Astana Music Hall ساحناسىندا وتكەن سالتاناتتى كەشكە شىعارماشىلىق يندۋستريا مەن اقپارات قۇرالدارىنىڭ وكىلدەرى, مادەنيەت جاناشىرلارى جينالدى. ولاردىڭ بارلىعى ءبىر ارناعا توعىسىپ, قازاق كينوسىنىڭ جاڭا تىنىسىن اشقان ءساتتىڭ كۋاسى بولدى. Unico Play – جاي عانا تسيفرلىق پلاتفورما ەمەس, ول ۇلتتىق ونەردىڭ بولاشاعىن ايقىندايتىن باستاما, ساندىق ويىن-ساۋىقتىڭ جاڭا ستاندارتى رەتىندە ۇسىنىلدى. ونىڭ اتاۋى دا ءماندى: Unique Content, ياعني «قايتالانباس مازمۇن».
پلاتفورمانىڭ باستى ماقساتىنا توقتالعان Uni-Q Group باس پروديۋسەرى انار ءجۇنىسوۆا ۇلتتىق مازمۇندى الەمگە تانىتۋعا باسىمدىق بەرىلەتىنىن جەتكىزدى.
«ءبىز Unico Play ونلاين كينوتەاترىن جاي عانا شىعارىپ جاتقان جوقپىز. ءبىز قازاقستاندىق فيلمدەردى كورىپ, ماقتان تۇتۋدى ادەتكە اينالدىرىپ جاتىرمىز. ءبىز ءۇشىن ميلليونداعان ادامداردىڭ ءوز تىلىندە تاريحتى تانۋى, ال شەتەلدەگى كورەرمەندەردىڭ ءبىزدىڭ مادەنيەتىمىز تۋرالى ءبىلۋى ماڭىزدى», دەدى باس پروديۋسەر.
جاڭا سەرۆيس العاشقى كۇننەن-اق قولجەتىمدىلىگىمەن ەرەكشەلەندى. سمارتفوننان باستاپ Smart TV-گە دەيىن كەز كەلگەن قۇرىلعىدان كورۋگە بولادى. العاشقى ايدا جازىلىم تەگىن, كەيىن ايىنا نەبارى 999 تەڭگە تۇرادى. وسى قاراپايىم قولجەتىمدىلىكتىڭ ارقاسىندا كورەرمەن 10 مىڭ ساعاتتان استام مازمۇنعا جول اشادى.
جوبانىڭ وندىرىستىك الەۋەتىن ايقىنداعان Uni-Q Group پروديۋسەرى دميتري گۋدۋماك بۇل پلاتفورمانى «شىعارماشىلىق ليفت» دەپ اتادى.
«بۇل جوبانى جۇزەگە اسىرۋدا ءبىز ايماقتىق جانە جاھاندىق دەڭگەيدە كونتەنتتى ءوندىرۋ جانە تاراتۋ بويىنشا بارلىق تاجىريبەمىزدى پايدالاندىق. ءبىزدىڭ ماقساتىمىز – تولىققاندى ءوندىرىس تىزبەگىن قۇرۋ – جاس ستسەناريستەر پيتچيڭىنەن جانە ءوزىمىزدىڭ تۇپنۇسقا سەريالدارىمىز بەن فيلمدەرىمىزدى تۇسىرۋدەن باستاپ كونتەنتتى مونەتيزاتسيالاۋعا جانە بارلىق نارىقتاردا اۆتورلىق قۇقىقتاردى قورعاۋعا دەيىن. بۇل جاس قازاقستاندىقتار ءۇشىن «شىعارماشىلىق ليفت». ولاردىڭ الەۋەتى وراسان زور, تەك ونى دامىتۋىمىز كەرەك», دميتري گۋدۋماك.
Unico Play تەحنيكالىق تۇرعىدا دا زاماناۋي ۇلگىگە ساي. قازاق, ورىس, اعىلشىن تىلدەرىندەگى ينتەرفەيس, 4K ساپاسى, وفلاين رەجيم, بەس قۇرىلعىعا دەيىن ءبىر جازىلىمنان قولدانۋ مۇمكىندىگى جانە جاساندى ينتەللەكتكە نەگىزدەلگەن جەكە ۇسىنىستار وتاندىق ءونىمدى الەمدىك دەڭگەيدەگى سەرۆيستەرمەن تەڭەستىرىپ تۇر.
ال Unico Play باسشىسى دياس دوسمۇحانبەتوۆ پلاتفورمانىڭ تەحنيكالىق جەتىستىكتەرىن ەرەكشە اتاپ ءوتتى.
«ءبىز IT شەشىمدەرى بىزگە سىرتتان كەلەدى دەپ ويلاۋعا ۇيرەنگەنبىز. بىراق Unico Play كەرىسىنشە دالەلدەدى. قازاقستاندا ساپا مەن مۇمكىندىكتەرى جاعىنان جاھاندىق ويىنشىلارمەن باسەكەلەسەتىن پلاتفورما قۇرۋعا بولادى. ءبىز ونى ازىرلەۋ توبىمىزدىڭ كۇشىمەن ءبىر جىلعا جەتپەي ورىندادىق», دەدى ول.
پلاتفورمادا بيىلدىڭ وزىندە التى تۇپنۇسقا سەريال كورسەتىلمەك. تاعى 23 جوبا وندىرىستە تۇر. كىتاپحانا قورىندا قازاق تىلىندەگى الەمدىك پرەمەرالار, تانىمال تۇرىك جانە كارىس سەريالدارى, وتاندىق كينو كلاسسيكاسى, جۇزدەن استام تەلەارنا, سپورتتىق حابارلار مەن قازاق تىلىندەگى بالالارعا ارنالعان ەڭ ۇلكەن توپتاما بار.
جوبانىڭ العاشقى ينۆەستورلارىنىڭ ءبىرى, كاسىپكەر تيمۋر تۋرلوۆ بۇل باستاماعا قاتىستى ءوز كوزقاراسىن ءبىلدىردى.
«مەنىڭ ويىمشا, بۇل ماڭىزدى ءارى قاجەت جوبا. مۇمكىندىكتەردى توقىراتىپ قويماي, ولاردى دامىتىپ, جاستاردى وقىتۋعا باعىتتايتىن بارلىق كەمەل ءارى دەربەس باستامالار قولداۋ مەن جاردەمگە لايىق دەپ سەنەمىن. قازاق جەرى Netflix پەن HBO دەڭگەيىندە جارقىراۋعا لايىق تالانتتارعا تولى. ءبىز ولاردىڭ تابىسقا جەتۋى ءۇشىن بار كۇشىمىزدى سالامىز», دەدى ول.
سونىمەن قاتار, پلاتفورمانى دامىتۋعا «دارا» پرەزيدەنتتىك باستامالار قورى مەن وزگە دە جەكە ينۆەستورلار بەلسەندى قولداۋ كورسەتىپ وتىر. بۇل ۇلتتىق جوبانىڭ مەملەكەت, قوعام جانە بيزنەس تاراپىنان ۇلكەن سەنىمگە يە بولعانىنىڭ ايعاعى.
پرەمەرادان كەيىنگى اسەرىمەن بولىسكەن اكتەر ءارى ءانشى اقجول پىرىمبەتوۆ Unico Play-ءدىڭ قازاق كينوسى ءۇشىن تاريحي باستاما ەكەنىن ايتتى.
«بۇگىن Unico Play پلاتفورماسىنىڭ اشىلۋى بولدى. پلاتفورمانىڭ اشىلعانىنا مەن شىن جۇرەكتەن وتە قاتتى قۋانىشتىمىن. وسى پروداكشننىڭ ءبىر فيلمىنە تۇسكەنىمە دە قۋانىشتىمىن. ويتكەنى ءبىز قازاق كينوسىنا ۇلكەن ۇلەس قوسىپ جاتىرمىز. قازاق كينوسىن بۇكىل الەم كورىپ جاتسا – بۇل ناعىز جەڭىس. بىزگە دە جاقسى, وزگە ەلدەردىڭ كينولارىنا ءتۇسىپ, تاجىريبە جينايمىز. ءتىپتى وسكار الۋعا كىشكەنتاي ءبىر قادامدار قالعان سياقتى. سول سەبەپتەن ءبىزدىڭ پلاتفورمانى جۇكتەپ, كينولارىمىزدى كورىپ قولداڭىزدار», دەدى ول.
