مانەۆرلەرگە 1500-دەن استام اسكەري قىزمەتكەر, شامامەن 200 اسكەري جانە ارنايى تەحنيكا, 30-دان استام ۇشۋ اپپاراتى قاتىستى. اۋە قۇرامىندا سۋ-30سم جويعىشتارى, سۋ-25 ۇشاقتارى جانە ءتۇرلى تىكۇشاقتار قولدانىلدى.
وقۋ-جاتتىعۋ بارىسىندا ۇشقىشتار شارتتى قارسىلاستىڭ اۋە قورعانىسىن بۇزىپ ءوتۋ, جاقىن قاشىقتىقتاعى اۋە شايقاسىن جۇرگىزۋ, جەرۇستى نىساندارىن جويۋ جانە جاپپاي سوققىنى تويتارۋ تاكتيكاسىن مەڭگەردى. راديوتەحنيكالىق بولىمشەلەرگە بارلاۋ-سوققى دروندارىمەن سوققى جاسالدى. SkyLark-1LEX جانە Anka ۇشقىشسىز اپپاراتتارى بارلاۋ جانە سوققى ماقساتىندا پايدالانىلدى. ال اۋە قورعانىسىندا س-300پس, س-125, بۋك-م2ە جانە تور-م2ك كەشەندەرى جۇمىلدىرىلدى.
العاش رەت اۋە ساناتىنداعى ر-60م زىمىراندارى سىناقتان وتكىزىلىپ, ولاردىڭ دالدىگى راستالدى. سونداي-اق اسكەري وقۋ ورىندارىنىڭ كۋرسانتتارى قۇراستىرعان جاڭا درونداردىڭ مۇمكىندىكتەرى كورسەتىلدى.
قارسىلاستىڭ ۇشقىشسىز اپپاراتتارىنا قارسى «الماز» راديوتەحنيكالىق كەشەنى, «يانتار» راديوەلەكتروندىق كۇرەس جۇيەسى, «مارجان» سپۋتنيكتىك ناۆيگاتسيانى تۇنشىقتىرۋ قۇرالى, سونداي-اق «گروزا-ر2» جانە «مەرۋەرت» انتيدروندىق قارۋلارى قولدانىلدى. تومەن بيىكتىكتە جاسىرىن ۇشاتىن نىسانداردى جويۋدا «يگلا» پزرك كەشەندەرى مەن «سترەلا», «شيلكا» جۇيەلەرى تيىمدىلىگىن كورسەتتى.
جابىلۋ سالتاناتىندا قورعانىس ءمينيسترى اسكەري بولىمدەردىڭ جوعارى دايىندىق دەڭگەيىن جانە ۇيلەسىمدى قيمىلىن اتاپ ءوتتى. بۇدان سوڭ اۆياتسيا گەنەرال-لەيتەنانتى داۋرەن قوسانوۆ سارىشاعان مەن پريوزەرسك گارنيزوندارىنداعى اسكەري بولىمدەرگە بارىپ, ەسەپ تىڭداپ, نىسانداردى ارالادى. ول اسكەري ينفراقۇرىلىمدى ساقتاۋ, قارۋ-جاراق پەن وق-دارىلەردى قاتاڭ تارتىپپەن ۇستاۋ جونىندە ناقتى تاپسىرمالار بەردى.
