كەزدەسۋدى ماجىلىستەگى قحپ فراكتسياسىنىڭ جەتەكشىسى, زاڭناما جانە سوت-قۇقىقتىق رەفورما كوميتەتىنىڭ حاتشىسى, دەپۋتات ماگەررام ماگەرراموۆ جۇرگىزدى.
قاتىسۋشىلار جولداۋدا كوتەرىلگەن باستامالاردى تالقىلاپ, ولاردى جۇزەگە اسىرۋدىڭ ناقتى جولدارىن قاراستىردى. جيىنعا دەپۋتاتتارمەن بىرگە مەملەكەتتىك ورگانداردىڭ وكىلدەرى, ساراپشىلار, كاسىپكەرلەر جانە قوعام بەلسەندىلەرى قاتىستى.
«بۇگىن ءبىز جولداۋدا ايتىلعان نەگىزگى باعىتتاردى سارالاپ قانا قويماي, ونى جۇزەگە اسىرۋدىڭ ناقتى تەتىكتەرىن دە تالقىلايمىز دەپ سەنەمىن. بۇل جيىن اشىق پىكىرتالاس الاڭىنا اينالارى انىق», دەدى دەپۋتات.
جيىندا قاتىسۋشىلار پرەزيدەنت جولداۋىندا ايتىلعان باستى ماسەلەلەردى تالقىلادى. ولار تاپسىرمالاردى ورىنداۋ جولدارى اياسىندا ءوز ۇسىنىستارىن ايتتى. اسىرەسە بارلىق سالادا تسيفرلاندىرۋدى دامىتۋ, پارلامەنتتىڭ جۇمىسىن جاقسارتۋ, قۇقىقتىق, ەكونوميكالىق جانە ساياسي جۇيەلەردى جەتىلدىرۋ, زاماناۋي قوعام قالىپتاستىرۋ تاقىرىپتارى كوتەرىلدى. كەزدەسۋگە دەپۋتاتتاردان بولەك مەملەكەتتىك ورگانداردىڭ قىزمەتكەرلەرى, كاسىپكەرلەر, ساراپشىلار جانە ازاماتتىق بەلسەندىلەر قاتىستى.
«AMANAT» پارتياسىنىڭ دەپۋتاتى مارات باشيموۆ جاساندى ينتەللەكتتىڭ مۇمكىندىكتەرى مەن تاۋەكەلدەرىن جاقسىلاپ زەرتتەۋ كەرەك ەكەنىن ايتتى. ول جي جۇيەسىن باسقارۋ, ونىڭ ادامداردىڭ دەنساۋلىعىنا اسەرى جانە جاڭا تەحنولوگيالاردى اسكەري ماقساتتا پايدالانۋ سياقتى ماسەلەلەرگە نازار اۋدارۋ قاجەت ەكەنىن جەتكىزدى. دەپۋتات سونىمەن قاتار تسيفرلاندىرۋدى دامىتۋعا ەرەكشە كوڭىل ءبولۋ كەرەك ەكەنىن جانە بۇل ىسكە جاستاردى كوبىرەك تارتۋ ماڭىزدى ەكەنىن اتاپ ءوتتى.
«جاساندى ينتەللەكت – كەز كەلگەن ەل ەكونوميكاسىنىڭ قوزعاۋشى كۇشى. ءبىزدىڭ قازاق تىلىندە ءوز پلاتفورمالارىمىز, ءوز سەرۆەرلەرىمىز بولۋى قاجەت», دەدى ول.
«اۋىل» پارتياسىنىڭ دەپۋتاتى اناس باققوجاەۆ اۋىل شارۋاشىلىعى سالاسىندا سۋبسيديالاۋ ەسەبىن جۇرگىزۋگە جي-ءدى قولدانۋدى ۇسىندى.
«پرەزيدەنت ەاەو ەلدەرىمەن سالىستىرعاندا سۋبسيديالاۋ دەڭگەيى بويىنشا ءبىز ايتارلىقتاي ارتتا قالىپ وتىرعانىمىزدى ناقتى ايتتى. بۇل ءبىزدىڭ فەرمەرلەردىڭ باسەكەگە قابلەتتى بولۋىنا كەدەرگى كەلتىرەدى. كاسىپكەرلەردى تولىققاندى تسيفرلىق ورتاعا بەيىمدەۋگە دايىن بولۋىمىز كەرەك», دەدى باققوجاەۆ.
قحپ دەپۋتاتى يرينا سميرنوۆا بولسا, تسيفرلاندىرۋ جەمقورلىقپەن كۇرەستىڭ پارمەندى تەتىگىنە اينالاتىنىن جەتكىزدى.
«بارلىق قارجى قوزعالىسى اشىق كورسەتىلسە, قاراجاتتىڭ ءتيىمدى ءارى ماقساتتى جۇمسالۋىن باقىلاۋ جەڭىلدەيدى», دەدى ول.
سونىمەن قاتار «اتامەكەن» ۇكپ وكىلدەرى, سالالىق قاۋىمداستىقتار, ۇكىمەتتىك ەمەس ۇيىمدار دا ءوز وي-پىكىرلەرى مەن ۇسىنىستارىن ايتتى.
