ەلىمىزدە العاش رەت «Digital Nomad Residency» مارتەبەسى راسىمدەلدى. ونىڭ العاشقى يەگەرى – حالىقارالىق تاجىريبەسى بار «Senior Analytics» & «BI Engineer» پاۆەل فيلاتوۆ. ول قازاقستاندى ءومىر سۇرۋگە قولايلى ءارى كاسىبي قىزمەتىن جالعاستىرۋعا ىڭعايلى ەل رەتىندە تاڭداعانىن ايتادى.
«Digital Nomad Residency» ماعان جايلى ءومىر ءسۇرۋ مۇمكىندىگىن قارقىندى دامىپ جاتقان تەحنولوگيالىق ەكوجۇيەمەن ۇشتاستىرۋعا جول اشتى. ءراسىمنىڭ زاماناۋي ءارى ىڭعايلى جۇرگىزىلەتىنىن ەرەكشە اتاپ وتكىم كەلەدى. بۇل باعدارلاما IT-ماماندارعا جاڭا مۇمكىندىكتەرگە جول اشادى. قازاقستان كاسىبي تۇرعىدا دامۋ مەن حالىقارالىق ارىپتەستىك ءۇشىن زور الەۋەتكە يە. العاشقى رەزيدەنت اتانۋ مەن ءۇشىن ۇلكەن مارتەبە», دەدى پاۆەل فيلاتوۆ.
بۇل باستاما بيىل قاڭتاردا مەملەكەت باسشىسى قاسىم-جومارت توقاەۆتىڭ تاپسىرماسىمەن ىسكە قوسىلعان. قىسقا ۋاقىتتىڭ ىشىندە اتالعان باعدارلاما تسيفرلىق تەحنولوگيالار مەن جاساندى ينتەللەكت سالاسىنداعى الەمدىك دەڭگەيدەگى ۇزدىك مامانداردى تارتۋدىڭ ماڭىزدى قۇرالىنا اينالىپ ۇلگەردى. ال «Astana Hub» حالىقارالىق يننوۆاتسيالىق كلاستەرى وسى ۇدەرىستىڭ نەگىزگى پلاتفورماسىنا اينالدى.
جوبا بويىنشا ەلىمىزدە تۇرۋعا ىقتيارحات الۋعا ءوتىنىش بەرۋ ونلاين فورماتتا باستالادى. ودان كەيىن «Astana Hub» ماماندارى ۇمىتكەرلەردى ءار كەزەڭدە سۇيەمەلدەپ, زاڭناماعا سايكەس راسىمدەر تولىق اياقتالعانعا دەيىن كەڭەس بەرەدى. بۇگىندە اقش, كانادا, فرانتسيا, تۇركيا جانە تمد ەلدەرىن قوسا العاندا, 20 مەملەكەتتەن 270-تەن استام ءوتىنىم كەلىپ تۇسكەن. كانديداتتاردىڭ باسىم بولىگى – باعدارلامالاۋ, كيبەرقاۋىپسىزدىك, UI/UX-ديزاين جانە DevOps ماماندارى.
بۇعان دەيىن «Digital Nomad Visa» اياسىندا العاشقى قاتىسۋشىلار – الجير مەن بوتسۆانادان كەلگەن IT-ماماندار قونىستانىپ ۇلگەرگەن ەدى. «Digital Nomad Visa» تابىستى راستاۋدى تالاپ ەتپەيدى, ەلگە كىرۋدى جەڭىلدەتەدى جانە شەتەلدىك تە, وتاندىق تا كومپانيالارمەن جۇمىس ىستەۋگە مۇمكىندىك بەرەدى. ۆيزا يەگەرلەرى كەيىننەن «Digital Nomad Residency» الۋعا ءوتىنىش بەرە الادى. ال ۇزاقمەرزىمدى مارتەبەنىڭ راسىمدەلۋى ەلىمىزگە دەگەن قىزىعۋشىلىقتىڭ ارتىپ كەلە جاتقانىن جانە ەلدىڭ ايماقتىق تسيفرلىق حاب رەتىندەگى الەۋەتىن ايقىن كورسەتەدى.
باعدارلامانىڭ ءتارتىبى قانداي؟
«Digital Nomad Residency» IT-ماماندارعا ەلىمىزدە تۇراقتى تۇرۋعا ىقتيارحات الۋدى جەڭىلدەتىلگەن تارتىپپەن ۇسىنادى. ول ءۇشىن ۇمىتكەرلەر «Astana Hub» پورتالى ارقىلى ءوتىنىش بەرەدى. قۇجاتتار تىزىمىنە: شەتەلدىك پاسپورتتىڭ كوشىرمەسى, تۇيىندەمە, پورتفوليو, موتيۆاتسيالىق حات, سوتتالماعانى جونىندەگى انىقتاما جانە 3,5ح4,5 كولەمىندەگى فوتوسۋرەت كىرەدى. كانديداتقا قازاقستاننىڭ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنەن ونىڭ ماماندىعى سۇرانىسقا يە ەكەنىن راستايتىن رەسمي قۇجات بەرىلەدى. ودان كەيىن IT-مامان «eGov.kz» پورتالى ارقىلى «شەتەلدىك IT-ماماندارعا قازاقستاندا تۇراقتى تۇرۋعا رۇقسات بەرۋ» قىزمەتىنە ءوتىنىش جىبەرەدى. جۇيەدە قادام-قادام بويىنشا انكەتانى تولتىرىپ, قۇجاتتاردى تىركەپ ەلەكتروندى قول قويادى. ءوتىنىش 45 كۇن ىشىندە قارالادى. وڭ شەشىم قابىلدانعان جاعدايدا مامان قازاقستانعا كەلىپ, حالىققا قىزمەت كورسەتۋ ورتالىعىندا ءراسىمدى اياقتايدى.
