەك ارالىعىندا سانكت-پەتەربۋرگتەگى ايگىلى چينيزەللي تسيرك ارەناسىندا وتكەن «بەز گرانيتس» IV حالىقارالىق تسيرك ونەرى فەستيۆالىنە 20 ەلدەن 170-تەن استام ءارتىس قاتىسقانىن ايتا كەتۋ كەرەك.فەستيۆالدە ونەر كورسەتكەن قازاق مەملەكەتتىك تسيركىنىڭ ادىلەت تيكانوۆ جەتەكشىلىك ەتەتىن «حاسساك» توبى قالىڭ كورەرمەن مەن حالىقارالىق قازىلار القاسىن ءتانتى ەتتى.
قاتەلەسۋدى كەشىرمەيتىن ونەر جولىندا جۇرگەن وتانداستارىمىز 180 كگ تارتاتىن ءۇش ادامدى ماڭدايىمەن كوتەرىپ, كوپىرلى باسپالداقپەن الىپ وتەتىن ەكۆيليبر تريۋگىمەن جۇرتتى تاڭ قالدىردى. تسيرك مايتالماندارى قايتالاي الماي وتىرعان وسىناۋ تريۋكتىڭ ءالى كۇنگە دەيىن دۇنيەجۇزىندە بالاماسى جوق جانە ول Almaty Circus Festival-دە رەسمي رەكورد رەتىندە تىركەلگەن. سوندىقتان «حاسساك» توبى التىن جۇلدەنى داۋسىز جەڭىپ الدى. سونىمەن قاتار, قازاقستان تسيركى ءۇشىن تاعى ءبىر مارتەبەلى وقيعا – قازاق مەملەكەتتىك تسيركىنىڭ ديرەكتورى ماقسات ماراتبەك ۇلى اتالمىش فەستيۆالدە حالىقارالىق قازىلار القاسىنىڭ مۇشەسى رەتىندە شاقىرىلىپ, ەلىمىزدىڭ تسيرك ونەرىنىڭ كاسىبي وكىلى رەتىندە مويىندالعانى.
سول كۇندەرى ماسكەۋدە, تسۆەتنوي بۋلۆارداعى ن.نيكۋلين اتىنداعى تسيركتە تاعى ءبىر ماڭىزدى شارا – «ارتيست» III حالىقارالىق تسيرك فەستيۆالى ءوتتى. وعان الەمنىڭ 18 ەلىنەن ۇزدىك ونەرپازدار قاتىستى. قازاقستان اتىنان الماتى تسيركىنىڭ ءارتىسى تايسيا دەميدوۆا ونەر كورسەتتى. ونىڭ ەسىمى الەمدىك ساحنالاردا كەڭىنەن تانىمال. تايسيانىڭ قورجىنىندا مونتە-كارلوداعى حالىقارالىق فەستيۆالدىڭ التىن مەدالى, «يدول» فەستيۆالىنىڭ باس جۇلدەسى سىندى باسقا دا بەدەلدى ماراپاتتار بار.
ماسكەۋدە وتكەن فەستيۆالدە تايسيا تاعى دا جوعارى كاسىبي دەڭگەيىن دالەلدەپ, قولا جۇلدەگە يە بولدى. بۇل جەڭىس - ونىڭ وتاندىق تسيرك ونەرىندەگى ورنىن بەكەمدەي ءتۇسى دەسەك تە بولادى.
ال بايىرعى قازاق مەملەكەتتىك تسيركى – ەلىمىزدىڭ مادەني سالاسىنداعى بەتكە ۇستار ۇجىمداردىڭ ءبىرى. تسيرك ارتىستەرىنىڭ حالىقارالىق بايقاۋلارداعى تابىسى – قازاقستان تسيرك ونەرىنىڭ جوعارى دەڭگەيدە دامىپ كەلە جاتقانىن, ءارى قازاقستاندىق تسيرك مەكتەبىنىڭ الەم ساحناسىندا لايىقتى ورىن الاتىنىن ايقىندايدى.
