بيىل فورۋم «مادەنيەتكە ورالۋ – جاڭا مۇمكىندىكتەر» تاقىرىبىندا ۇيىمداستىرىلدى. قاتىسۋشىلار مادەني مۇرانى ساقتاۋ جولدارىن, تسيفرلىق تەحنولوگيانىڭ ءرولىن, كرەاتيۆتى ەكونوميكانى دامىتۋ مەن ونەر ارقىلى حالىقارالىق ىنتىماقتاستىقتى نىعايتۋ ماسەلەلەرىن تالقىلادى.
مينيستر فورۋم بارىسىندا مادەنيەت ساياسي قۇرال ەمەس, رۋحاني بىرلىككە, جاسامپازدىققا جانە شابىتقا جەتەلەيتىن قاينار كوز ەكەنىن ايتتى. سونداي-اق ول مادەني كەڭىستىكتىڭ تاۋەلسىزدىگى مەن تازالىعىن ساقتاۋعا باعىتتالعان بىرلەسكەن شارالار قابىلداۋدى ۇسىندى. ايدا بالاەۆا نەگىزگى مۇمكىندىكتەر رەتىندە مادەنيەتتىڭ ءبىلىم بەرۋ قىزمەتىن, مادەني ديپلوماتيانى, كرەاتيۆتى ەكونوميكانى جانە تسيفرلىق تەحنولوگيالاردى اتاپ ءوتتى.
«كەيىنگى ونجىلدىقتاردا جاھاندانۋ, تسيفرلاندىرۋ, ۋربانيزاتسيا ءومىرىمىزدى كۇرت وزگەرتىپ جاتىر. بۇل ۇدەرىس ىنتىماقتاستىققا جاڭا جول اشقانىمەن, ءداستۇر مەن تاريحي جادتىڭ جوعالۋىنا دا قاۋىپ توندىرەدى. سوندىقتان مادەنيەتكە ورالۋ مۇرانى ساقتاۋ عانا ەمەس, ونى زاماناۋي الەمگە بەيىمدەۋدىڭ ايقىن كورىنىسى», دەدى مينيستر.
فورۋم اياسىندا ا.بالاەۆانىڭ رەسەي فەدەراتسياسىنىڭ مادەنيەت ءمينيسترى ولگا ليۋبيموۆامەن ەكىجاقتى كەزدەسۋى ءوتتى. جيىندا تاراپتار قازاقستان مەن رەسەيدىڭ مادەني-گۋمانيتارلىق سالاداعى ىنتىماقتاستىعىنىڭ قازىرگى جاعدايىن جانە كەلەشەگىن تالقىلادى. ايدا بالاەۆا رەسەيلىك تاراپقا مادەني باستامالاردى تۇراقتى قولداپ كەلە جاتقانى ءۇشىن العىس ءبىلدىردى.
اتاپ ايتقاندا, قازان ايىندا وتەتىن رەسەيدەگى قازاقستان مادەنيەتى كۇندەرىنىڭ باعدارلاماسى مازمۇندى بولعالى تۇر. جاڭا ترەتياكوۆ گالەرەياسىندا ءابىلحان قاستەەۆ اتىنداعى مەملەكەتتىك ونەر مۋزەيىنىڭ توپتاماسىنان الىنعان جاۋھارلار كورمەسى اشىلادى. كىشى تەاتر ساحناسىندا زاماناۋي فيلوسوفيالىق دراما «پاراسات مايدانى» ۇسىنىلادى. بۇل كۇندەرى رەسەيلىك كورەرمەن قازاقستان كينوسى مەن زاماناۋي قازاقستاندىق كينەماتوگرافيانىڭ جاڭا ەسىمدەرىمەن, وزەكتى تاقىرىپتارىمەن تانىسادى. قازاقستان مادەنيەتى كۇندەرىنىڭ قورىتىندى ءىس-شاراسى ەلىمىزدىڭ ونەرپازدارى قاتىساتىن گالا-كونتسەرتپەن اياقتالادى دەپ جوسپارلانىپ وتىر.
كەزدەسۋ قورىتىندىسىندا قوس مينيستر سەرىكتەستىكتى تەرەڭدەتۋگە, ۇزدىك تاجىريبە الماسۋعا, بىرلەسكەن جوبالاردى جۇزەگە اسىرۋعا جانە ەكى ەلدىڭ مادەنيەت مەكەمەلەرى اراسىنداعى تىكەلەي بايلانىستاردى دامىتۋعا نيەتتى ەكەندەرىن راستادى.
