سۋرەتتى تۇسىرگەن – اۆتور
وسىدان ون التى جىل بۇرىن شاڭىراقتىڭ ۋىعى قادالعان ەدى, قازىر وردالى وتباسىنا اينالدى. وتاعاسى ءومىرحان اقىماش ۇلى ۇيىندەگى ون ەكى بالانىڭ ونىنشىسى. جارى گ ۇلىرىستى قاميقىزى دا ون بالالى وتباسىندا ءوسىپ-ونگەن. سودان دا شىعار, بالا كەزدەرىنەن كوپشىل, باۋىرمال بولىپ وسكەن ەكەۋىنىڭ ۇيلەرىنەن كىسى ارىلمايدى. كەلگەن مەيمانىن تورگە وزدىرىپ, تورەدەي كۇتۋ ەكەۋىنىڭ دە بالا كەزدەن سىڭگەن داعدىسى, ونەگە ەتكەن تاربيەلەرى.
ەكەۋى دە ەڭبەككە ەپتى. جاستايىنان كولىكتىڭ, تەحنيكانىڭ ءتىلىن جەتىك ۇعىنعان ءومىرحان بۇگىندە سۇيىكتى ءىسىن كاسىپكە اينالدىرىپ وتىر. كولىكتىڭ كەز كەلگەن اقاۋىن انىقتاپ, ونى سارتىلداتىپ قالپىنا كەلتىرۋ – كۇندەلىكتى تىرلىگى. العاشىندا كولىك جوندەۋ ورتالىعىنان ورىن جالعا الىپ, جۇمىس ىستەپ جۇرگەن وعان جەكە نىسان سالىپ الۋ تۋرالى وي كەلەدى. وسىدان ون جىل بۇرىن قاراعاندىداعى «كۇنگەي» شاعىن اۋدانىنان جەر الىپ, جارى ەكەۋى ادال ەڭبەكتىڭ ارقاسىندا ەڭسەلى ءۇي تۇرعىزدى. قازىر بالالارىنا الاڭدامايدى, ەمىن-ەركىن ءوز اۋلالارىندا, كوز الدارىندا اسىر سالىپ ويناپ ءجۇر. جارى گ ۇلىرىستى دا اۋىلدا وسكەندىكتەن شارۋاعا شيراق. ءۇي تۇرعىزاردا جولداسىنا ءبىر ءوزى قولعابىس ەتەدى. باستىسى, قولدارىنان كەلەدى. ءسويتىپ, ءۇيىنىڭ ىرگەسىنەن جەر الىپ, 250 شارشى مەتر بولاتىن نىسان سالادى. التى كولىككە ورىن بار. كولىكتىڭ ماي-سۋىن اۋىستىرىپ, قوزعالتقىشى, بەرىلىس قورابى سەكىلدى كەز كەلگەن بولشەكتى جوندەپ شىعارادى. قازىر بالالارىن دا ەڭبەككە باۋلىپ ءجۇر. الداعى كۇندەرى كاسىپ نىسانىن وزگە شەبەرلەرگە جالعا بەرىپ, تابىسىن ارتتىرۋدى كوزدەيدى.
گ ۇلىرىستى دا جەكە كاسىبىن اشىپ, وتباسىلىق تابىسقا ءتاپ-ءتاۋىر ۇلەس قوسىپ وتىر. نان سەبەتتەرىن ازىرلەيدى. ۇيدە وتىرىپ-اق توي-تومالاق پەن قۇدالىققا تاپسىرىس الادى. ءتىپتى ەت ىستايتىن قۇرىلعىسىمەن جىلقىنىڭ قازىسىن, جاياسىن, ۇيرەكتى دە ءدامدى ەتىپ جاسايدى.
جاقىندا مەملەكەت تاراپىنان قايتارىمسىز گرانت الدى. ول قاراجاتقا قاجەتتى قۇرال-جابدىقتار الۋدى جوسپارلاپ وتىر.
«كۇيەۋىم ەكەۋمىز بالالارىمىزدى بارىنشا ادال ەڭبەككە تاربيەلەۋدى ومىرلىك مۇراتىمىزعا اينالدىردىق. بالا كەزىنەن باستاپ جۇمساپ, وزىمىزگە قولقانات قىلدىق. قازىر سونىڭ قىزىعىن كورىپ وتىرمىز. اكەسىنە ەكى ۇل, مەنىڭ اسۇيدەگى شارۋاما ەكى قىزىم كومەكتەسەدى. قازى اينالدىرۋ, شۇجىق ەتتەرىن ازىرلەۋدى, ءتۇرلى دامدەۋىشىن كەلتىرىپ, ونى ىستاپ, كەپتىرۋدى قىزدارىم دا اجەپتاۋىر ۇيرەنىپ الدى. سوعان قۋانامىن. شارۋا ىستەپ ءجۇرىپ, اكەسى مەن ۇلدارى, اناسى مەن قىزدارى بولىپ سىرلاسامىز. باستىسى سول, بالالارىمىز ءبىلىمدى, ەڭبەكقور بولىپ وسسە دەگەن ءار قازاقتىڭ ارمانى بىزدە دە بار», دەيدى شاڭىراقتىڭ اناسى.
شاتتىققا بولەنگەن شاعىن مەملەكەت ۇلتتىق قۇندىلىقتاردى جوعارى باعالايدى. اكەلەرى ءومىرحان ءۇيىنىڭ اۋلاسىنا كيىز ءۇي تىگىپ قويىپتى. الا جازداي استى قازاقى ۇيدەن ىشەدى. كيىز ءۇيدىڭ ىشىندە قامشى, قاسقىردىڭ تەرىسى سەكىلدى كورنەكىلىكتەر ادەمى ۇيلەسىم تاپقان.
ء«وزىمىز بالا كەزدە كيىز ۇيدە وستىك قوي. سول سەبەپتى, قازاقى قاسيەتتى ۇعىنىپ وسسە ەكەن دەيمىز. بويلارىنا ۇلتتىق تاربيە سىڭىرسە ۇلتقا جانى اشيتىن بولادى», دەيدى ءومىرحان.
بۇل شاڭىراق ءۇشىن ءار جۇما – وتباسى كۇنى. جۇمانىڭ كەشىندە ءدامدى اس دايىنداپ, داستارقان باسىندا جينالىپ, ءبىر-بىرىنە سىيلىق ۇلەستىرىپ, اپتانىڭ قالاي وتكەنىن تالقىلاپ, دەمالىسقا جوسپار قۇرۋ ءومىر سالتىنا اينالعان. بارلىق اعايىن-تۋىس اۋىلدى اڭساسا, ءومىرحان يگەنوۆتىڭ ۇيىنە جينالادى. ويتكەنى ول – ىرىس ۇيالاپ, قۇت قونعان شاڭىراق.
قاراعاندى وبلىسى
